صمد بهرنگی نی “بیر هلو مین هلو” دستانی ایله تانیدیم؛
ایکی گنج دوست، ارباب تاباغیندان یئره دوشن هلونو برابرجه بؤلوب یئیندن سونرا، اونون چردیین ارباب یئری نین بیر کؤشه سینده اکیرلر.
چردک فیدان اولور. اونلار فیدانین گوجلنمه سی اوچون، “ایلان دره” سیندن بیر ایلان توتوب، آغاج کؤکونه قویلاماق ایسته ییرلر.
اما ایلان، دوسلارین بیرین چالیر.
او اؤلور.
دیری قالان کدرلی یولداش دا، او یورد دا قالابیلمه ییب، کؤجور، گئدیر؛
فیدان اربابا قالیر.
فیدان گئتدیکجه بؤیوک بیر آغاجا دؤنور….
اما اربابین قوجا باغبانی هر نه ائدیر، آغاج میوه وئرمه ییر.
او آغاج اؤزونو اربابین یوخ، ایکی گنج اوغلانین آغاجی بیلیر، ایسته میر او ایکی فقیر اوغلانین یئرینه، اربابا میوه وئرسین….
بو دستانی اوخویان زامان، چوخ گنج ایدیم، او ایکی گنج یولداش کیمی.
اوخویوب، ائتگی لندیم، آغلادیم، دوشوندوم…
صمدعمی نین یاساقلانمیش اثرلرین بیر به بیر تاپیب، اوخودوم.
اونلارلا یاشادیم.
او قدر کی “بالاجا قارا بالیغین” یاشامی، منیم یاشام یونتمیم اولدو..
ایندی ده کی ایندی دی، صمد عمی منیم چوخ سئودیییم قهرمان یازارلاردان دیر.
آما منیم ساغ دوشونجه م “صمد عمی” نین سول و سوسیالیست دوشونجه سیندن فرقلی ایدی.
عینی حالدا من لیبرال دموکراسی نی میللتیم اوچون داها اویغون گؤردوم.
من بیلدیییم قَدَر صمد عمی میللیتچی یا تورکچو ساییلمازدی.
میللیتچی لیک و تورکچولوک، منیم یولومون تمَل دوشونجه لری ساییلیر.
سونوج بو اولدو کی صمد عمی نی سئودییم، یاشام یونتمی، منیم یاشام یؤنتمیم اولدو.
آما دوشونجه لریم چوخ فرقلی یؤنده فورمالاشدی.
من اؤیرندیم کی اولا بیلر چئشیدلی دوشونجه لریمیز اولسون اما عینی حالدا سئویب سئویلک.
سونوندا باغمسیزلیغا چاتاندان سونرا، هامی میز میللتیمیزین ایستَک و اراده سینه، باش ایمه لییک ، میللی اراده یه تابع اولمالییق…
یاشاسین میللتیمیز.
440
