بیر گون بیزلر آذربایجان دیلینده یازیب، اوخویاجاییق
«جانیم آتام! قاراباغ ایشغال‌دان آزاد اولدوغو گون آذربایجانین دؤولت هیمنینی اوجا سسله ائوده یاییب، هئچ بیر زامان سوسمایان آتام، هیمنه حؤرمت اولاراق، الینی اورَیینه قویوب سس‌سیزجه دایان‌دی، سانکی هئچ نفس بئله آلمیر و یا دامارلارین‌دا بوتون قان دونوب دوردو؛ آخان ساده‌جه سئوینج گؤز یاشلاری ایدی. اوجا سسله، «آذربایجانین شهیدلری بیزیم شهیدلریمیز، سئوینجی سئوینجیمیز و دوشمنلری بیزیم ابدی دوشمه‌نیمیزدیر» – دئیه بوتون وارلیغی ایله فریاد ائتدی.
او امین ایدی کی، بیر گون بیزلر آذربایجان دیلینده یازیب اوخویاجاییق و صبیرسیزلیکله همین گونو گؤزله‌ییر، بیر گون بئله اومیدینی ایتیرمیردی.
آتام پرئزیدئنت اردوغانین وورغونو ایدی. آغیر خسته‌لیک اونو یاتاغا باغلاسا دا، «اردوغانی بیر گون گؤرسم یقین کی، حؤرمتینه آیاغا قالخارام و آرتیق جانیمدا هئچ بیر آغری-آزار قالماز» – دیه اؤز سئوگی‌سینی بیلدیردی. ۴۴ گونلوک وطن ساواشی دؤورون‌ده پرئزیدئنت اردوغانا خیطابن دئییردی: «سن گل، بیز ده گلریک، آزدان آز گئدر چوخ‌دان چوخ ….».
ایستر ایشده ایسترسه ده دینجلدیی واختلاردا مقاله‌لر و تحلیللر یازار، هئچ بیر زامان یورولمازدی. بوتون ووجودونو بوروموش آذربایجان و تورک میللتینه اولان سئوگی‌سی یورغونلوق و اومیدسیزلییه هئچ بیر یئر بوراخمامیش‌دی.
«شوشایا حصر اولونان یازی»سیندا تورک دونیاسینین بؤیوک لیدئری اردوغان باره‌ده یازمیش‌دی: «اردوغان دا تانرینین یاراتدیغی مخلوق‌دور، او دا خسته‌لنه، قوجالا و دونیانی ترک ائده بیلر – آنجاق اونون گئتمه‌سی باشقا بیر گئتمک اولار ….»
بو گونلر آتامین بو یازی‌سینی بیر داها اوخودوم، او همین یازی‌دا، سانکی، اردوغان اوبرازین‌دا اؤزونو تصویر ائتمیش‌دی – او اؤز ساغلام‌لیغینی بئله اؤز خالقینا، تورک میللتینه، قوربان وئردی. آتام دونیادان گئت‌سه ده تاریخ اونو اونوتمایاجاق – اونون گئتمه‌یی باشقا بیر گئتمک ایدی.
آتامین بیزه ائتدیی سون وصیتی بئله ایدی: «مزاریم اوسته آذربایجان بایراغی قویون کی، روحوم دینجلسین.
وصیتینی یئرینه یئتیردیم آتا جان! تورپاغا تاپشیریلدیغین گئجه‌نی سحره قدر گؤز یاشی تؤکه‌رک مزارین اوسته قالیب بایراغین کئشیینده دوردوم – دئدیم هئچ اولماسا بیر گئجه بئله روحون دینجلسین.
