«عاباس لیسانی»-نین موباریزه ایل‌لرینین ۴-ونجو اون ایللییینه، قیسا بیر باخیشدا:
1⃣ نئچه ایل میللی چالیشماقدان سونرا ایلک دؤنه، ۱۳۷۶-ینجی ایلده، اردبیل شهرینین گوونلیک (اطلاعات) اداره‌سی طرفیندن سورغولاماغا چاغیریلیر. اورایا گئتدیکدن سونرا هئچ بیر سورغو-سوالا (بازجویی) یازیلی اولاراق یانیت وئرمه‌دییی اوچون (بو توتوم هله دیرکی داوامی وار) دیندیرمن‌لرله (بازجو) ۸ ساعات‌لیق دارتیشما و دیدیشمه‌لر یارانیر، و هده‌لمه‌لردن (تهدید) سونرا سربست بوراخیلیر.
2⃣ ۱۳۸۱-ده اردبیل شهرینین گوونلیک ادارهسینین خبر آگئنتلیک «ستاد خبری» بؤلومو طرفیندن تلفون‌لا چاغیریلیر. آنجاق تلفون‌لو چاغریشین حقوق و قانون‌لارا ضید اولدوغو اوچون اوردا حضور تاپمایاراق، محکمه طرفیندن رسمی مکتوب‌لا چاغیریلماسینی وورغولاییر. بونونلا بئله رسمی چاغریش‌لا حضور تاپدیقدا بئله بیر هده‌لمه ایله اوزله شیر؛
دوسییا (پرونده) آغیرلاشیب‌دیر، چالیشماقلارینی در حال دوردورماسان محکمه‌یه گؤندره‌جه‌ییک و…، و نهایت نئچه ساهات‌لیق دانیشیقدان سونرا سربست بوراخیلیر. او هده‌لمه‌لره رغمن، او ایلی بابک قالاسیندا، اردبیل توپلانتی‌سی اولاراق، عباس لیسانی-نین اشتراکی ایله، منظم و گئنیش بیر میللی تؤره‌ن کئچیریلیر.
همن ایلده، داها گئنیش چالیشمالار و ییغیناجاق‌لار قورولور، اؤزللیکله آلتی‌مین تیراژدا تورکجه گون‌سایار (تقویم) باسیلیر و چوخلو شهرلرده یاییلماقدان سونرا، گوونلیک قووه‌لری، عباس لسانی-نین ایش یئری یعنی، “چنلی بئل” اَت توکانی و هابئله ائوینه هجوم ائتدیکده، ۶۰۰ تیراژدا ایل‌سایار و چوخلو سایدا کیتاب آپاریرلار. آنجاق، اؤزونو توتوقلاماییرلار. بونونلا بئله آرا وئریلمه‌دن ۳۰۰۰ تیراژدا همن ایل سایارلار یئنیدن باسیلیب و یاییملانیر.
3⃣ ۱۳۸۲-جی ایلینین گولن آییندا (اردیبهشت) داها بیر رسمی چاغیری ایلا، گوونلیک ادارهسینین خبر آگئنتلی‌‌لیینه گئدیر. ۴ ساعات یاخینلیغینا سورن دارتیشما سونو هده‌له‌ییرلر کی: یئنه بابک قالاسینا گئدیب و مراسیم قورارسیزسا سیزه چوخا باخاجاق و… سربست بوراخیلیر. اوردا کئچیریلن دانیشیق‌لار و اونونلا برابر بابک قالاسی توپلانتی‌سی حاقدا، داها سونرالار ۱۳۸۴-جی ایلین قیروو آیی‌نین (آبان) ۷-سینده، زنجان بیلیم‌یوردوندا نشر اولان “قیزیل اوزن” آدلی هفته‌لیک درگیسینین اؤزل سایی‌سیندا عباس بی، «گئدرسن بویووا باخاریق» عنوان‌لی یازیدا او مساله‌لری آچیقلاییر.
اوردا کئچیریلن دانیشیقدا، عباس بی هده‌لمه‌لر قارشیسیندا دئییر: «هئچ کیمسه منی بابک قالاسینا گئتمکدن دودورا بیلمز»، بو سؤز قارشیلیغیندا دیندیرمن‌لر دئییرلر: «گئدرسن بویووا باخاریق»، عباس بی‌ده داها وورغولاییر: «گئدرم الیزدن گلنی ائدرسیز». بوتون بو باسغی‌لارا رغمن، او ایل بابک قورولتاییندا اَن گوجلو مراسم‌لردن بیری یارانیر. نئچه هفته‌دن سونرا ایسه امنیتی گوجلر، عباس بی لیسانی‌نین ایش یئری و ائوینه تؤکولرک اونو توتوقلاییرلار.
