آنادیلی آرادان گئتمهسینه لاقید قالان،حسین چی اولابیلر؟
سلام اولسون اونلارا کی #زنجیر وورمورلار، آمما اسیرین قیچیندان زنجیر آچیرلار؛ #سینه وورمورلار، آمما دردلی اینسانلارین سینهسیندن آغری و کدری قورتاریرلار؛ گؤز یاشی تؤکمورلر، آمما اینسانلارین یاناقلاریندان گؤز یاشلارینی سیلیرلر؛ صوفره سالمیرلار، آمما بیرینین صوفرهسیندن چؤرهیینی ده اوغورلامیرلار؛ آخ وای دئمیرلر، آمما دردلی اینسانلار اوچون درماندیلار.
بو یوخاریداکی متنی فارسجا بیر فوتویازیدان گؤتوروب چئویرمیشم. #امام_حسین (ع) آزادلیق یولوندا #قیام ائلهدی، #شرافت اوستونده دایاندی، ظولمه قارشی عصیان ائتدی. مظلوم دئییلدی، ظولمه قارشیایدی. شهامتی وار ایدی. ایندیسه نئچه یوز ایل سونرا، باشلارینی یاریب گؤزلرینی چیخاردانلار امام حسینین آموزهلرینی ده یئرینده اوتوردوبلارمی؟ یوخسا یالنیز آغلاماق یاس ساخلاماقدیر. ظولمه قارشی هانسی عصیانلاری ائدیبلر؟ حاقسیزلیغا قارشی هانسی چیخیشلاری اولوب؟ تاریخ، جغرافیا، آنادیلی، فرهنگ و بوتون وارلیقلارینین آرادان گئتمهلرینه نه ایش گؤروبلر؟ آزادلیق یولوندا و دونیا گوجلرینین اسارتلریندن قورتارماق اوچون هانسی شهامتلر مئیدانا قویوبلار؟
سوروشاندا «اعتیقادیم وار» دئییرلر، دئیهنده دقیقاً نهیه اعتیقادین وار؟ امام حسینه دئییر، سوروشاندا امام حسینین نهیی و هانسی ایشینهمی؟ سن کافرسن دئییر. نییه کی عیللتله اعتیقاد تاپماییب کی منطیقی سؤزلری ده قبول ائتمیش اولسون. دلیلسیز، کور و دوشونولمهمیش تعصبون سونو اولاجاق ایندیکی اسیر دوروموموز. تسلیت دئمزلر، دئیهرلر یاشاسین بو بؤیوک اینسانلار. یاشاسین بوتون دونیادا آزادلیق یولوندا چالیشیب جانلارینی وئرن قوتسال آزادهلر.
آنادیلی آرادان گئتمهسینه لاقید قالان،حسین چی اولابیلر؟
ایلقار موذن زاده
