دئییرم واللاه بو میللتی آللاه توتوب پیغمبرده ایمضالاییب! اوزو گولمویوب گولمز، ایران جماعتینین، اؤزللیکله بیزتورکلرین گؤنوموز قالیندیر. باهالیغا، آجلیغا، خستهلیگه، زیندانا، اعداما، اؤلومه، خولاصه هر نه موصوبته دؤزور! فقط سنین و سنین اولیاوین ریضاسی اوچون! تکجه بو موصوبته دؤزومو یوخدو. آی قوربان اولدوغوم آللاه، نیه قییدین او طیفیل بالالارا آخی؟ اونلارین گوناهی نهایدی؟ کرامتیندن آزالاردی او بالالاری اؤلومدن قورتاراردین؟ بونلاری یازا-یازا گؤز یاشیم آخیب سئله دؤنمهسه یاخشیدیر!
نئچه واختیدی گوج بیللاه، گؤز یاشیلا بورون فیرتیغیلا ” ایران” خانیمی بؤیلو ائلهمیشدیک، اوشاقلارینی ساغلام دونیایا گتیرسین، بلکه بیزیم مملکت دونیادا بیر آز دا اولموش اولسا، اعتبار قازانسین دئیه، اونا قوش سوتو قولان اَتی یئدیزدیریردیک. نهاولدو؟
“ایران” خانیم اوچ دانا گؤزل-گؤیچک تولا، دوغان گوندن بری، سئوینجدن چیچهگیم چاتلاییردی، اؤلکهمین آجی خبرلی، اعتیراضلار، توتولانلار، اؤلنلر بئله وئجیمه دئییلدی، منه نه! دیش دورسونلار دا. قدیم دئییردیلر: سن نئینیرسن هازاندا، باشین قایناسین قازاندا! ایندی جانیم وطن داشلاریم، ارباب دئییبلر، رعیت دئیبلر! ایمام دئییبلر، اومت دئیبلر. دئولت بیلهنی نه سن بیلرسن نهده من! قویون حکیم جرراحلار، بو خستهنی عملیات ائلهسینلر. ایکی باشی وار، یا توختار دورار، یادا بیردفعهلیک قیراغینی قاتلار! سنده دینجلرسن خستهده!
ایندی آی بالا، ایکی الینیز وار ایکیسینی ده بورج ائدین، باشینیزدان یاپیشین. اصلی موصوبت بودو با:
“ایران” خانیمین ایکی تولاسی آز فاصیلهیله تلف اولوب. بو وای خبر بوتون دونیایا یایلیب، خبرگزاری پارس، آشوسئیتد پرس، یونایتیدپرس، نم نمنه پرس لرین! هامیسی آغلار گؤزله بو خبرلری یاییرلار. سوچ کیمدهدیر ؟ بیلینمیر. من دئییرم، گؤروشن کنده بلدچی لازیم دئییل کی،کسین بودا بؤیوک شیطان و اونون عزیز بالاسی صهیونیستی رژیمین اؤز ایشلریدی! پیلان بودو: قافلانین نسلینی کسهجکلر، سونرا سیرا آصلانلارا چاتاجاق!!! تکجه قورخاق پیشیکلر قالاجاق…!!!
جانیم اوچون اورک ایستیر بو درده تاب گتیرسین. صاباح بیری گون آغزیما داش تورپاق، اوچونجوده اؤلسه، و سونرا اونلارین غم قوصهسیندن “ایران” خانیم دا تلف اولسا، هانکی داشی باشیمیزا سالاریق؟ ایران اؤلسه منده اؤلرم! بیلیرم…