قوشچولولار لا کاظیمخان حاققیندا
سیز قوشچولار لا محترم آتا بابالارینیز، بوتون آذربایجاندا میثلی اولمایان قهرمانلاریمیز سینیز.
من «ستارخان»ی چوخ سئوهرم. آنجاق او دا کیریخدی، شعوبیه، فارس هابئله ائرمنیلرین توزاغینا دوشدو. اونلارین یالانچی وعدهلرینه بئل باغلاییب سنگرین بوشالتدی. تهراندا تحمیق اولوب آیاغیندان گولـلهلندی و بیله رکدن معالجه ائدیلمهین او دردین یاراسی لا دا شهید اولدو .
من شیخ «محمدخیابانی»نیده چوخ ایستهرم. اما او دا دموکراسی ائلهجه ده یالانچی اوغورونا ایناندی. جاماعتی سیلاحلاندیرمادی. حتی اؤز امنیتینی ده نظره آلمادی! اونون ائوینه باسقیندا، پیژامه (ائوشالواری، راحتی شلوار، زیرشلواری ایله ) دام دان-داما قاچیب بیر تاجیرین ائوینه سیغیندی. او تاجیر دئدی: «آقای خیابانی منیم ائویمه قان گتیربسن؟»
شیخمحمد او کیشییه سؤز وئردی اونون ائوینده سلاحا ساریلمایاجاق. (بو سؤزلری من عیناً علیرضا نابدل-ین اؤز دیلیندن دانیشدیغینی ائشیدیب سیزه روایت ائتدیم ). آنجاق قارشی طرف او ائوه حمله ائدیب خیابانی نی گولـله لدی. شیخ سیلاحلی اولارکن، او کیشییه سؤز وئردیگینه گؤره اؤزوندن دفاع ائتمهدی.
من ائلیمین مظلوم اوغلو: مرحوم «سیدجعفر پیشهوری»نی ده، چوخ سئورهم. یازیقلار اولسون سید ده تاریخده ان بؤیوک یانلیشینا یول وئردی. اؤزونو ده، بیزی ده یازیق ائتدی. دئمک فرقه نین اوقدر فداییسی اولا-اولا، اصلا دوشمنه قارشی بیر گولـله ده آتمادی. یعنی پهلوی رژیمی او ساواشدا بیر اؤلو ده وئرمه دیر! سید له اونون یار یولداشی فیرقهنی قورومادیلار (دفاع ائتمهدیلر)! یالنیز دئییلنلره گؤره، سیدی ده زور ایله روس ماشینیا باسیب ناخجیوانا، اورادان دا «باکی» شهرینه گؤتوروب سونرا دا ساختا یول قضاسیندا آرادان آپاردیلار.
آنجاق قوشچولو کاظیمخان انگلستانین نماینده سینی اؤز آیاغینا گتیرتدی. اوستهلیک او کاظیم خانا چوخ بؤیوک باشقانلیق (فرماندهلیک) اؤنردی. کاظیمخان ایسه نه اونون یالان وعده لره ایناندی، نه ده سنگرینی بوراخدی… او ستارخانین یانلیشین تکرار ائتمهدی. ایگید کاظیم خان انگلستانین نومایندهسینین جوابیندا دئدی: بو «قولدور رضا»دیر؛ من بو شرفسیزی یاخشی تانییرام، بو ایرانین رسمی شاهینین حاققینی قارمالاییبدیر. بو ایران مجلیسینی داغیدیبدیر. بو آدام ایرانین قانونی شاهی دئییل. سن گئت ایرانین قاجار شاهینی گتیر، من داش دان آشاغا یئنیم.
قوشچولو کاظیمخان، شیخمحمد خیابانینین ده یانلیشینی ائتمهدی. کاظیم خان سون گولـلهسینهدک ساواشدی، میس قاب-قازاندان توپ گولـلهسی دوزلدیب، دﯙشمنلرینه توللادی. گمی، سلاح، توپ، تفنگ کارخاناسی قاییردی. تلگراف خانا یاپدی. ۲۰ میلیون ایران جاماعتینین ۹ میلیونو قحطلیکده آجیندان اؤلدولر، کاظیم خان ایسه او اولوب قالان بوغدانی، جاماعتین آراسیندا عدالتله بؤلوردو، یعنی باشینداکی بؤرکو اؤلچو قابی ائتمیشدیر، هر کسه بیر بؤرک دولوسو بوغدا وئریردی.
قوشچولو کاظیمخان، پیشه وری کیمی، روسلارین- اینگلیسلرین ائلهجه ده فارس حؤکومتینین حیله تورونا دا دوشمه دیر. بونونلا دا تسلیم اولمادیر.
او «دده قورقود» کیمی ساز چیگنینده؛ «کوراوغلو» کیمی قیلینج بئلینده، «قوچاق نبی» کیمی توفنگ الینده، اؤلن گونه قدر آذربایجانیمیزی قورودو. عؤمرونون سون اون ایلینی سون نفسینه قدر، (ایکی ایل ائرمنی دیغالاریی ایله او داشناقلاری، آذربایجان دان قوُودو. یئددی ایل ده ایسماعیل آغا سیمیتقو ایله اﯙز-اﯙزه ساواشدی، سون عؤمرﯙنو ده رضا خان ایله ساواشیب شهید اولدو .
روحو شاد، یولو آردیجیل اولسون. آذربایجان میللتی بو قهرمانیمیزین هئیکلینی بوتون شهرلریمیزده قالدیرمالییق.
۱۴۰۲/۹/۵ استانبول
یازار: حمید احمدزاده(تیلیم خانلی)