ایران رژیمی گۆنئی آزربایجان میلی-مدنی حرکاتینی رادیکاللاشماغا سۆرۆکلهییر
رحمتلیک زلیمخان یعقوب دئییب:
سونبول نهدی، دندن یاخشی بیلیرم
داغ نه چکیر، چندن یاخشی بیلیریم
سن بیله نی، سندن یاخشی بیلیرم
یازماق اولمور، یازماق اولمور عزیزیم…
کراللیق (پادشاهی)، جمهوریت ویا هر هانسی اؤلکهدارلیق سیستئمیندن آسیلی اولمایاراق، هر بیر سیاسی جغرافیادا یاشایان میللتلری تمثیل ائدن دولتلرین او جمعیتله قارشیلیقلی (دولت-ملت) گؤرَولری واردیر.
بو گؤرَو یاخود وظیفه، بوتون اؤلکهلرده آنایاسا (قانون اساسی) اوزره بللی ائدیلیر.
اؤرنک اوچون ایندیکی ایران آدلانان اؤلکه حاکمیتینین آنایاساسینین ۲۳-جو مادهسینده دئییلیر: «اینانجلارین یوخلانیلماسی قاداغاندیر، هئچ کس عقیدهسینه گؤره تحقیر تنبیه و استنطاق ائدیله بیلمز».
پارتییا کومسییاسینین ۱۰-جو ماددهسینین (ماده 10 قانون احزاب) وظیفهسی سیاسی بیرلیکلرین و امکداشلار بیرلیینین یارادیلماسی حاققیندا عریضهیه باخماق و تأسیس لیسئنزییاسینین (مجوزینین) وئریلمهسی اوچون داخلی ایشلر ناظیرلیینه تقدیم ائتمک، سونرا ایسه تشکیلاتین رسمی فعالیتی اوچون همین اورقاندا قئیدیاتا آلینماسینا دایر عدلیه اورقانلارینا تقدیم ائتمکدیر.
هله 15-19- 25-27 و … مادهلرین نئجه دئیهلر زیغی چیخدیغینا گؤره آرتیق اونلارا اوخشار مادده لره ده استناد ائتمهیی لازم گؤرمورم.
ایرانین آنایاساسینداکی یوخاریدا صادالادیغیم ماده لرینه دایاناراق، دئمهلی وطنداشلارین دیلیندن-دینیندن، جنسیتیندن آسیلی اولمایاراق سیاسی فعالیتلری اوچون هئچ بیر سیخینتیلاری اولمامالی دیر. اوسته لیک کیمسهنی دوشونجهسینه گؤره ده قیناماق و یا سیخیشدیرماق اولماز.
سون آیلاردا توتوقلانیب، ایکی-اوچ آی تبریز اطلاعات ادارهسیننین تجریدخانالاریندا جسمی-روحی ایشکنجهلره معروض قالان، سونرا بیر قیسمینین موقتی آزادلیقلاری، فعاللارین سانکی تشکیلات قورماقدا اتهاملارینین گؤستهریجی سی دیر.
اونوتمامالییق 11 ایل بوندان اؤنجه، گونئی آذربایجان حاقلارینی قوروماق اوچون؛ حاضیردا تبریز اطلاعات ادارهسینین تجریدخاناسیندا ایشکنجهلره معروض قالان یوروش مهرعلی بیلی ایله بیر سیرا فیکیرداشلاری، پارتیالارین اونونجو مادهسینه اساساً «یئنی گاموح» آدلی پارتیانین اساسنامهسینی عاییداتی اورقانلارا تقدیم ائدهرک اؤلکه داخیلینده تام قانونا باغلی چالیشماق ایسته میشدیلر. نتیجه ایسه، ائششک قانادلانیب اوچدو! «بو ائششگین اوچماسینی دیرناق آراسی آچیقلاماغیم گرکیر»: سانکی بیر نفردن تاپماجا یاریشندا سوروشورلار:« بیر دنه اوچاغان حیوان آدینی چکسین، آدام تردد(شک و شبهه) ائتمهدن در حال جواب وئریر: « ائششک»!!!
یاریش آپاریجیسی دئییر: آخی ائششگین قانادی یوخدور، او نئجه قوشلار کیمین اوچا بیلر؟ آدام جاواب وئریر: واللاه نه دئییم آخی، آنلاماز حیواندیر، دئمک اولماز کی، بیردن اوشدو –اوشدو!
دئمهلی ایرانین تهلوکهسیزلیک و عدلیه سیستئمی بیر قوروپ وطنسئور، آکادمیک و آیدین دوشونجهلی آذربایجان گنجلرینی قانونی فعالیت ایستهدیکلرینه گؤره توتوقلاییب، اوزون ایشکنجهلی ایستینطاق دان سونرا، 9 ایل حبسه محکوم ائتدیلر. بو قانونی اولماق ایستهین «یئنی گاموح» پارتیاسینین باشقانی دوکتور لطیف حسنی تام دوققوز ایل حبسه معروض قالدی و سونوندا دا ساختا داوا دالاش آدینا قولونو سیندیریب مجبوری آزادلیغا بوراخدیلار. بونلارین توتوقلانماسی، همن آنلاماز حیوان کاراکترلی سؤزده ایران اسلام جمهوریتی حاکمیتی دیر کی، گؤزلنیلمهدن اوچاغان ائششک رولونو اویناییر.
ایندی ده یئنیگاموح قوروپونون ایکینجی شخصی «یوروش مهرعلیبیلی» ایله باشقا ساخلانیلانلاری گویا هانسی سا گیزلین تشکیلاتین داخلی قولو اولماقدا اتهام ائدیرلر.
