ایلین سون آیینا، یانی ایلین سازاغلی و سویوق هاوالی قایداسیندان چیخاراق یاز دونوشونه بایرام دئییریک. البتده بوردا بایرامدان آماج ایل بایرامیدیر. یوخسا بیزیم اینانج باخیمیندان مختلف بایرامیمیز وار. باخ: قوربان بایرامی، فیطیر بایرامی
بو چاغدا قایدا اوزونو ده ییشه رک انسانلار طبیعت قایداسیندا اولان قایدالار اساسیندا یئنی یاشیللیق یاشامینی قوتساللاییر.
تورکجه میزده ایلین سون آیینا یانی یاز دونوشونه بایرام آیی و یا خود بوز آیی دئییرلر. بایرام سوزجوک باخیمیندان شن لیک، بویوک لوک، قوتسال آنلامینی داشیییر. آنجاق بوز سوزجویو رنگ( خاکستری )، بیر نوع خسته لیک و تام شکیلده طبیعت و مرتع آنلامینی یئتیریر. بوز آی ترکیبی سوز آنلامیندا سونونجو معنادا ایشله نیر. باخ: آغزین بوزا وئردیک. آنجاق بو سوزجوک خسته لیک آنلامیندا بئله بیر اورنکله گلیر. گوزونه بوز گلیب. حیوانین گوزونه بوز گلنده داها بیر یانی گوره بیلمز. و بو حالدا حیوانین گوزونه یا آیران و یا خود بیر داملا تیرامایسئن دامیزدیرارلار. و بو اساسداندی دئیرلر آداما بوز بوز باخیر.
بایرام آییندا یئره نفس گلیر، جان گلیر، داغلاردان قارلار اریییر، چایلارا سو دولور، بعضا ده آغیر سئل گلیر.
بایرام آییندا یئردن قار چکیلدیکدن سونرا بیرینجی آلاق دانا داششاغی آدینا یئردن گوز آچیر. دانا داششاغی دئدییمیز آلاغین گوللری آغ رنگده اولار. اوندان سونرا نوروز گولو چیخار. نوروز گولو هم قیرمیزی و هم ایسه ماوی رنگده اولار. و بعضا ده آزاجیق آغ رنگده اولار و آغ رنگده اولان نوروز گولونه، نوروز گولونون موللاسی دئیرلر. و هر کیمسه بو رنگده نوروز گولو تاپسا شانس صاحبی اولار. عینی حالدا نوروز گولونه ارشه ماحالیندا گزگه دئیرلر. بو حالدا بعضا نوروز گولونو ائله دریلمه میش حالدا یانی آیاق اوسته بوراراق دئیرلر( دوغ دوغان دوغدور به سن نییه دوغمادین ).
نوروز گولوندن علاوه گیلوو آدیندا بیر آلاغدا اوزه چیخار. و بو آلاغی توپلایاراق خمیرین آراسینا بوکدوکدن سونرا تندیره یاپیشدیراراق پئنجه ایش چوره یی کیمین پیشیررلر. و بو چوره یه ساوالان داغینین دوره سینده یاشایان انسانلار کته دئیرلر. گیلوودان باشقا چییه لک آدیندا بیر بیتگی بیتر و بو بیتگی نین کوکون یئیرلر. بونلاردان علاوه باشقا _ باشقا آلاغلاردا گوز آچارلار. و تزه گوز آچان آلاغلارا دیشه و عینی حالدا جروو دئیرلر. مصدر فورموندا قایدا تاپان بو سوزجوکلر دیشه له مک و جروولاماق حالدا ایشله نیر. بو حالدا قویون اوتارانلار دئیرلر قویون دیشه قووالاییر. یانی حیوان قورو اوت فصیلین سویوشدوردوغدان سونرا یاشیل اوتا دونور. قویون بو چاغلاردا قیرواق اوتلار و تام شکیلده قویونلار آراسیندا قاچ ها قاچ دوشر. و بو آیلاردا قویون اوتارانلار بتر اینجی یر. بو آیدان سونرا مالیدا اوروشه چیخاردارلار و اگرسه مال تر آدیندا بیر آلاغی یئسه ایسهالا دوشر. و اگرسه بیر حئیوانین جییاری یارا اولسا و قورو اوتدان یاشیل اوتا دونه رک تر و یاشیل اوت یئسه اولمه لیدیر.
