هر زامان داغا دونوروک. یئنی بیر قونو ایستر اوتک باخیمدان ایستر سوزجوک و ایسترسه ده باشقا قونولار باخیمیندان بئینیمیزی قیدیغلاییر. داغین زیروه سینه چیخدیقدان سونرا بیر بالاجا یورغونلوقو آلدیقدان سونرا اوزو آشاغی باخاراق درین دره لری، آخان چایلاری، گوز یاشی تک ایشیلدایان بولاغلاری و دیک دیک قالخان تپه لری گوزونون اونونده گوره بیلیرسن. آنجاق بو دوغال گورونتولر گرچکدن انسانی طلسیمه سالیر. انسان بو اساسدا دوشونورکن، جوغرافی آدلاری بیرر بیرر آنلام قایداسیندا واراغلاییر. بو اساسدان بیرینجی دوشونوم بئله اولور. هاردا بولاق و یا خود سو اولوب. انسانلار اوردا یاشام قوروبلار.
بو گونلر یاشیل بیتگی ده بوکولن داغلار قایداسیندا، بولاق قونوسو بیزه الین اوزاتدیر. و بیزده بولاغین الین سیخاراق قارداشلیق مرامینی بیربیریمیزله بولوشدوک. بولاق دانیشدیر و بیز دانیشدیق. نهایتده اوره ییمیز شاواغلاندیقدان سونرا یازاری جانتادان دیشارا چکدیک. ائله چکدیک. بئله ظن اولدور.بلکه ده قیلینجی قینیندان سیییردیک.
سوز اوزانماسین دئیه بو گون بولاق و اونا آیید بولاق آدلارین ساوالان داغینین اتگینده اتک له مه یی دوشوندوک.
بولاق یا کندین ایچینده اولار و یا آزاجیق قیراغیندا. چونکو انسانلار ایچمه سویونو بولاغدان آلاردیلار. حتی اوتن چاغدا سئویب سئویشمک ده بولاق باشیندا اولاردیر. سوز قونوسو بودور اوغلان بولاغا گئدرک ایسته دیی قیزدان سو ایستردیر. اگرسه قیز اوغلانا سو وئرسه ییدیر. بیلکی اوندا قیزین اوغلانا گویلو وار. و اگرسه یامان دئسه ییدیر. بیلکی اوندا گویولو یوخدور.
کندین ایچینده یئرلشن بولاغا کند بولاغی،بولاغین سویونا بولاق سویو،بولاغین آلتیندا بیتن بیر نوع بیتگی یه بولاق اوتو دئیرلر. حتی بعضا بیر آتالار سوزو وار دئیرلر. هله قیزلار بولاغیندان سو ایچمه ییب سن.
بولاق و یا باشقا بیر دئییمده بیلاق سوزجویو ایکی بولومدن بولونن بیر سوزجوک اولسادا، آنجاق بول و یا بیل کوکسل بیر سوزجوک اولاراق. اق سوزجویوده سون شکیلچی دیر. اگرسه فارسجا دئسک پسوندی مکان.
بول و یا بیل آنلام باخیمیندان چوکک بیر یئردن پیرتلاییب. پیققیلداییب و یئر اوزونه چیخان سو. و یا خود آشاغیدان قایناییب اوزه چیخان سو.
بو حالدا بیل دئییمیله اولان سوزجویه مختلف اورنک گتیردیکدن سونرا چئشیدلی بولاق آدلارینا جوغرافی باخیمدان قاییداجاغیق. باخ. شورابیل، ارده بیل، بیله سووار، بیله قان، بیله دره، شا بیل و ها بئله….
ایندیسه داغدا بولاق آدلاری.
۱.قارا بولاق: بو بولاق زالی گزی دئییلن بیر یایلاق و خارابانین سو ایچمه یئریدیر. بو یایلاق اوتن چاغلاردا عیسی لی تایفاسینا آیید اولسادا. آنجاق بو گون دوشمه ین کندینین الینده دیر.
۲.قیرخ بولاق: لنج آوا کندینده بیر بولاق آدی اولسادا، آنجاق ساراب شهرینه باغلی کند آدیدیر.
۳.یاستی بولاق: خیاو شهرینه باغلی اولان کند آدی، بو کنده همده شوش بولاق دئیرلر.
۴.داش بولاق: داشین اوره ییندن پیرتلاییب چیخان سو. یایلاغدا بولاق آدی اولسادا، آنجاق یوزلرجه کند آدیدیر.
۵.جین بولاغی: یایلاغدا بیر بولاق آدی
۶.کور بولاق: سویو قورویان بولاق
۷.گور بولاق: سویو چوخ اولان بولاق
۸.زینه بولاق: سویو داملا داملا آخان بولاق
۹.ساری بولاق: تورپاغی ساری رنگده اولان بولاق
۱۰.شور بولاق: سویو دوزلو اولان بولاق
۱۱.شیرین بولاق: سویو ایچمه لی بولاق
۱۲.قوشا بولاق: ایکی و جوت بولاق
۱۳.چاناق بولاق: هم خیاودا و هم ایسه اردبیلده کند آدی
۱۴.گوللو بولاق: یایلاق آدی
۱۵.ایستی بولاق: شیروان دره ده بولاق آدی
۱۶.پوخلو بولاق: یایلاغدا خاراباسی بویرونده اولان بولاق آدی
۱۷.بولاغلی: یایلاغدا بولاق آدی
۱۸.بولاغلار: نیر شهرینده بولاق آدلاری
۱۹.بویوک بولاق: لنج آوا کندینده بولاق آدی
۲۰.سوجا بولاغی: لنج آوادا بولاق آدی
۲۱.بند آلی بولاغی: لنج آوا کندینده بولاق آدی
۲۲.کئچی بولاغی: بولاق آدی
۲۳.سویوق بولاق: خیاو شهرینه باغلی اولان کند آدی
۲۴.شاه بولاغی: سومرین شهرینده یئرله شن بولاق آدی
۲۵.آغ بولاق: خیاو شهرینه و نمین شهرینه باغلی کند آدی
۲۶.کهلیک بولاغی: خیاو شهرینه باغلی اولان کند آدی