تانیشلارین بیرینین توالته گئدیب گلمهسی چوخ چکیردی. سببینی سوروشدوم، کاسایا دوشن بؤجکلری اؤلدورمکله مشغول اولدوغونو دئدی. دوشونون کی دینجلیکله تانینان آیاقیولو ساواش میدانینا چئوریلیر. هاردا بؤجک گؤردون اؤنجه اذیت ائدهجک، سونرا دا چارهسیزلیک ایچینده اؤلومه گؤندهرهجکسن. سونرا سئوینهجکسنمی؟ سانمیرام. لذت سئوینج دئییل. هاردان باخیرسان باخ، یازیق بیر قاریشقانین اوستونه پیسلیک ائتمهنین هئچ بیر بوجاغیندا سئوینج یوخدور، اما یقین کی لذت وار. اؤلدوروب سونرا اوزولهجکسن. باشقاسینی دا، اؤزونو ده اذیت ائدهجک، بونونلا دا لذت آلاجاقسان. سوسیال مئدیانین اؤزونه مخصوص ایشلری، اؤزونه مخصوص ایلگیلری و اؤزونه مخصوص لذتلری وار. میثال اوچون بو گون خالامنوهسینین قایینیاوغلونون آد گونودور. آد گونو موناسیبتی ایله اونو تبریک ائتمهسم اولماز. تبریک ائدیرم و او دا ائدیلن دقّته گؤره منیم تبریکیمی پایلاشیر، سونرا من ده اونون منی پایلاشدیغینی پایلاشیرام. سونرا دا غریبه بیر حادیثه باش وئریر: هر ایکیمیز بونونلا غرورلانیریق. قوی هامی بیلسین کی من ایتیمین قورد داییسینین نوهسی اوچون چوخ عزیزم، او دا منه.
مثال اوچون چیلله گونو هامی قارپیز عکسی پایلاشیر. ریاضی عقلی ایله بونو آنلاماق چتیندیر. تخمیناً هامی بنزر ایشلر گؤرور و اورتادا اؤزونه مخصوص بیر شئی یوخدور. بس نیه هامی پایلاشیر؟ ائله مسئله ده اوندادیر کی بو ریاضی دئییل، سوسیال مئدیادیر. بو نوع ایلگی دونیادا سوسیال مئدیادان اؤنجهیهدک تجروبه اولونمامیش حالدیر.
بو کیمی ایشلرده یقین کی دقته لاییق مقاملار وار. آنجاق داها دا ماراقلی اولانی هئچ کسین بو دورومدان راضی اولماماسیدیر. « ندیر کی هامی قارپیز عکسی پایلاشیر؟»، «بو میراثا قالمیش قار ائله بو شهرین هر یئرینه یاغیب دا». سونرا اعتراض ائدن شخص اؤزو ده همین قاردا بیر ژست توتار، ژستینه اویغون فروغ فرخزاددان (ناظیم حیکمت ده اولار) بیر شعر یازار: «بو قارلی گونده ناظیم حیکمتله بیرگه.». سونرا بیر ده باخیرسان کی بوتون قار عکسی پایلاشانلار اوخشار ایشلر گؤروبلر. بیری گولدورمهیه چالیشیر، بیری اوزمهیه. هامی اؤزونه مخصوص، هامی هامییا اوخشار. هر حالدا هامی پایلاشیر، هامی دا دئیینیر.
دئییننلر آراسیندا عصبلهشن ده اولور: «قارپیز فوتوسو پایلاشانی انگللهیهجهیم». اصلینه باخارساق بو شخصلرین سؤزو ایله چیللهده قارپیز یئمک سنتی ییغیشیلمایاجاق. سوسیال مئدیانین اؤزونه مخصوص داورانیش فورماتی دا دییشیلمهیهجک. آنجاق ایکی حادیثه باش وئرهجک: بو داورانیش عصبلشمیش شخصین ایزلهییجیلرینی و اؤزونو ده اوزهجک. اما گل گؤر کی اوزوب اوزولمک نئجه ده لذتلیدیر.
.
“من خسته بیر اینسانام”. بو داستایووسکینین «یئر آلتیندان قئیدلر» کیتابینداکی ایلک جملهدیر. روماندا بیرینجی شخص اؤزونو و باشقالارینی اذیت ائتمکدن ذوق آلدیغینی دئییر. غریبه حالدیرمی؟ یوخ، هر شئی آیدیندیر.
یازار: زکریا صفایی