ایندیسه بایرام سوزجویونه آیید ترکیبی سوزلری بیرر _ بیرر قلمه آلیریق
توی بایرام: شن لیک، سئوینج آنلامیندا ایشله نیر. باخ _ اوره یینده توی بایرامدیر _ بایرام قاباغی _ بایرام بالیقی _ بایرام آیی _ بایرام گئجه سی _ بایرام بازاری _ بایرام گونو _ گور گوروشوک گونو _ بایرام یومورتاسی( بایرامدا ایکی جوره یومورتا بویانار بیری سوغان قابیغیلا و بیری ایسه قیرمیزی رنگله ) _ بایرام پایی _ بایراملیق _ بایرام پالتاری _ بایرام قاری( بایرامدا قارلایان قار )_ بایرام هاواسی( صاف و خوش هاوا )_ بایرام سیرفاسی _ بایرام پولویو( بایرامدا دوگو و قورو بالیق و سوتلو آش پیشیررلر ) _ بایرام گولو _ بایرام نوغولو( نقل و نبات )_ قارا بایرام( بیرینین آدامی اولسه سیرفا بزه مز و سیرفایا یالنیز خرما و حالوا قویار و گلنده یالنیز فاتیحه وئرر. و حتی بیرینین قاراسین گوتورمک اوچون بیر شئی آلاراق قاراسین گوتوررلر ).
تزه ایله خیاو شهرینین داغ کندلرینده یئنگی ایل دئیرلر. بایراما آز قالان وده یئلی اسر _ کورد اوغلو یاتار _ قورغا قوورولار _ پولوو پیشیریلر _ قولاق آسدی اولار _ قورشاق ساللادی اولار _ تزه گلینه مجمعی اوستونده پای آپارارلار و پاییندا اوستونه قیرمیزی پارچا آتارلار _ بیر قویونو بزه یه رک گلینه پای آپارارلار _ یومورتا چاققیشارلار _ یومورتانی کوله باسدیردی اوینارلار _ چیلینگ آغاجی اوینارلار _ بیر بیرینه بایراملیق وئررلر _ قبر اوستونه گئدرلر _ هامی اوشاغینا اجری پالتار آلار _ توم انسانلار تزه پالتار گئیینر _ کوسولولر باریشارلار
سو چرشنبه سی نده انسانلار خیردادان بویوگه قده ر سو اوستونه گئدرلر. قادینلار ایسه بیر تاختا چوپو اوزلریله ائوه گتیردیکدن سونرا اینام بو اساسدا اولار. موتالدا یاغ چوخالاجاق. _ یا باشقا بیر آنلامدا سو اوستونه گئده رک بولاقدان سو گوتوره رک نئهره ده قاتیقا قاتدیقدان سونرا دئیرلر برکتلی اولور. بو دبه باشقا فورمدا اردبیل شهرینده نوو اوستو دئیرلر.
یئنی ایل تحویل اولاندان سونرا یانی یئنی ایل گلدیکدن سونرا بیرینجی گوو گورولتوسونده گووه داش آتارلار. و اینانج بو اساسدا اولار هر کیمسه نین داشی نه قده ر اوجا گئتسه او قده ر برکت آلاجاق.
اود چرشنبه سینده داغدان گه ون گتیره رک اودلاییب و اوستوندن آتیلاراق آزارلیغیم _ بئزارلیغیم _ بیغیر لیغیم بوردا قالسین دئیرلر.
اود چرشنبه سینده داغدا ایکی اود( تونقال ) بیر بیریندن آرالی قالایاراق سورو قویونلاری اورتاسیندان کئچیردرلر. بونا گوراکی برکتلی اولسون.
بار وئرمه ین آغاجی کوهنه ایل بایرامیندا قورخوتسالار بار وئرر. بیری بالتا گوتوره رک دئیر کسیم. باشقاسی دئیر یوخ کسمه بار وئرر.
یئرلر شوخولانار، آرخلار آریتلانار، اکینلر اکیلر. و هر نه تزه له نر و یئره نفس گلر و ها بئله….
رحیم غلامی
