قۏنشولاری اؤز ائولرینده اۏیناسینلار!
یازی اوزانماسین بیر باشا یازی نین ایچینه کئچیرم.
دوْستلار، ائرمنیستان ایسرائیل کیمین هاچان و کیملرین الیله نه یه گؤره قورولوب بللی دیر.
قورولان گۆندن ده ایسته نیلن رۏلون یئته‌رینجه سینه اۏیناییبدیر. مسلمانلار رۏنئسانسیدان سۏنرا یوْخویا گئدن زامان، ائرمنی لر اوروپالی اوستادلاریندان تاریخ اویدورمالارین یاخشی اؤیره نیب اؤزلرینه دۆزگۆن یالان، پالاندان تاریخ قوردولار.
قافقازین گؤنئیی، تاریخ بۏیو بللی دیر کیملر اوْلوبلار و یاشاییبلار.
دۆنیادا یئنی هئژمونیده مسلمان اؤلکه لرین باشلاری اؤزلرینه قاریشان زامان، ائرمنیستانلا ایسراییل قورولور. سۏنراکی اوْلایلاردا بونلارین آیاقلارین برکیتمه یه ایره لی له ییر.
بونلاردان بیری بؤیۆک ائرمنیستان پیلانی ایدیر. بؤیۆک ائرمنیستانا تۏرپاق گرکیردی. تۏرپاغی گۆرجۆلر وئرمزلر؛ روسلار دا، وئرمزلر. سۏنرا قورولان تۆرکییه ده، وئرمزدی؛ بس هاردان آلمالیدیرلار؟
بیرینجی اۏ تای آذربایجان کی ایلک تئزارلارین، سۏنرا ایسه سۆوئتلر بیرلشمه سی(شوروی) نین تاپداغیندایدی. بیرده بو تای آذربایجان کی قارما-قاریشیق نیظام-اینتیظاملا بولاشیق ایدئولوژی( تۆرک ضیددی) ایچینده چابالاییردی.
مین دۏققوز یۆز ایگیرمی ایکی یا دؤرت ده بوتایدان کؤچۆرۆلمۆش ائرمنیلر کی قاراباغا یئرلشمیشدیلر؛ روسلارین پیلانی اۆزره اؤزگۆرلۆک ایسته‌ییرلر. روسلارین پیلانلاری اۏلدوغونا گؤره، دایانمادان قبول اۏلونور. آما آذربایجانین ایچینده و ترکیبینده.
مین دۏققوز یۆز دۏخسان بیر ده آذربایجانین دورومو یاخشی اوْلمادیغیندان یارارلاناراق ائرمنیستان قاراباغا باسقی ائدیب اسکی پیلانی یۆرۆتمه له باشلاییر.
سۏنرا آذربایجان ایکی مین ایگیرمی ده قارا باغی ایشغالدان آزاد ائدیر. آنجاق روسلارین پوتین باشدا اوْلماقلا سؤزلرینه باخیب داغلیق قارا باغا گیرمیر، حال بو کی راحاتجاسینا گیره بیلردی.
پوتینله پاشینیان و علی‌یئو آراسیندا اۆچلۆک مقاویله باغلانیر. اۏرادا آپ-آچیق یازیلیبدیر: لاچین دهلیزی نین قارشیندا زنگه زور دالانی اوْلمالیدیر؛ بیرده داغلیق قارا باغ آذربایجان توْرپاغیدیر.
ایندی آذربایجان بونلاری ایسته‌ییر، اوروپا دا بونا راضی دیر. زنگه زور دالانینا ایسه، روس، چین ائله جه ده تۆرکییه ائلچی دوروبلار. اؤزۆده، ائرمنیستان بو دالانلا ایقتصادین قورتاراجاقدیر، بونو دا ائرمنیلر یاخشی بیلیرلر.
ایندی قونشولار نه یه سانجیلانیرلار؟
بو گۆن سحردن، اۏن دانا خبر اوْخوموشام: ایران بئله ائده جکدیر! آذربایجان بو ایشلری گؤرۆر! باکی جمهوری سی ائله دئدی! بئله ائتدی!…
ایرانلا عراغین ساواشی باشلاناندا یئددینجی صینیفی بیتیریب سگکیزینجی صینیفه گئدیردیم. آما اینقلاب اوشاغی اۏلدوغوما گؤره، گۆنده لیک بیرده رادیو خبرلرین ایزلردیم.
بایرام تعطیللرینده پان فارسلارلا ایرانشهریلرین پرۏپاگاندالاری دۆزگۆن ایشله‌ییر- چالیشیر. بلکه اؤزلرینه دینله ییجی (ائشیدن) ییغسینلار.
اؤلکه نین ایقتصادلا تۏپلوم دورومون کیمسه گؤرمه دن بیر داها ساواشی ساتین آلماقدادیرلار. بیر کیمسه یوْخدور بو ناخوشلارا، بو آلیزلارا، بو خسته لره دور دئسین!
مهندس رحیم عباسی