او چاغ بیر هفته عرضینده، گوونلیک ادارهسینین تک‌‌کامئرالی اوتاغیندا (انفرادی) آجلیق ائیلمینه (اعتصاب غذا) کئچیر و اردبیل حبس خاناسینا (زندان) گؤنده‌ریلیر. نهایت بیر آی حبس اولدوقدان سونرا وثیقه گیروو قارشیلیغیندا موقتی اولاراق، آزادلیغا بوراخیلیر. عباس بی ”بو دوسیادا ایران سیستمینین علیه‌ینه تبلیغات آپارماق (تبلیغ علیه نظام) ایله سوچلاندیریلیب بیر ایل محبوس اولماغا محکوم اولونور.
4⃣ ایشغالچی ارمنی دؤولتی، آذربایجان جمهوریتی‌نین توپراقلارینی ایشغال ائدیب دینج ساکین لرینی وحشیجهسینه اؤلدوروب و خوجالیدا سوی‌قیریم یاپمیش‌دیرلار، ائله اونا گؤره‌ده، عباس لیسانی باشقا میللی فعال‌لارلا برابر، ارمنستان دؤولت هیئتی‌نین ۱۳۸۳-ونجو ایلده اردبیل شهرینه آیاق باسدیقلارینا قارشی اعتراض اولاراق «چشمه‌باشی» مچیدینده توپلاشیب تحصن ائدیرلر. مچیدده اولان بو دینج توپلانتی، امنیتی گوجلری طرفیندن وحشیجه هجوما معروض قالیر و میللی فعال‌لار دؤیولورلر. عباس بی و باشقا فعال لار توتوقلانیرلار. عباس بی‌دن سونرا باشقا فعال‌لار آزادلیغا بوراخیلیر و عباس بی ۱ آی تک کامئرالی اوتاقدا ساخلانیلیر و ۲۰ گون آجلیق آکسیاسیندا اولور. ۱ آیلیق حبس ائدیلدیکدن سونرا، وثیقه گیروولوغو قارشیسیندا موقتی اولاراق آزادلیغا بوراخیلیر. ”بو دوسیادا یئنه ایران سیستم علیه‌ینه تبلیغات آپارماق (تبلیغ علیه نظام) سوچلاما ایله، ۱ ایل محبوس ائدیلمک جزاسی ایله سونوجلانیر.“
عابباس بی همن ایل میللی سردار ستارخان‌ین مزاری اوستده کئچیریلن مراسیمده ایشتراک ائدیب و چیخیش ائدیر.
5⃣ ۱۳۸۴-جو ایلده بابک قورولتاییندا اشتراک ائتدیکده کلیبرده توتوقلانیب و اهر زندان‌ینا گؤندریلیر او عرفه‌ده ۱۱ گون آجلیق ائیلمینه کئچیر. سونوندا وثیقه گیروولوغو قارشیسیندا موقتی اولاراق آزادلیغا بوراخیلیر. ائله او آندا ایسه، میللی و مدنی اکتیولر طرفیندن او جومله‌دن رحمتلیک‌لر؛ امانی، بخت آور، آشیق قافار و هابئله سعید بی متین پور و… – لرین قارشیلاماغی ایله بیرگه بابک قالاسینا دوغرو چیخیلیب و اورادا گوجلو چیخیش‌لار اولور.
عابباس بی”بو دوسیادا ایران سیستم علیه‌ینه تبلیغات آپارماق سوچ عنوانی ایله ۱ ایل حبس جزاسینا محکوم ائدیلیر.
هابئله مرداد آییندا تبریز شهرینین باقرخان مزاری اوسته قورولان تؤرنده چیخیش حالیندا اولارکن یوزلرجه مامورلارین هوجومونا معروض قالاراق توتوقلانیب و بیر گئجه تبریزین گوونلیک اداره‌سینده و یاریم گونده تبریز حبس خاناسیندا ساخلاندیقدان سونرا وثیقه گیروو قارشیلیغیندا آزادلیغا بوراخیلیر.
