وار اولماق آنلامی “من” حیسی یارانماقلا توره نر. یعنی اینسان وارلیغینی، اوز “من” نینی کشف ائتمک ایله کشف ائدر. “من” کشف اولدوقدا، اینسان “من” دن دیشاری و دیگرلریده کشف ائدیب تانییا بیلر. اینسان او زامانا دک کی اوزونو یا همان “من” نینی تانیماییب، طبیعت و چئوره ای بیرگه لییندت آیریلا بیلمز، اوزو و طبیعت آرسیندا اولان فرقلری دوشونه بیلمز. طبیعته سوار اولوب تمدن یاردا بیلمز. یعنی طبیعت ده اوبیری حئیوانلارا تای، بیر حئیوان قالار. اینسان “من” ایله اینسانلاشماغا باشلیر. “من” اولمایان اینسان بیلیم و تمدن صاحیبی اولا بیلمز. بیلیمین و بیلگینین باشلانیشی یعنی کولتور و تمدنین باشلانیشی “من” دن باشلانیر.
آمما حیف کی بو مقدس “من”…
اینسان بیر حئیواندی. بو حئیوانلیق هئچ زامان اینسانین یاخاسین بوراخمیر. اینسانین یاراتدیغی تمدن و کولتورو حئیوانلیق حیسی زاولا و فسادا چکیر. فضیلتی رزیلته، دوستلوغو دوشمانلیغا، باریشی ساواشا، چئویرن همان بو حئیوانلیق حیسیدیر. حئیوانلیق حیسی اینسانین متعالی”من” نینی “منییته” چئوریر. ” حئیوانلیق حیسی زورلویوب اینسانین “من” نیندن “منملیک” توره دیر. “منملیک” و یاخود “منییت” اینسانیتین خوره سی دیر. همان سویه ده کی “من” تمدن و بیلیم یارادیر، “منیت” ده فساد و زوال یارادیر.
“منییته” یاخالانان بیریسی، اینسان قلیغیندا، ییرتیجی بیر حیئواندی. وای او گوندن کی بئله بیر حئیوان جامعه ده مقام، ثروت، و قدرت صاحیبی اولموش اولا. بئله بیر اینسانلار بیر توپلومومن باشا باشین فسادا چکه بیلرلر. وای او گوندن کی بیر جامعه نین یوخاری باشچی و رهبرلری منییت و منلیگه یاخالانمیش اولالار. وای او گوندن بیر میلت و یا بیر قوم، “منیت” نین توزاغینا دوشموش اولا. اوندا شوونیسم و فاشیسم یارانار.
نه ایسه…
پستدا پایلاشدیغیم ماهنی، رحمتلیک میرزا علی اکبر صابرین منییته راجع بیر شعرینه بسلنیب. رحمتلیک صابیر بو شعری فئودالی بیر اتمسفرین حاکیم اولدوغو زامان یازیب. امما نه یازیق کی بیزیم بو گونکو، مثلا صنعتی دوره میزه ده شامیل اولور. سانکی بو شعر، ائله بو گون همین بو ساعت یازلیب._ شعری دینلمگه لطفا استاد ارکین اینستا آدرسینه باش وورون https://www.instagram.com/p/Cd-px7DjgPK/ _
تانری بیزی و بیزیم جامعه میزی منلیک لردن قوروسون. هر سویه ده. هم فردی و کیشی سل، هم عمومی و کوتله سل، همده ایدئولوژیک و عقیده سویه سینده، منلیک لردن قوروسون تانری بیزی.
553