کوهول سوزجویو اصلینده داغدان اولان، داشلارین آلتیندا درین بیر سیغینجاق یئری دئمه لییک. کوهول ایسترسه داشدان و ایسترسه تورپاقدان قایریلان دئشیک آنلامیندا اولا بیلیر. کوهول قویون ساخلانیلان یئر، آغیل آنلامیندادا یئر تاپیر. عینی حالدا کوهول سوزجویو باشقا دئییم لر اساسیندا کویول و کاها دئییمینده ده سویله نیر.
بو قایدادا قوتور سویونا یاخین نئچه دنه کوهولدن آد اپاریریق.
۱.فرض آلی کوهولو: بو کوهول شاتیر گونبز کندیله قوتور سویو آراسیندا، درین بیر دره نین سینه سینده یئرله شن بیر کوهولدور. اوتن چاغدا قیش فصیلینین اورتالاریندا، کتددن اوت و سامان قوتاردیقدان سونرا، نئچه آدام قویونلارینی بیر بیرینه قاتاراق ، یازا چیخانا قده ر بو کوهوللرده ساخلاردیلار. بو کوهولون ایچینده قازینتی شکلینده توفنگ و فنار یئری داش اوستونده هله ده قالماقدادیر. بو کوهولون ایچی همیشه قارانلیقدیر. یانی ایچینه گونشین ایشیغی دوشمه ییر.
۲.پیری کوهولو: شیروان دره نین ایچینده یئرله شن بیر کوهول آدیدیر. بو کوهولده ده اوتن چاغلاردا، قیش فصلینده قویون ساخلاناردیر.
۳.دهلیزدی: قوتورسویوندا یئرله شن بیر کوهول آدیدیر. دهلیز سوزجویو ائوین گیره جه یینه دئیرلر. باخ. دالان دهلیز
۴.خیرسی کوهولو: بو کوهول قوتورسویوندا یئرله شن کوهول آدیدیر. خیرسی سوزجوک باخیمیندان اوغرو آنلامینی داشیییر.
۵.زامان کوهوللری: بو کوهوللر شیروان دره نین ایچینده یئرله شن اون بئش دنه، انسان الیله قایریلان کوهولدور. بو کوهوللر قایالارین سینه سینده قازیلاراق جورلانیب.
۶.لاری کوهوللری: بو کوهوللر لاری شهرینه آییددیر. عینی حالدا لاری سوزجوک باخیمیندان بویوک، سو آنباری و بیر نوع فتیر آنلامیندادیر
۷.گوورچین کوهولو: لنج آوا کندینه یاخین بیر کوهول آدیدیر. اوتن چاغدا بو کوهولده چوخ سایدا گوو گوورچین یاشاییردی.
۸.منصوم یاتان: منصوم سوزجویونه آیید ایکی سویلم وار. منصوم دلی بیر آدامیمیش و گئجه لری بوردا یاتیرمیش. منصوم اوغریمیش و گئجه لری بوردا یاتیرمیش.
۹.داش کسن کوهوللری: داش کسن بیر کند آدی اولاراق خیاو شهرینه باغلی بیر کتدیر. داش کسنده اوچ درین کوهوله راست گلیریک. بو کوهوللرده اوتن چاغلاردا ده ییرمان داشی کسیردیلر. و بو کوهوللرده بو قایدا اساسیندا قایریلیب. ایندیسه بو کوهوللری سامانلیق شکلینده فایدالانیرلار.
آیی مقرری: اره لده کندینین آلت حصه سینده، گنزرلی دئییلن درین بیر دره نین ایچینده یئرله شن کوهول آدیدیر.
بینه لر کوهوللری: بینه لر کندینه آیید، چوخ سایدا کوهوللر، عینی حالدا بینه سوزجویو تیکینتی آنلامیندان علاوه ساخسی بارداغادا سویله نیر.
۱۲.آدام توتان کوهولو: قوتورسویوندا یئرله شن بیر کوکورد داغی دئییلن داغین اورتاسیندا کوهول آدیدیر. اوتن چاغدا بو داغدان کوکورد گتیره رک ائولرده و وانالاردا یاندیراردیلار. و کوکوردون اییی بیت بیره نی اولدورردیر. عینی حالدا بعضا قویونلاری آپاراراق قوتور سویوندا یویاردیلار. بو کوهولون ایچینه کئچنده، قوشلاری آسلانیق حالدا اولوله رین گوروروک. هئچ بیر انسان اون دقیقه دن علاوه بو کوهولده قالا بیلمز. چونکو قاز اساسیندا هر بیر جانلی خفه له نه رک اولمه لیدیر.
زاغا: لنج آوا کندینه تورپاغدان قازیلان درین بیر کوهولون آدیدیر.
رحیم غلامی