سونرا آبان آییندا چوخ تعدادلی میللی فعاللارین قاتیلیمی ایلا تهرانین ری شهرینده ستارخان مزاری اوسته مراسم کئچیریلیر و عابباس بی اورداکی چیخیشی‌نین بیر بؤلومونده اعلام ائدیرکی اگر بابک قالاسی‌نین اؤنو آلینیرسا بو میللت سس‌لرینی خیاوان‌لاردا سسلندیریب دونیایا چاتدیراجاق و ماراقلی اولان او ایدی کی ۶ آی سونرا آذربایجان‌ین ۳۰-دان آرتیق شهرینده خرداد قیامی باش توتور.
اولوتورک دئدیگی کیمی:
«داوام ائدیر اوتوز یئددی،
داها کسگین داها جیددی»
بوتون باسغی، هده لر و حبس‌لر داوام ائدیردی، آنجاق بونلارا باخمایاراق عابباس بی دیرنیب میللی یولدا الیندن گلنی اسیرگه‌میردی. او همن ایلین بهمن آییندا، تبریزین وادی رحمت قبریستان‌لیغیندا رحمتلیک دوکتور محمد علی فرزانه-نین تورپاغا تاپشیراماق تؤره‌نینده اشتراک ائدرک، چیخیش ائدیر.
6⃣ ۱۳۸۵-جی ایلین خرداد قیام‌یندا آتشین نطق‌لری ایله آکسیانین اؤن سیراسیندا اولوب او دینج توپلانتی‌دا اشتراک ائتدیگی اوچون توتوقلانیب و یئنه‌ده ایران سیستم علیه‌ینه تبلیغات آپارماق، توپلوم ذهنیت‌لرینی قاریشدیرماق، (تشویش اذهان عمومی) و ایران میللی گوونلیک علیه‌ینه توپلانیب تشبث گؤسترمه‌یه جان آتماق (اجتماع و تبانی علیه امنیت ملی) سوچ عنوانلاری ایله اوزلشیر. او ”بو دوسییادا، ایلکین محکمه‌ده ۱۶ آی حبس و ۵۰ ضربه قامچی‌لانما ایله (شلاق) جزالاندیریلیر. آنجاق عالی محکمه‌ده او جزا آرتیریلیر و ۳۰ آی حبس و قامچی‌لانما ایله دییشیر. او بو جزانی اردبیل، اهر و یزد حبس‌خانالاریندا کئچیریر و موختلف حقوقی تضییق‌لره اعتراض ائتمک اوچون دؤنه‌لرجه آجلیق ائیلمینه کئچیر.“
7⃣ ۱۳۸۸-جی ایلده آغیر تهدیدلرله بئله سولدوز شهیدلرینین مزاری اوسته اولوب و چیخیش ائدیر.
ائله او ایلین شهریور آییندا، اردبیل شهریندن اولان تورک دیلی و تاریخی اوزره آراشدیرمان و یازار، رحمتلیک عادل ارشادی‌فر-ین تورپاغا تاپشیرماسیندا چیخیش ائدیر.
داها نئچه آی سونراسی رحمتلیک چنگیز بخت‌آور-ین تورپاغا تاپشیرما تؤرنینده چیخیشدان سونرا تبریز-ین مارالان قبیریستان‌یندا بسیج و انتظامی قووه‌لری طرفیندن وحشیجهسینه دؤیولور و اونون آردینجا امنیتی گوجلر طرفیندن اونو اؤلومله هده‌له‌ییب ، تبریزدن درحال چیخماسی ایسته‌ییرلر.
8⃣ ۱۳۸۹ ایلینده، اردبیل چیخاجاغیندا، قهرمان سولدوز شهرینین شهیدلر آنیم مراسم‌ینه گئدرکن بیر نئچه باشقا میللی و مدنی فعال‌لارلا بیرگه توتولوب و تؤرنه چاتا بیلمه‌سینلر دئیه آخشامادک ساخلانیلیرلار. او گونو امنیتی گوجلره دئییر: «بیلمه‌دیم بو قدر بیزیم سولدوز-ا گئتمگیمیز و شهیدلرین آغیرلاماسیندا اولماغیمیزدان وحشتیز وارمیش، یوخسا ائله گئدردیم روحوزون خبری اولمازدی و گلن ایل گئده‌جه‌یم و توتا بیلمه‌یه‌جکسیز.»، بو سؤزو ائشیدن دیندیرمن‌‌لرین بیریسی دئییر: «قوش اولوب اوچاسان قویماریق گئده‌سن»
9⃣ ۱۳۹۰ ایلینده اوچ استان‌ین گوونلیک قووه‌لری، هفته‌‌لرجه عباس لسانی-نی موختلف یئرلرده آختاریرلار و حتی بیر سیرا میللتچی‌لرین او جومله‌دن رحمتلیک حسن بی دمیرچی-نین ائوینه آختاریش اوچون هجوم ائدیرلر، آنجاق اللری هر یئردن اوزولور. نهایت سانکی قوش اولوب اوچوب دئیه سولدوز شهیدلرینین مزاری اوسته و مچیدده قورولان تؤرنده اشتراک ائدیر. تؤرن بیتدیکدن سونرا قاییت باشی بیر اتوبوس میللی و مدنی فعال‌لارلا برابر اورمو-نون ترمینال‌یندا یاخالاناراق، پلیس گوونلیک قووه‌سینین دوققوز پیلله آدلی تجریدخاناسینا (بازداشتگاه) گؤتورولور و نهایت گئجه یاریسی هامی‌نی بوراخیرلار.