قیزین – سارای شبازی
بو سؤزلری گونئی‌لی میللی فعال، آرتیق تئهران شهری ایله بیرلشمیش کرج شهرینین ساکینی «خوجالی» لقبی ایله تانینان رحمت‌لیک «علی افسر شهبازی»نین قیزی یازیب. تأسف کی، علی افسر شهبازینی ایتیردیک. او آذربایجانا گلمه‌یه قرار وئرسه ده، خسته‌لیک اونو آیاق‌دان یاتاغا سالدی، سونوندا دا جانینی آلدی و بو ایسته‌یی اوریینده قال‌دی. او اصلن تورک میللتین‌دن اولان لاکین آسیمیله اولموش حیات یولداشینین اوریینه یئنی‌دن آذربایجان سئوگی‌سینی اویاتماق اوچون، اونو بابک قالاسی، اورمو گؤلو و آذربایجانین دیگر دیلبر گوشه‌لرینه آپاردی و سونوندا ایستیینه نایل اولدو. خوجالی بالالارینی دا، اؤزو کیمی، دؤیوشکن آذربایجان‌لی تربییه ائدیب اؤزون‌دن گله‌جه‌یه لیاقت‌لی یادیگار قوی‌دو. علی افسر شهبازی بعضیلری کیمی تانینمیش اولماسا دا اوریینده آذربایجان محببتینی بسله‌ین تئهران‌دا و اطرافین‌دا یاشایان اون مین، بلکه ده، یوز مین آذربایجان‌لی‌لاردان بیری ایدی. اونلاردان بعضیلری اورک سؤزلرینی قله‌مه آلا بیلمه‌سه ده، اورکلرین‌ده تورک دونیاسی و آذربایجان میللتین‌دن باشقا هئچ بیر سئوگی یوخ‌دور. خوجالی‌نین «تئلئگرام» سوسیال شبکه‌سینده «ایمضا (امضا) »آدلی کانالینی اگر سیاست ائنسیکلوپئ‌دییا آدلاندیرساق یانیلماریق یقین. ایللر اؤنجه قویدوقلاری پروقنوزلارین بیر چوخو آرتیق ایندی یاشادیغیمیز رئال‌لیقلاردیر.
روسییانین اوکراینا ائتدیی هوجومون ایلک گونلرین‌ده خوجالی یازیر:
- «بیلدیینیز کیمی روسلار اوکراینا میللتینی مغلوب ائتمک اوچون ان آغیر جینایتلره ال آتاجاقلار. اونلار چوخ یاخشی بیلیرلر کی، محاربه اگر اوزانارسا خاریجی اؤلکه‌لردن یاردیملار گله‌جک، دیگر طرف‌دن ده، روسییانین اقتصادیاتی ضعیفله‌مه‌سی ایله پارالئل اولاراق، حاکمیتین داخیل‌ده اولان مؤوقعیی ده ضعیف اولاجاق. اوسته‌لیک، جبهه‌ده هلاک اولان عسگرلرین جسدلری وطنه قایی‌دان‌دا آرخا جبهه‌ده سؤزون اصیل معناسین‌دا سارسینتی یاشایاجاق ….
۲. لاورووون دونیانی نووه سلاحی ایله حده‌له‌مه‌سی صیرف اولاراق موسکوانی بوروموش قورخودان ایره‌‌لی گلیر …
۳. نووه سلاحی، سؤزسوز کی، ایستیفاده اوچون یارانماییب – ایکینجی دونیا محاربه‌سینده ده آبش-دان باشقا دیگر بیر اؤلکه بو سلاحا ییه‌لنمیش اولسای‌دی یقین او دا ایستیفاده ائتمزدی …..
۴. دونیا اگر نووه سلاحین‌دان قورخسای‌دی دونیا ایندی پوتینین اولمالی ایدی – چونکی او قارشی‌سیندا دوران هر کسی، حتی کیچیک بیر سانک‌سییا تطبیق ائد‌ن اؤلکه‌نی ده، نووه سلاحی ایله هده‌له‌یه‌رک اؤز ایسته‌یینه نایل اولاجاق‌دی ….
۵. پوتین کیئوی اله کئچیرسه بئله آبش-این ویئتنام‌دا و ائسئسر-نین افقانیستان‌دا الده ائتدیین‌دن آرتیغینا نایل اولا بیلمه‌یه‌جک ….
- 6. ایندی ایران کیمی اؤلکه‌لره اؤزلرینی روسییانین تأثیرین‌دن قورتارماق اوچون تاریخی بیر فورصت یارانیب – اوزوموزه گلن ۵۰ ایلده هئچ بیر روس باش‌چی‌سی پوتینین آتدیغی سهو آددیمی بیر داها تکرار ائتمه‌یه‌جک کی، موستملکه‌لرینه ده اوندا بیر شئی چا‌سین ….»
