فضل‌الله نعیمی و حروفیه حاققیندا نُت‌لار/3
آنجاق ۸۲۶ ه.ق ایلینده تبریزده یاییلان وبا نتیجه‌سینده فاطمه خاتوندان باشقا بوتون اوشاق‌لار تلف اولموش‌لار.
فاطمه خاتون ادّعا اولوندوغو کیمی عمادالدین نسیمی ایله دئییل، فضل‌الله نعیمی‌‌دن سونراکی خلیفه، علی‌العلاء ایله ائولنمیشدیر. علی‌العلاء حروفی مفکوره‌سی‌نین اساس یارادیجیسی حساب‌لانیر و او طریقتی آنادولودان یایان شخصدیر. اونون ۸۲۲ ه.ق ایلینده تبریزده حروفی قتل‌و‌عامی زامانی اؤلدویو مشخص‌دیر. نعیمی‌نین چوخ سایی‌دا اثری وار. «عرش‌نامه» مشهور اثری‌دیر. البته بو کتابین علی‌العلاءیا عائد اولماسی دا ادّعا اولونوبدور. البته سونرالار تورکیه‌ده و انگلستاندا باشقا نسخه‌لری تاپیلدیقدا و نعیمی‌نین آدی او اثرلرده قید اولدوقدا، مشخص اولوبدور کی، بو کتاب نعیمی‌یه عائددیر.
«جاوید نامه» ۷۸۸ ه.ق ایلینده یازدیغی اثردیر. آنجاق اؤزو ۷۹۶ ه.ق ده شاماخی‌دا اولارکن قورتاردیغینی قید ائدیب. بئش نسخه‌سی تورکیه‌ده و ایکی نسخه‌سی ایسه انگلستاندا ساخلانیلیر. بئله‌لیک‌له یئددی ال‌یازماسی موجوددور.
«محبّت‌نامه» باشقا اثری‌دیر. ایکیسی فرانسه‌ده، بیری تورکیه‌ده و بیریسی ایسه مصرده ساخلانیلیر. ۴ نسخه موجوددور.
«نوم نامه»: اوچ نسخه‌سی تورکیه‌ده، بیری انگلستاندا موجوددور.
«نعیمی دیوانی»: بو دیوانین ایکی نسخه‌سی قالیب و هر ایکی نسخه ده تورکیه‌ده «علی امیری» کتابخاناسیندا ساخلانیلیر. دیوانداکی شعرلر نعیمی تخلص‌لو ایله یازیلسا دا شعرلرین حروفیلیک‌له علاقه‌سی یوخدور و «وحدت وجود»دان بحث ائدیلمه‌سی آیدین‌دیر. دیواندا ۳۱ غزل، ۵ قطعه، ۲۵ رباعی، ۷ تک‌بیت و ۲ ترجیع ییر آلیر.
نعیمی‌نین آدی معلوم اولمایان «فقه» کتابینی مظفرالدین‌لر حکمداری عزّالدین شاه شجاعا اتحاف ائتدییی معلوم اولوبدور. آنجاق بو اثر، بو گونه قدر تاپیلماییب‌دیر.
«وصیت‌نامه» آدلی کتابی، باکی‌دا زنداندا اولان زامان یازیلیب‌دیر. بو اثردن اوچ نسخه الده‌دیر. ایکی نسخه «علی امیری» کتابخاناسیندا و او بیریسی ده استانبول یونیورسیته‌سی‌نین کتابخاناسیندا موجوددور.
فضل‌الله نعیمی و حروفیه حاققیندا نُت‌لار/3
شاهین مرادی