همن ایلی باسقی‌لارین داوامینا رغمن، ساوالان-دا بؤیوک بیر ییغیناجاغین قورولوشوندا رولو اولاراق، او دینج توپلانتی‌دا سایسیزجا گوونلیک قووه‌لری بیله اشتراک ائتمیش‌دیلر و هر تورلو آذربایجان سسینی بوغماغا جان آتیردیلار، آنجاق میللی فعال‌لار و عباس لسانی-نین چیخیشی اونلاری گئری چکیلمه‌یه مجبور ائتمیش‌دیر.
داها سونرا ایسه شهریور آییندا اورمو گؤلونون قورودولماغینا اعتراض اوچون اردبیل-ده چاغیریش وئرمه‌یه گؤره توتوقلانیب و ۲ آی گوونلیک ادارهسینین تک کامئرالی اوتاغیندا ساخلانیلیب، ۱۷ گون آجلیق ائیلمی کئچیریر و سونرا وثیقه گیروولوغو قارشیسیندا موقتی اولاراق آزادلیغا بوراخیلیر. عباس بی-ه دوزه‌دیلن ”بو دوسیا ایسه ۱ ایل حبس جزاسی ایله سونوجلانیر و اونو اردبیل و شیراز حبس خانالاریندا حبس ائدیرلر.“
0⃣1⃣ ۱۳۹۱ ایلینین مهر آییندا، رحمتلیک ابراهیم جعفرزاده-نین ایل دؤنومو مراسم‌ینده اشتراک ائتمک اوچون خوی یولوندا باشقا ۱۱ میللی فعال‌لارلا برابر ساخلانیلیر و ۳ گون توتوقلاندیقدان سونرا وثیقه قارشیلیغیندا سربست بوراخیلیر. ”بو دوسییادا بوتون دوستلاریلا بیرگه سوچلامالاردان تبرئه اولور“
1⃣1⃣ ۱۳۹۱ ایلینین آبان آییندا، خیاولی رحمتلیک گنج میللتچی، فرهاد سروناز-ین تورپاغا تاپشیرما تؤرنینده چیخیش ائدیر.
2⃣1⃣ اهر شهرینده، دونیا آنادیلی گونو عزیزلمه تؤرنینده اشتراک و چیخیش ائدیر. آنجاق تؤرنین سون آنلاریندا، او دینج توپلانتی مکانی، امنیتی و انتظامی گوجلر طرفیندن هجوما معروض قالیر و بوتون اشتراکچی‌لار یاخالانیر. گئجه‌سی باشقا ۶ میللی و مدنی فعال‌لارلا برابر، اونلاری اهر حبس خاناسیندان تبریزین لشگر عاشورا آدلی تجریدخاناسینا آپاریرلار. اونلار قانون دیشی توتوقلاماغا اعتراض اوچون آجلیق ائیلمی کئچیردرک نهایت ۷ گوندن سونرا اهر حبس خاناسینا قایتاریلیرلار. و اورادادا ۷ گوندن سونرا موقتی اولاراق سربست بوراخیلیر. ”بو دوسییا ایسه میللی تهلوکه‌سیزلییه قارشی قوروپ و اؤرگوت‌لرین فورمالاشدیرما (تشکیل گروه و دستجات علیه امنیت ملی) سوچ عنوانی ایله تشکیل تاپیر و نهایت ۱۳۹۵-جی ایلده برائت‌له سونوجلانیر.“
3⃣1⃣ ۱۳۹۴-جی ایلین قیروو (آبان) آیی‌نین ۸-ینده تلویزیو‌نون ایکینجی کانال‌یندا اولان «فتیله» آدلی اوشاق پروگرامی، تورک‌لره اییرنج و آشاغیلاما وئرلیشینده بولوندو و اونا قارشی اولاراق آذربایجان‌ین چئشیدلی شهرلرینده اعتراض آکسیالاری (اعتراضات خیابانی) کئچیریلدی. عباس لسانی، او عرفه‌ده اورمو گؤلونون قورودولماسینا اعتراض‌دا بولوندوغو اوچون اردبیل حبس‌خاناسیندا محبوس‌ا‌یدی. او فتیله پروگرامینا اعتراض ائتمک اوچون آجلیق ائیلمینه کئچه‌رک تلفون واسیطه‌سی ایله آذربایجان میللت‌ینه آیری‌سئچگیلیک‌لر و ظلم‌لر قارشیسیندا دیرنمک و دایانماغی وورغولاماقلا او آلچالدیجی وئرلیشی محکوم ائتمکله سس دویورور. او اوزدن گوونلیک قووه‌لری اونون حبس‌ین داوامینی شیراز حبس‌خاناسیندا کئچیرمه‌یه قرار وئریب اونو عادل‌آباد حبس‌خاناسینا گؤتورورلر.