بو او دئمکدیر کی، جمهوری اسلامی قرآن گؤتوروب و گونئی آذربایجان میللی حرکاتی آکتیویستلرینه یالواریب دئییر: سیز بو قرآن، سیویل حرکاتدان چکینین و رادیکال گیزلی قوروپلاشمالار یارادین، تا بیز ده راحاتجاسینا سیزی بیچیب تؤکه بیلک.
گؤرونن اودور کی، بو یؤنده باجاریقسیز اولسالار دا، بونون «جان بوغازا ییغیشما» اوزونو آنلامیرلار.
بورادا قیسا بیر حکایه ایل، مسئلهنی یئکونلاشدیرماق ایستهییرم.
دئییرلر: بیرگون شاه وزیریندن سوروشور:«وزیر دئه گؤروم بیر زامان خوراسان ایالتی عصیان ائدر سه، نه ائتمهلیییک؟
وزیر دئییر: اعلیحضرت ساغ اولسون، آذربایجان قوشونو اونلاری یاتیرماقدا یئتر. شاه دئییر: بس تهران عصیان ائتسه نئجه؟ یئنه وزیر آذربایجان قوشونونون غاییلهنی یاتیرا بیلهجهییندن اونو آرخایین سالیر. شاه هر هانسی ایالتین احتمالی عصیان تهلوکهسینی اؤنه چکیر سه، وزیر، آذربایجانا گووَنجینی سؤیلهییر. نهایت شاه سوروشور: بیر زامان آذربایجان عصیان ائتسه، نئجه؟ وزیرین بو آندا رنگی سولور و دئییر: آغزیما داش-تورپاق؛ اعلا حضرت، او زامان شپیر-شوپوروموزو ییغیشدیریب، اؤلکهدن قاچمالییق».
توتالیتر حاکمیتلرین طالعی چوخ اوخشار اولوب.
واتسلاو هاوئل «گوجسوزلرین گوجو» کیتابیندا توتالیتار حکومتلرین تصویرینده بئله حساب ائدیر کی، بو حکومتلر ایلکین مرحلهده اونا قارشی اولان بوتون سیاسی قوهلری محو ائتدیکلری اوچون، یئنی مرحلهده اینسانلارین گوندهلیک حیاتینا موداخیله ائتمک مجبوریتینددیرلر. گوندهلیک حیاتین موختلیف آسپئکتلری(جنبهلری) اوزرینده اینسانلارا گوج تطبیق ائدیرلر.
هاوئل ایسه دوشونور، بورادا سیاست ایکی موختلیف حیات قاوراییشی آراسیندا موناقیشهیه چئوریلیر: حقیقت دایرهسیندهکی حیات و یا ایکی اوزلولوک، یالان و سوکوت دایرهسینده حیات. هاوئلین فیکرینجه، توتالیتار رئژیملر اینسانلارین گوندهلیک حیاتینی ریاکارلیغا، یالانا و سوسماغا چئویریر.
بونا گؤره ده هاوئل حساب ائدیر کی، توتالیتار سیستئمین اساس گوجو او رئژیمین عسگرلری، سلاحلاری و دَیَنکلری دئییل. عکسینه، بو سیاسی سیستئملرین اساس گوجو ایکی اوزلولوک و یالانین چئورهسینده یاشاماغا داوام ائدن اینسانلاردیر.
اونا گؤره، توتالیتار سیاسی سیستئمین اصل گوجو آرخاسیندا اخلاقینی ایتیرمیش، ایکی اوزلولوک، یالان و هوجوملار دایرهسینده یاشایان و جمعیتینی پوزان ( اؤز وارلیغینا تجاوز ائدن) بیر جمعیت دایانیر.
فارسلاردا بو عادی بیر حال اولسا دا، تورکلر اوزون موددتلی بونا دؤزمزلر.
هاوئل اینانیر کی، بو وضعیتده توتالیتار سیستئمین قورخدوغو ان اؤنملی تهلوکه حقیقتی مدافعه ائدن، یالانلاردان دوغرو- دوزگون یاشاما جسارتله یؤنهلن اینسانلاردیر. بونا گؤره ده هاوئل حساب ائدیر کی، داها لیاقتلی طالعه چاتماق اوچون تکجه باشلانغیج نقطهسی، اینسانلارین اؤزلریدیر. یعنی شاه-ین چیلپاق اولدوغونو دئیهبیلن صداقتلی اینسانلار.
بو اینسانلار مؤوهوم پان ایرانچی لار، یوخ، غیرفارس میللتلرین مبارزلری و اونلارین اؤنونده گئدن گونئی آزربایجان میللی حرکاتی آکتیویستلردیر.
نئجه کی 57- جی ایل بهمن آیینین 29-دا تبریز عصیانا قالخدیقدا، پانفارس شئوونیسمه دایاقلی لعنتلنمیش پهلوی حکومتینین اساس دیرکلرینی تیتره دیب، چؤکدوردو، شوبههسیز اینگیلیس قول بئچهسی سؤزده ایران اسلام جمهوریتینین تهران حاکمیتینی ده، تبریز مرکزلی عصیان چؤکدورهجک. بو تاریخدن درس آلمایان آنتی ایران، آنتی اسلام و اؤزللیکله آنتی تورک حاکمیتین قاچیلماز طالعی دیر. او گون ایسه چوخ دا اوزاقدا دئییل.
یازار: حبیب ساسانیان (یاکاموز)/ گونئی آزربایجان میللی حرکاتی آکتیویستی- یازار، شاعر