اورمولو جمشید خان افشار بکشلی ، آیدین دوشونجه لی، اورمونون جسارتلی حربی سی،دؤولت لی ، سییاستچی، آذربایجانین وارلی و بؤیوک اینسانلاریندان بیریسی،آذربایجان میللی حرکتینین ایلک باشچیلاریندان دیر.
اورمولو مجد السلطنه افشار آذربایجاندا میللی تورک اؤزونو تانیتماق دؤورونون ظوهوروندا ایلک آددیم آتان کاراکتئرلردن بیریسی،حتی قاجار ممالک محروسهسینین(کی بو زاماندا ایران آدلی اؤلکه ایله تانینیر)ایمپئراتورلوغونوندا ، تورک میللی دموکراتیک حرکتین ایلک اؤندری ساییلیر. اورمولو مجدالسلطنه افشار ، ایییرمینجی یوز ایلین باشلانغیجیندا “تقی رفعت”ین یولداشلیغیلا، گونئی آذربایجانین یاری موستقیل حاکیمییتی عثمانی حوکومتینین حیمایه سی ایله(حکومت اتحاد)بیرینجی دونیا ساواشین(۱۹۱۸)سون چاغلاریندا ،آذربایجانین قاباقجیل ایلک گؤرکملی ایکی چؤهره سی تانینیرلار.
مجدالسلطنه بیر مقاله ده اؤزونون دوغوم یئرین “اورمو” تورک لرین مین ایللیک یوردو یازیر.
او قاجار ممالک محروسه ایمپئراتورلوغو و آذربایجاندا آزدان – چوخدان ائله همن او رولو اویناییردی کی “محمد امین رسولزاده” آرازین قوزئیینده بوینونا آلان رول اولموشدو ، بو تفاووتلا کی اورمولو مجد السلطنه سییاستچی لیکدن علاوه ، ضییالی ، قلم صاحیبی و ژورنالیست اولماق و رسولزاده تکین نیظامیچیلیغی باجارماقلا ، الینده کی سیلاحلا دؤنه لرجه تورک خالقینین حاقلارین مودافیعه چیسی ایدی و وطنین روس،کورد ، آسوری و ارمنی ایشغالچیلارینین قارشیسیندا قورویوردو.
مجد السلطنه افشار ، اورمو حوکومتینین ناییبی و بوندان اؤنجه خوی شهرینین حاکیمی اولان زامان سیاسی و نیظامی تدبیرلرینی آلماقلا، سرکئش و شوریشچی کوردلر کی باتی آذرباجاندا شهرلر و کندلره دؤنه لرجه هجوم ائدیب و چاپیردیلار هامیسینی موطیع ائدیب و الده ساخلادی.
“سولو تپه” اوپئراسییونو-نون سونوجوندا، گرچی سولو تپه دؤیوشو اورک یاندیران و آجیناجاقلی گؤرونتولری واریدی آنجاق باتی آذربایجانین خالقینین تاریخی حافیظه سینده بیر اینتیقام شکیلینده قالارغی اولموشدو. بیر اینتیقام کی۱۸۰مین آدامدان چوخ اورمو ، سالماس،خوی،ماکی،قوشچو،کؤهنه شهر ،سولدوز و باشقا شهرلرینده خیریستییانلی داشناک،و جیلولولار الیله شهید اولموشدولار.
جاماعات اینامیندان دولایی مجدالسلطنه اؤز شهر داش لارینین قیصاصین اؤزللیکله اورمو خالقینین ایکی دهشتلی سویقیریمی جیلولو و داشناک(۲۲فوریه/۲ آوگوست۱۹۱۸)قوشونلارینین توسطیله،جیلولو و داشناک لاردان آلدی و ائلیه بیلدی مال-وارلاریندان بیر بؤلومون کی داشناک و جیلولولار توسطیله چاپیلیب و اوغورلانمیشدی اونلاری قایتارسین.
آنجاق اصلینده مجدالسلطنه حربی استراتژیک عنوانیلا ، سولو تپه اوپئراسیونون گؤرمک له سیلاحلی داشناک و جیلولو قوشونلارینا سون ووروشو ووردو و اونلاری گئرییه یورومک مجبورییتینده قویدو و بو قاچیشلار تاکتیکلی گئرییه یورولمه و گلجکده اونلاری تکراری یوروشلری نین قاباغینی آلدی و نهایت قاچماق سئچه نه یینده اونلارا آغیر هزینه لی ائله دی.
گونئی آذربایجان سولو تپه دؤیوشودندن سونرا گئنیش ابعاد دا هئچ واخت ارمنی – آسوری لر هوجوموندا قرار تاپمادی.
اصلینده ژنرال “دنسترویل” ون یازیلاری اساسیندا اینگیلیزلر خیریستییانلیلارا امر ائتمیشدیلر کی عثمانلی قوشونلارین گؤلون گونئیینده یاریب اؤزلرین سایین قالایا یئتیریب و بتقاللی ، هیندلی و اینگیلیزلی لر کی اوردا یئرلشمیشدیلر اونلاردان سیلاح و مهمات الده ائدیب و یئنه ده اورمویا موراجیعت ائتسینلر تا باتی آذربایجاندا عثمانلیلارین قارشیسیندا دورسونلار.
بئله لیکله بوتون همدان و اورمو خطی اینگیلیزلیلرین الینه دوشسون بو گئدیشاتلا آذربایجانی ایکی پارچایا بؤلوب و عثمانلیلارین تبریزله باغلیلیقلارین کسسینلر و هر نه کی اؤنجه دن عثمانلیلار دوشونموشدولر بو ساده لیکله اله گتیرسینلر آنجاق سولو تپه اوپئراسیونو مجدالسلطنه باشچیلیغیلا اونلارین بوتون توخودوقلاری خریطه لرین پانبیق ائتدی.
مجدالسلطنه مقاله سینین باشلانغیجیندا خاطیرلاییر صیرف او اعتیبارلی شاعیرلره ایشاره ائده جک کی شعر و دیوانلارینی اؤزو یاخیندان گوروب اوخویوب و اونلارین اوز احوالاتلاریندان خبردار دیر همچنین تورک شاعیرلریندن یاد ائدنده (مولانا، لطفی، آصفی، آللهوئردی، امیرعلیشیر نوایی، سلطان حسین باهادیرخان ، قوسی ، طرزی و …) بو شاعیرلریده قئید ائدیر مجدالسلطنه نین تانینمیش کیتابخاناسی کی تاپیلمایان سندلر، نسخه لر ، و درگیرلردن عیبارت دیر اشیا کلکسیونو و عتیقه لری سونرالار روس ایشغالچیلار توسطیله یاغمایا گئتدی .
مجدالسلطنه ایکی قاجارلی مظفرالدین شاه-ین دیققت و حیمایه سیندن تورک شاعیرلرینه(رشید افشار اورمولو، لعلی) سؤز آچیر، بو برکیتمه مظفرالدین شاهین تورکچولویوندن اویغونلا شابیلر . قاجارلی مظفرالدین شاه مجدالسلطنه افشار اورمولو تکین قاجار ممالک محروسه و آذربایجان اینپئراتورلولوغوندا ایلک تورکچو نخبه سویلاریندان ساییلیر.
اورمولو جمشید خان افشار بکشلی-علی عزیزی