4⃣1⃣ عابباس بی ۱۳۹۶-جی ایلینده، خیاو محکمه‌سی طرفیندن ایران سیستم علیه‌ینه تبلیغات آپارماق سوچ ایشی تؤره‌تدییی اوچون چاغریلیلیر. بو چاغریش، خیاو شهرینده آیدین ذاکر-ین توی شنلیگینده ایفاده ائتدیگی دانیشیق اوزره باش توتموش و بئله‌لیکله لسانی جنابلاری اوچ گون خیاو حبس خاناسیندا ساخلانیلیب و دوسییانین تکمیللشمه‌سی بیته‌نه قدر وثیقه گیروولوغو قارشیلیغیندا موقتی اولاراق آزادلیغا بوراخیلیر. ”بو دوسییا ایسه اردبیل آپئلیاسیا محکمه‌سی (دادگاه تجدیدنظر اردبیل) طرفیندن برائت حکم ایله باغلانیلیر.‘‘
5⃣1⃣عابباس بی ۱۳۹۷-جی ایلینین تیر آیی‌نین اون‌بیرینده ایش یئرینده توتوقلانیب و تبریزین گوونلیک اداره‌سینه گؤندریلیر. بو توتوقلامالار ایسه بابک قالاسینداکی قورولتایی یئنیدن دیرچلتمک اوچون حاضیرلیق و تدبیرلر گؤرولدویو اوچون باش توموش دور کی او ایلده چئشیدلی شهرلرده بیر چوخ میللی و مدنی فعال‌لار یاخالاندیلار. نهایت لسانی جنابلاری ۱۲ گوندن سونرا وثیقه گیروولوغو قارشیلیغیندا موقتی اولاراق بوراخیلیر.
عابباس بی ”۱۳۹۶-جی ایلده، تبریزده تانینمیش موزیسین و مدنی فعالی، رحمتلیک حسن دمیرچی-نین تورپاغا تاپشیرماق تؤره‌نینده کی گوجلو چیخیشی و ایفاده‌‌لری، میللی حرکت‌ده روح و انرژی یوکسک‌لییینه ندن اولدوغو اوچون گوونلیک قووه‌لری محکمه واسیطه‌سیله بو دؤنه ایران دؤولت علیه‌ینه تبلیغات آپارماق سوچ عنوانی ایله کیمی ۱۰ آی حبس اولونماسینا قرار وئریرلر.
حؤکمون اجرا ائدیلمه‌سینه گؤره گوونلیک قووه‌لری چیلله آییندا عباس لسانی-نی ایش یئریندن ائوینه گئدرکن یاخالاییرلار. آنجاق حؤکم عابباس لیسانی-نین محکمه‌ده حضور تاپمادیغی سوره‌ده وئریلدیگیندن دولایی، قانون لایحه اعتراضی ایله دایاندیریلیر کی دوسیایا یئنیدن باخیلسین. دوسیانین یئنیدن نظردن کئچیرمه زامانی آیین ۲۵-ده ایدی. لسانی جنابلاری تبریز محکمه‌سینی ترک ائتدیگی آندا گوونلیک قووه‌لری طرفیندن توتوقلانیر، سبب ایسه باشقا دوسییا تشکیل تاپماسی ایدی. او اردبیل‌ین گووونلیک اداره‌سینه گؤتورولور.
