اووچو پیریم شیفاهی ادبیاتیمیزدا کورسو اوستونده سویله نیلن بیر افسانه وی ناغیلدیر. ایللر اونجه اوچ دنه ناغیل باشقا ناغیللاریلا بیرلیکده توپلادیغیمیز ناغیللاریندان بیریدیر. آشاغیدا گلن ناغیل فولکلوروموزدان بیر یارپاق کیتابیندا چاپدا اولسا یئنی دن باشقا ناغیل توپلوسونادا اوز دوندردیک. عینی حالدا اووچو پیریم بیر آوچی اولسادا آنجاق حئیوانلاریندا دیلینی بیلیر.
ایندیسه اووچو پیریمه آیید آشاغیدا ناغیللاردان بیرینی قلمه آلیریق
اووچو پیریم آوا گئده رک بیر گون چولده قالاراق شیروان دره ده پیری کوهولونون ایچینه کئچدیر. کوهولون ایچینه کئچدیکدن سونرا اودون توپلاییب و دورمه قالادیر. سانکی بیردن بیره بیر توکلوجه کوهولون ایچینه کئچدیر. ها بئله توکلوجه گله رک اودونون قیراغیندا اووچو پیریمله اوز اوزه اوتوردور. بو حالدا اووچو پیریم توکلوجه دن هر نه سوروشوردور.توکلوجه یالنیز گولوردور. یانی هئچ دینیب دانیشماییردیر. بیر آزجا اوتوردوقدان سونرا توکلوجه دیله گله رک اووچو پیریمدن سوروشدور آدین نه دیر؟
اووچو پیریم دئدیر: آدیم اوزومدور
اووچو پیریم توکلوجه نین سیرتیقلیقین دوشونه رک بارداغدان بیر آزجا یاغ چیخاریب و اوز بده نینه سورتدور. و توکلوجه ده اووچو پیریمه باخاراق یاغدان گوتوروب و بده نینه سورتدور. اووچو پیریم یانار اودون چوپونون بیرینی گوتوروب قیچینین توکونه دوتدور. توکلوجه ده اووچو پیریمه باخاراق یانار اودون چوپونون بیرینی گوتوره رک قیچینا دوتدور. اووچو پیریمین قیچینین توکو آز اولدوغو اساسدا قیچی یانمادیر. آنجاق توکلوجه نین قیچینین توکو چوخ اولدوغو اساسدا قیچی اود دوتاراق آلاولاندیر. توکلوجه بده نین اود آلدیقدان سونرا کوهولدن چیخاراق اوزو قویلو دره یه طرف توللاندیر. هر طرفدن توکلوجه نین یولداشلاری توکوله رک توکلوجه نین اودونو سوندوردوکدن سونرا سوردولار : سنی کیم بو حالا سالدیر
توکلوجه دئدیر: اوزوم
یولداشلاری دئدیلر: اوندا اوزون اوزونو بو حالا سالیبسان. داها نه ائله مک اولار
اووچو پیریم اوستن بونلارین دانیشیقلارینی ائشیدیردیر. اونلار داغیلیب گئدندن سونرا اووچو پیریم آتینی مینه رک یولا دوشدور. یولدا آتین دایچاسی دالدا قالاراق کیشنه دیر. اووچو پیریمده چون حئیوانلارین دیلین بیلیردیر. گوردور دایچا ننه سینه دئییرکی دایان منده گلیم. آنا آتدا دایچاسینا دئدیر: لووا قالاسان بیری منیم بئلیمه مینیب و بیریده قارنیمدادیر. من بو ایکی دنه نی اوزومله آپارا بیلیرم. آنجاق سنه پییادا قاچیب گله بیلمه ییرسن.
اووچو یولا داوام ائتدیکدن سونرا گوردور بیر چوبان قویون اوتاریر و چوبانین ایتلری اووچو پیریمه جومدولار. اووچو پیریم گوردورکی ایتلر دئییرلر : کئشکه اووچو پیریمین آتی اولوردور و بیز اونون اتیندن یئییردیک. اووچو پیریم ایتلرین فیکرینی بیله رک ایتله ره آجیقلاندیر. و ایتلر قولاغلارینی سالخاراق هر بیری گئده رک بیر یاندا یاتدیلار.
اووچو پیریم اوز ائوینه چاتدیقدان سونرا گوردور آروادی پیشیک له ایتین قاباغینا سوموک قویوب و ایتیله پیشیک بیر بیریله ساواشیرلار. بیردن پیشیک ایته دئدیر: نییه سوموک دن ساری اوزونو اولدورورسن. صاباح اووچو پیریمین اوکوزو اوله جک اوندا دویونجاق یئیرسن.
اووچو بونو ائشیتدیکدن سونرا اوکوزو آپاراراق ساتدیر. اووچو آروادینا دئدیر: یئنه ده سومویو ایتیله پیشیگین قاباغینا آتگینان. یئنه ایتیله پیشیک ساواشدیقدان سونرا ایت پیشیگه دئدی: به دونن دئدین اوکوز اوله جک. آنجاق اوکوزو آپاراراق ساتدیر. پیشیک دئدیر: قورخما بو گون گامیشی اوله جک. اووچو پیریم بو سوزوده ائشیده رک گامیشیدا آپاریب ساتدیر.
آروادی یئنه ده سومویو ایتیله پیشیگین قاباغینا آتدیقدان سونرا ایت دئدی: به دونن دئدین گامیش اوله جک
پیشیک دئدیر: قورخما. صاباح اووچو پیریم اوله جک. دویون قارین احسان یئیه جه ییک.
اووچو بو سوزو ائشیده رک دئدی: سهو ائتمیشم. آلله قادا بالانی دونیا مالین آلماغلا قوتاریر.
باشینا بیر قاراما سالاراق گئجه نی یاتدیقدان سونرا سحر اویانمادیر.
بو افسانه وی ناغیلی اون ایکی ایل اونجه ساوالان داغینین خیاو اوزونون یازاراق فولکلوروموزدان بیر یارپاق کیتابیندا چاپ ائتمیشدیک
رحیم غلامی