تخمینی اولاراق 1382-جی ایلینده توحید، آتاسی ایله برابر گلدیلر بیزیم مکتبه(آموزشگاه موسیقی روشن) و آتاسی مندن ایسته دی کی، توحیده باغلاما اؤیردم. دئدیم «اباذر» قارداش من باغلاما اؤیرتمه میشم بلکه باشقا باغلاما معللیمی اولان دوستلار ایله باشلاسین. اباذر بَی دئدیلرکی، توحید سیزی چوخ ایسته ییر سیزدن اؤیرنمه یی داها یاخشی اولار. بئله لیکله ده بیر نئچه آی منیمله مشقول اولاندان سونرا بئله قرارا گلدیک کی، اوستاد نوید مثمرله داوام ائلهمه سی داها اویغون اولا بیلر و بئله ده اولدو.
توحید یوخاری بیر استعدادا مالیک اولدوغوندان، چوخ آز زامان ایچریسینده پارلادی و اوستادی نوید مثمرین تورکمان آدلی قروپونون بیر عوضوو اولاراق فعالییت گؤستریب و دفه لرله کنسرتلرده ایشتراک ائتمیشدیر. توحید تک بونا ایکتیفا ائتمدی تبریز یونووئرستئتینده عمران مهندیسلیک اوزره درسینی بیتیرندن سونرا آذربایجان جمهورییتینده ملی کنسرواتوریادا خالق چالقی آلتلری (ساز اختصاصی) اوزره تحصیله باشلادی هم ده آز زامان ایچریسنده آذربایجانین تانینمیش و اونلو خواننده لریله ایش بیرلییی قورماغی باجاردی.
«توحید»ین پئرفورمانسی اونون بیر یارادیجی انسان اولدوغونو هر کسه آندیریر. او 20 ایلدن آز بو صنعتده اولدو آنجاق، بو آز زامان ایچریسینده چوخ بویوک تاثیرلر اولدو. «توحید» تک موسیقی دئییل، بلکه اجتماعی گؤروشو اوجوملدن، دونیایا، طبیعته، انسانلارا باخیشی و مناسبتی اؤزو، انسانلاری دوشوندورمه یه مجبور ائدیردی. اونون ایز بوراخدیقی ایشلردن بیری ده طبیعته اولان سئوگیسیدیر کی، تک باشینا 40 مینه یاخین آغاج اکمیشدیر. اینانیرام کی بو ایش اولکه میزده خصوصی ایله ده گنج نسیل آراسیندا بیر عادته چئوریلیب دوام ائدجک و «توحید» آدی، هر یئرده دیللر ازبری اولاجاق.
عزیز دوستلار: «توحید»ین واختسیز اؤلومو سؤزسوزکی، هر بیریمیزین اوره یینه بیر داغ چکدی آنجاق، عزیز دوستلاریمیزا، هانسی کی، دفن مراسیمینده اونون ایسته یینی یئرینه یئتیریب اونا و اونون صنعتینه لاییق بیر موسیقیلی یاس تؤرنی تشکیل ائله دیرلر، درین تشککورومو بیلدیریرم. حقیقتن ده بیر موسیقیچییه لاییق دفن مراسیمی بو دئمکدیر. من «توحید»ین واختسیز اؤلومو ایله باغلی خالقیمیرا، صنعتچیلریمیزه، ادبیاتچیلاریمیزا خصوصیله ده حورمتلی عائله سینه باش ساغلیغی ایله برابر صبر دیله ییرم. یولو داواملی اولسون.
حورمتله: چنگیز مهدیپور