خوجالی، تورک دونیاسینین بؤیوک لیدئری، قاراباغ ساواشی نین غالیب سرکرده‌سی، آذربایجان میللتینین فخری، پرئزیدئنت ایلهام علی‌یئو، باره‌ده بئله یازیر:
روس کشفیاتی دایانمادان گئجه-گوندوز اونا تضییق گؤسته‌ریر و هده‌له‌ییر …
– ائرمنیلر اونو باکی دیکتاتورو آدلان‌دیریرلار …
– پان ایران‌چیلار اونون پایتاختینی ایشغال ائتمک خولیاسینی بیشمیش باشلارین‌دان بیر آن بئله آتمیرلار…
– بوتؤولوک‌ده تورک دونیاسینی اؤزلرینه دوشمن سانان بعضی قونشولار ایسراییل‌له دوستلوق ائتدیینه گؤره اونا قارشی تهدید دولو مئساژلار یاغدیریر …
– قونشو اؤلکه‌لر اؤز جاسوس و دیوئرسانت قوروپلارینی ثابت‌لیگی پوزماق اوچون اونون پایتاختینا گؤندریرلر …
– پوتینین بیر گؤزو دایما اونو گودور …
– روسییانین اوکراینایا قارشی ائتدیی تجاووزده اوکراینا خالقینا تام دستک گؤسته‌ریر …
– ۴۴ گونلوک ساواشدا بیری-بیری ایله ضیدیت‌لی سیاست یورودن موسکوا، آنکارا، تئل-آویو و لوندون کیمی طرفلری اؤز خئیرینه سفربر ائتمه‌یی باجاردی ….
– او آذربایجانین پرئزیدئنتی، اولو اؤندر حیدر علی‌یئوین اوغلودور و پوتینین گوجونون نه یئرده اولدوغو هامییا بل‌لی اولان‌دان سونرا آرتیق هوجوم سیاستینه کئچه‌جک و هامیمیز بونون شاهیدی اولاجاییق…
– موخالیفت، پوتین روسییاسی، ائرمنیستان، فران‌سا، آبش و بیر چوخلاری اورکلرین‌ده اونا دوشمن‌چی‌لیک بسله‌سه‌لر ده، هامیسی اونونلا دوست اولماق و اونا تعریفلر یاغ‌دیرماق مجبوروریتین‌ده‌دیر …
فیکیرلرین آکتوالغینی نظره آلساق چوخلاری بو یازیلارین ائله بو گون قله‌مه آلینماسینی تصووور ائده بیلر. بو اؤن گؤره‌ن سویداشیمیزین اونلار بئله آؤن گؤرولری (پیش بینی-پروقنوزلاری) آرتیق ایندی شاهیدی اولدوغوموز رئال‌لیقلارا چئوریلیب. تئهران شهری و آرتیق اونون بیر حیسه‌سینه چئوریلمیش کرج کیمی شهرلرده حال-حاضردا ۱۰ میلیونا یاخین آذربایجان تورکو یاشاییر. آز قالا تبریز قدر اهالی‌سی اولان تئهرانین بعضی شهرجیکلرین‌ده آرتیق آذربایجان تورکجه‌سی عونسیت دیلی‌دیر و لازیم گلن‌ده فارسجا دانیشیرلار. تئهرانین بازاری و اونون اطرافین‌دا فعالیت گؤسته‌ره‌ن توپ‌دان ساتیش مرکزیلرین‌ده اولان ماغازالارین دا بؤیوک اکثریتی تورکلره مخصوص‌دور. ایسته‌نیلن باخیش بوجاغین‌دان باخساق تئهران دونیادا آذربایجان تورکلرینین یاشادیغی ان اؤنم‌لی شهردیر. اگر بئله‌دیرسه، اوندا گلین بیرینجی اؤنمی محض تئهرانا و همین شهرده یاشایان آذربایجان تورکلرینه وئرک. بئله اهمیت‌لی بؤلگه آذربایجانین ایسته‌نیلن معیارلا چکیلن خریطه‌سین‌دن کناردا قالمامالی‌دیر.
آلتای آوشار/ بیر گون بیزلر آذربایجان دیلینده یازیب، اوخویاجاییق
