آتا-آنالار سؤزلری
بیز آذربایجان تۆرکلرینین ده باشقا اۇلوسلار کیمی، دۆشۆنۆر آتا-آنالاریمیزین کئچمیشدن بری چئشیتلی قاوراملار، داورانیشلار هابئله اوْلقولارا گؤره دگرلی، ائلهجه ده اۇیغون اۆستو اؤرتۆلۆ سؤزلری اوْلوبدو. بیز ایسه ایندی اوْ دگرلی سؤزلری، اؤیۆد اوْلاراق تام یئرینده قۇللانیب یارارلانمالیییق.
ساتیلیق آت کیمی دیشلری گؤسترمک
دئییرلر مۏللا نصرالدینین بیر قوْجا آتی واریمیش. مۏللا اوْنو باشیندان ائلهمک ایچین هر بازارگۆنۆ مال بازارینا ساتماغا آپاریردی، آنجاق آلیجیلار آتین یاشینی بیلمگه گؤره دیشلرینه باخینجا، اوْنون قوْجا اوْلدوغونو دۇیاراق آلماقدان واز کئچیردیلر. نه ایسه، مۏللانین آتینین دیشلرینه آلیجیلار بازاردا آردیجیل باخمالاری اۆزۆندن، آت اؤیرَنجکلی اوْلاراق باشقا یئرلرده ده هر کیمسه اوْنا یاخینلاشیردی، اوْ آداما دیشلرینی گؤستریردی!
بۇ آتا-آنالار سؤزۆ یادیما دۆشنده، محمد رضا شاه-ین اوْغلو رضا پهلوی، بیلمیرم نهدن گؤزۆمۆن اؤنونه گلیر!
اوْلابیلر ده، بۇ اۏخشارلیق رضا پهلوینین بۇ یاخین ایللردهکی یؤنَتگی (سیاست) بازارلیغینداکی چیخیشلاری ایله داورانیشلاریندان آسیلی اوْلسون.
رضا پهلوی ۱۳۳۹ دوْغوملودور. اوْ ایرانداکی ۱۳۵۷ دئوریمینهدک آتاسینین شاهلیغی دؤنَمینده سارایدا یاشامیش بیریسیدیر. رضا، ۱۳۴۵-ده آتاسینین بؤیۆک اوْغلو اوْلدوغونا گؤره آردای (ولیعهد) ائدیلدی. اوْ ۱۸ یاشینادک، سارایدا اؤلکهنین ایکینجی گۆجلو آدامی ساییلاراق، باشقا اؤلکهلرین أگهمنلیک یئتکیلیلری (مقامات) ایله سارایدا یوْخسا یۇرتدیشیندا آردیجیل گؤرۆشلری اوْلوردو. اوْندان دوْلایی، هله یئنییئتمه ایکن چوْخلو دیپلوْماتیک گؤرۆشلرده چیخیش ائتمیش بیریسی ایدی.
آنجاق ۵۷ دئوریمی، هر نهیی ترس چئویردی(آلت-اۆست ائتدی). بیر آدلی-سانلی اؤلکهنین گلهجک خاقانی گؤزلهنیلن بیر گنج آدام، اؤلکهدن قاچماق زوْروندا قالاراق، دیدرگین دۆشدۆ .
بۇ یازینین سؤز قوْنوسو، رضا پهلوینین عائیلهسی ایله بیرلیکده اؤلکهدن آپاردیغی پارا هابئله چئشیتلی دگرلی ماللار یارارینا دایاناراق، باتی ایله باتیاؤلکهلری ائتکیسی آلتیندا اوْلان اؤلکهلرده جمهوری اسلامی یؤنَتیمی قارشیسیندا گیریشیملرینین نئجهلیگیدیر.
اؤزللیکله یاخین ایللرده اؤزونو اؤلکهنین ایندیکی أگهمنلیگینه قارشی اوْلان آخیملارین أن باشدا گئدنی بیلن، رضا پهلوی، یؤنَتگیسل ائیلملرینی داها دا آرتاراق، باتیداکی چئشیتلی اؤلکهلرین اؤنملی یئتکیلیلری هابئله یئرلرینده گؤروشلر کئچیرمکدهدیر. اوْ ج.ا قارشیسیندا اؤلکه دیشینا هم ده ایچینه اؤزۆنۆ داها دا گۆجلو ایله اۇیغون گؤسترمک ایچین، هر تۆرلۆ چابالار یاپماقدادیر. آمئریکا، بریتانییا، بئلژیک، ایسراییل کیمی اؤلکهلرده کؤنۆللره یاتماق ایچین اؤزۆنۆ اۆستونسئچیم تانیتدیریم آپاران رضا، هر هارا ألی یئیرسه، اۆزۆنۆ گۆلۆنجلۆ گؤسترمکدهدیر. بۇ آدام، دیشلرینی قاموْ اوْیونا هابئله دؤنیانین یؤنَتگیسل یئتکیلیلرینه گؤسترمکله، کؤنۆللری آلماق پئشینده گؤرۆنمکدهدیر.
نه ایسه دیشلری گؤسترمگین نه اؤلچۆده بۇ آدامین ایستَگینه چاتماغینا یاردیملی اوْلاجاغینی بیلمیرم ! ۱۴۰۲/۰۲/۲۶