دیکتاتورلوق گئنل اولاراق توپلومو اقتصادی، سیاسی و کولتورل بیرله شیمه آپاران سیستم لره دئییلیر. بئله بیر سیستم ایچره گوج صاحیب لری حقیقت صاحیب لری کیمی گؤرونورلر. اسکی دن گوجلولر ضعیف اولانلاری کلاسیک تابعیته محکوم ائتمک اوچون آچیق گوج مکانیزم لرینه دایاناراق قدرتلرینه قارشی توپلومدان اطاعت ایسته ییردیلر. بئله زوراکیلیق لارین دا ماهیت لری کیمی آچیق خصوصیت لری وار ایدی او جمله دن:
1-دیکتاتورلوق آنی و مقدمه سیزدی.
2- قدرت قبضه سی اصولونجا قورولمالی دیر.
3- گوج یاپیمی ، قایداسیزجا و اؤره ک ایستکلری کیمی سربست دیر.
4- توپلومسال اولاراق مخالفت ائتمک اوچون هر تورلو یول آچیق دیر.
بو سیستم لرده دولتی مالکیت، تولید ابزارلارینی، قدرت مکانیزم لرینی یاراتماق اوچون قوللانیر وایسته دیگی قدر اؤزونه خرجله ییر.
دیکتاتوری سیستم لرین یارانیب و مدرن توپلومسال قاوراملارا دایاناراق داوام ائتمه سی اوچون ان کسگین و یاخین آلت، ایدئولوژی دیر. ایدئولوژی اینسانلارا کیملیک،کرامت و اخلاق توهمی وئریر. ایدئولوژی چوخ پراگماتیسم و عین حالدا ظاهر ده دوزگون و متین دیر. ایدئولوژی بیر پرده کیمی دیر، اینسانلار ایتیرمیش یاشام ، ده یرسیز وارلیق و پوزغون دوروم لاری ایله باریشماق اوچون اونون آرخاسیندا گیزله نه بیلیرلر.
هر نقدر بیر دیکتاتور سیستمین خولاسی کیچیک اولسا بیر اوقدر دیکتاتورون اراده سی مستقیم دیر، یانی اؤز گؤردوگو ایشلری هئچ بیر ایدئولوژی واسیطه سی ایله توجیح ائتمه یه گرک یوخدور؛ قیساجا دئسک: هئچ بیر دیکتاتورلوق ایدئولوژیک توزاقلارا دایانمادان یارانیب و قالارغی اولماق ایمکانا صاحیب دئییل. اصلینده ایدئولوژی هرکسین ایشینه یارایان بیر بهانه دیر.
یاشام اؤز ذاتیندا چوخونلوق، نئچه بویالیق،یارادیجیلیق و اؤز دوغرولاماق دان عیبارت دیر. تک سؤزده؛ اوزگورلوگونه دوغرو گئتمکده دیر، حالبوکی دیکتاتور سیستمی تک بویالیق ،انحصار و اؤزو سئون بیر دوزه نی،یاراتماق ایسته ییر. بو سیستم ایچینده شخص لرین هر هانسی یئر و مقام دا اولدوغونا باخمایاراق، سیستم اونلارا هئچ بیر ده گر وئرمه دن سادجه اونلاری اؤزونون داوامینا بیر یاناجاق و آراج کیمی گؤرور. بو او دئمک دیر کی اوپورتونیست لر اوچون قدرت طلب لیک، سیستمین قارشیلیغینا گلمه دیی مدت جه ایمکانلی دیر.
دیکتاتور سیستم لر هر آددیم دا و هر زاماندا میللتی لمس ائدیر آنجاق هر دایم ایدئولوژیک الجک لره بورونموش بیر الی ایله بو ایشی گؤرور بونا گوره ده بئله بیر توپلوم دا یاشاماق یالان-دولانلارلا دولودور.
دیکتاتورلوغا معروض قالمیش اولکه لرده مینلرجه یالان دولان گؤرمک اولور، بو ایکی اوزلولوک و یالانا بورونموش سیستمین نتیجه سینده اورتاق بنزرلیک لر اورتایا چیخیب و دیکتاتورلارین بیزه اؤزلریندن وئردیک لری ایز و سیمگه لر اونلاری تانیماغا یاردیمجی اولور دئمک اولار. اؤرنک اوچون :
–بروکراتیک حاکمیتی، مردم حوکومتی کیمی تبلیغ ائتمک.
-ایشچی لری، ایشچی لر طبقه سی آدی ایله کؤله ائتمک.
-فردلری سون درجه ده آشاغیلاماغین آدینی، تام اوزگورلوک قویماق.
-اینسانلاری اطلاعات و خبر آلماق دان محروم قویماغی، «اطلاع رسانی» دئمک.
-قدرتی، میللتین آلداتماق آماجی ایله یارارلانماغی عمومی قدرت ناظیرلیگی کیمی گؤسترمک.
– کولتورلری بوغماغی، کولتورل گلیشیمی کیمی تبلیغ ائتمک.
– قوندارما گوستریشلی سئچگی لری، ان یوکسک دموکراسی سیمگه سی آدلاندیرماق.
-دوشونجه اوزگورلوگونه قاداغا قویماغی، ان علمی دونیا گوروشو کیمی گؤسترمک.
-عسگری ایشغال ائتمه یین آدینی، قارداشلیق یاردیمی قویماق.
-رژیم اؤز یالانلارینا اؤرتگو قویماق آماجی ایله هر شیی تاخما و ترسه گؤسترمک.
– کئچمیشی، ایندی نی و حتی گله جه یی تام ترسه ائتمه سی.
– آمارلاری ده گیشمه سی .
– اینسان حاقلارینا سایغی قویار کیمی اویون اویناماسی .
– دهشتلی و اؤز باشینا بویروق یاراتدیغی امنیتی دستگاهینی انکار ائتمه سی.
_ هئچ کس و هئچ شی دن قورخمور کیمی اویونا گیریش سی.
– هئچ شی یه اویون وئرمیر کیمی اویون وئرمه سی .
حبیب نگهبان