خیاو شهرینه باغلی اولان بو ایستی سو، گئنیش بیر دره نین ایچینده یئرلشسه ده، آنجاق اوتک باخیمیندان چئشیدلی خارابالارا و عینی حالدا چئشیدلی قبیرله ریده گوره بیلیریک. قبیر لر ایستر اسلامدان اونجه یه و یا اسلام دان سونرایا آییددیر. بو اساسدان گوردویوموز خارابالاردان یالنیز یازیچی خاراباسینین آدی بو گونه قده ر آدینی اوزونه ساخلایا بیلیب. یانی بوندان باشقا خارابالارین آدی اولماسادا، یالنیز اونلارا کت یئری دئیرلر. و بوندان علاوه تپه نین باشیندا اوچوق قالان بیر خارابایادا شاتیرین قالاسی دئییرلر. و یا خود آرابا یولون دوتاراق گون چیخانا دوغرو گئدنده بیر خارابانین آدینا پوخلو بولاق دئییرلر.
قوتور سوزجوک باخیمیندان بیر دری ناچاقلیقی اولور. یانی اگرسه بیر حیوان قوتور توکسه، یونو و توکو توکولور. و اوتن چاغدا ماشین یولو اولمادان اونجه مال داواری بورایا گتیره رک یویاردیلار. و انسان اوغلانلاریدا حمام ائتمک اوچون دورد قیچلی حیوانلارلا گله رک بوردا یویوناردیلار.
قوتور سویونون اوست قاتینا سویوق قوتور سویو دئییرلر. البتده ائله بوردادا ایستی سو اولسادا، آنجاق گوجسوزدور. چون بوردان یاناشی سویوق سودا چیخیر و ایستی سودا، سو ایلمانقی قایدادن کئچه رک بوز کیمی اولور.
قوتور سویو قیزیل داغین سینه سینده یئر تاپسادا، آنجاق قوتور سویوندان سولتان ساوالانا باخاندا،بئله دویولورکی ساوالان بیر قارتال کیمین ایسته ییر اوچا.
قوتور سویو دئدییمیز جوغرافی یئر، بوندان باشقا قاراداغدا داش زئیوه کندینده یئر تاپان بولاق آدیدیر. و یا بوندان علاوه قوتور سوزجویونه دوندوکدن سونرا خوی شهرینده بیر کورپویه دوندوکدن سونرا قوتور کورپونوده آنلایا بیلیریک.
قوتورسویونا یاپیشان بیر داغین آدی کوکورد داغی اولسادا، آنجاق بو داغدا بیر جوت کوهولون آدی آدام توتان کوهولودور. هر بیر کیمسه بو کوهوله کئچسه خفه له نیر. و حتی آغزینی دوتاراق کوهولون ایچینه کئچدیکدن سونرا، مختلف شکیلده قوش اولوله رینی داشلاردان آسلانیقلی گوره بیلیریک. البتده ائله اوتن چاغدادا قوتور سویونون سویو دا آدامی دوتاردیر. و بو حالدا حالی قاتیشان انسانی سویوق سویا باسدیقدان سونرا دیشارا چیخاراردیلار. و بوندان علاوه کوکورد داغیندان کوکورد آپاراراق تویله و پیه ده یاندیردیقدان سونرا قورت قوشو اولدورردیلر.
قوتور سویوندان علاوه ایستی سو آدلانان شابیله ده دونه بیله ریک. کوکورد داغینین گون چیخان وری قوتور سویو اولسادا آنجاق گون باتان وری شابیلدیر. شابیل دوز شیروان دره نین باشیندا یئرلشسه ده، آنجاق اوتن چاغدا داشدان ایکی حوضدان عبارت بیر یئریدیر. یانی سو گله رک بو حوضا دولدوقدان سونرا انسانلار چیمردیلر. زامان سوره جینده بو داشلار یئریندن دربه داغین اولدوقدان سونرا، اوستوندن دام داش تیکدیلر. شابیلده ایستی سودان علاوه بیر سویوندا آدی تورش سو اولسادا، بونا معده سویودا دئیرلر.
شابیل ایله قوتور سویونون آراسیندا بیر قارا داشادا اوجاق دئییلسه ده، آنجاق قوتورسویونا یول آچاندا، بیر یئکه داشی یئریندن چیخارداراق دربه داغین ائدیرلر. و بو داشیندا آدینا یازیلی داش دئدیکدن سونرا، دئییم لر اساسیندا اورارتویی دونمینه آیید بیر یازیدان سوز گئدیر. حتی آغیزدان آغیزا بیر سوز وار بئله دئییلیر داشین اوستونده یازی بونو دئییردیرکی گنج منه باخیر منده گنجه. هر حالدا بو جانلی تاریخده، باشقا جانلی تاریخیمیز کیمین، جهالت اللریله یاشامینا سون وئریلیب.