۱۰ آی حبس جزاسی اجرا اولدوغو حالدا یئنی تشکیل تاپان دوسیادا انسان‌لاری محاربه‌یه سؤوق ائدیب اونلاری ساواشا قیجیقلاندیرماق (تحریک و تشویق مردم برای جنگ)، میللی تهلوکه‌سیزلییه قارشی گاماج آدلی قوروپو یارادیب و اؤیه اولاراق یؤنتمک (تشکیل، اداره و عضویت در گروه ضد امنیت ملی گاماج) و ایران دؤولتی علیه‌ینه تبلیغات آپارماق (تبلیغ علیه نظام) سوچ عنوانلاری ایله، ایلکین محکمه‌ده ۸ ایل حبس جزاسی و ۲ ایل یزد شهرینه سورگون ائدیلمه قراری وئریلیر. سونرا اردبیل محکمه‌سینین آپئلیاسیانین بیرینجی شعبه‌سی (شعبه یک تجدیدنظر دادگاه اردبیل) حبس جزاسینی ۱۵ ایله قدر آرتیریر آنجاق بو قانون‌سوز محکمه قراری ۲ ایل‌دن سونرا، عالی محکمه طرفیندن یئنیدن گؤزدن کئچیریلیر و ایلکین حؤکم یانی ۸ ایل حبس جزاسی و ۲ ایل سورگون حیاتی تصدیق اولونور.
♦️ اولوس‌لار آراسی عفو اؤرگوتو (سازمان عفو بین‌المللی) عباس لسانی-نی اوزون بیر سوره‌ده تورکلرین حقوق‌لارینی ساووندوغونو وورغولاییر.
♦️ آرتیرماق گره‌کیر عباس لسانی-نین سیاسی موبارزه‌‌لرینین یانیندا، ادبیات و کولتور ساحه‌سینده بیله چالیشمیش‌دیر. اؤرنک اوچون دئمک اولار او “گؤیرچین” درنه‌یینین (انجمن) قوروجولاریندان بیریسی ایدی. و ۱۳۸۰-جی ایلده، اونون چالیشمالاری اساسیندا گوونلیک قووه‌لرینین مخالفتینه باخمایاراق رحمتلیک دوکتور حسین محمدزاده صدیق (دوزگون) اوچون اردبیل-ین فدک آدلی مدنیت و اینجه‌صنعت زالیندا (مجتمع فرهنگی هنری فدک) آغیرلاما تؤرنی تشکیل ائدیرلر. گؤیرچین درنه‌یینده اَن آزی هفته‌ده بیر گون شعر آخشامی و ادبیات-تاریخ ساحه‌سینده علمی مباحثه‌لر و آراشدیرمالار گئدیردی. او درنک بیر ایل یاریمدان فعالیت‌دن سونرا، گوونلیک قوه‌لری طرفیندن باغلانیلیر. آنجاق او باسقی یالنیز درنه‌یه عایید دئییل. قارانلیق قووه‌لری عباس لسانی-نین ایش یئری اولان چنلی‌بئل و ائوینه بیله هجوم چکدیلر. نییه کی او یئرلر آذربایجان‌ین اوجاق یئرلریندن ساییلیردی. او یئرلر سایسیزجا آذربایجان فعال‌لارینین گؤروش و دوشونجه آلیش وئریش مرکزینه دؤنموشدو.
♦️ ۱۳۹۶-جی ایلده عباس بی لسانی حاقدا “اؤزگورلوک هارایی” آدلی ۴۰۰ صحیفه‌لیک الکترونیکی کتاب چیخیشینا دایاناراق سیاسی و فرهنگی چالیشمالاری‌نین باشقا یؤنلریندن، او جومله‌دن؛ “دده قورقورد” بویلاری‌نین اوستالیق‌لا نظمه چکیب و اونلارجا شعیر، مقاله و یازیلارا امضا آتماغینی، چئشیدلی زامان‌لاردا رادیو و تلویزیون خبر آژانس‌لاریلا مصاحبه ائتمک، محکمه‌لرده حقوقی ساوونما (دفاعیه) و اعتراض بلگه‌لری و اؤزللیکله تورکجه‌ده یازماق، موختلف دوستاق‌لاردان آچیق مکتوب‌لار یازماق و… لری، وورغولاماق اولار.
