هله ده یاشاییر آذربایجان
آذربایجانیمیزین ۱۳۲۴-۲۵ اولای لاری لا ایلگیلی کیتابلاری اوخویارکن،بیر سیرا آدلار گلیب دایانیر گؤزلریمیزین اؤنونده.
پیشه وری، بی ریا، بالاش آذر اوغلو، مدینه گۆلگۆن، سؤهراب طاهیر، سلام الله جاوید، جعفرکاویان، شبیستری، محمد آگاهی، صفرخان قهرمانیان، اولو ذهتابی، بهزاد بهزادی،حمید محمدزاده، محمدعلی فرزانه، محمدحسین مبین، قوام السلطنه، مولوتوف، باغیراوف، استالین، محمدرضا پهلوی، قیزیل اوردو، ارگ قالاسی، ذوالفقاریلر، مییانانین قیزکؤرپوسو، مرکزی کومیته، یاندیریلان کیتابلار، آژیر درگیسی، دئموکرات فیرقه سی، ۱۲ شهریور، فدایی، تبریز و اورمو بیلیم یوردلاری، تورک دیلی نین رسمی لشمه سی، اَلی قیسادیلمیش اربابلار، خالیصه یئرلری، ادورارد براون، عاشیق حوسئن جاوان، میر مهدی اعتیماد، قلی صبحی، قافلانکو، هولاسو، ۲۰ مین شهید، ۸۰ مین قاچقین، نجات آذربایجان؟؟؟!!!، دانیشیر آذربایجان و شهید فیریدون ایبراهیمی…
هه؛… هله ده دانیشیر آذربایجان میللی حوکومتین ان سئویملی گنجینین آغزیندان، شهید فیریدون ایبراهیمی دیلیندن
۳۴ ساعات یولداشلاری لا، بیرگه دؤیوشوب مرمی لری بیتدیکدن سونرا گۆلر اۆزله جلاد پهلوی لرین چوروموش ایپینی بوینونا سالیب و قهرمانجاسینا میللتی نین آزادلیغی اوغروندا شهید اولدو.
چوخ آز آداملار دیری قالیبلار،بیر سیراسی دوغال اؤلومله- بیر سیراسی دا، اؤلدورولوبلر، آنجاق دیلیمیز تکجه فیریدون ایبراهیمی یه شهید دئمه گه آلیشیب.
فیریدون ایبراهیمی فیرقه نین ان میللتچی اویه لریندن بیریسی ایدی، بلکه ده ائله او چاغلارین لاپ درین و گوجلو میللی دوشونجه سی اولان ایگیدی.
اونون اینانجینا گؤره، بیر میللت کئچمیشینی اوخویوب بیلمه سه ایدی، اله گتیردیگی آزادلیغین قدرین بیلمه یه جکدی، ائله او اساسدا دا کیتابلار و یازی لار یازیب آذربایجان میللتی ایچره یایدی.
شهید ایبراهیمی فیرقه نین اصلی اویه لری نین ائللرینه و دیللرینه نه قدر باغلی اولدوقلاری نین سیمگه سی ایدی و او ایگیدلری- آیدین باخیشلاری و فدایی لری کومونیسته باغلایانلارین آغیزلارینی باغلایان بیر دامغا(مؤهور).
نه دن کی، کومونیسم کیمی دوشونجه لر انترناسییونالیسمی(فرا میللی) باخیشلاری اوچون، میللی دوشونجه لره یول وئرمزلر، حالبوکی، میللی حوکومت و اونون صادیق چالیشلانلاری و یادیگارلاری بوتونلوکجه میللی دوشونجه لی ایگیدلریدیلر.
او گونلر بلکه ده شهید فیریدونون سؤزلرینی باشا دوشن آز اولدو.
آنجاق بو گون ایمامییه یه مزارینی زیارته گئتدیگیمیزده، دیلده اوخویوروق: هله ده دانیشیر آذربایجان،
هله ده یاشاییر آذربایجان.
داود عبدی