ایرانلا آذربایجان سوْرونلاری
ایرانلا عراق ساواشین آراشدیراندا ایندییه قدر اۆستۆ اؤرتۆلۆ نهدنلر چوْخ گؤزه دگیر. میثال اۆچۆن مین اۆچ یۆز اللی دوْققوزون شهریور آیی نین اوْن اۆچۆنده ایرانلا عراق سینیری، ایران طرفیندن توپآتشینه توتولماسی، ایران ایچره بیر یئرده گۆرمه میشم، اوْخومامیشام. حال بو کی عراق هامان آیین اوْتوز بیرینده ایرانین بۆتۆن ساواش هاوا آلانلارین بوْمباردومان ائدیر.
بو یازیدا ایسته میرم ایران-عراق ساواشیندا سوچلو آختارام، یالنیز ایستهییرم ایرانلا آذربایجانین آراسیندا باش وئرن قوْنولارا یاناشام. آما سکگیز ایل بو ساواشین گئدیشاتینی، اوْخوماغی هر کسه گرکلی سانیرام. اوْخویوب ایندییه دک دئییلمهین و یازیلمایان یؤنلرین بیلسینلر.
قوْنویا گیریشمهدن اؤنجه ایللردی بیر سوْرغوما جاواب تاپانمامیشام. قاراباغ باسقی آلتیندا اوْلاندا، ایرانین داها دوْغروسو پان فارسلارین کی ایز ایتیرمکدن اؤترۆ اؤزلرین ایرانین بۆتؤولۆگۆن قوْرویان سؤیلهییرلر؛ نییه بو قدر سانجیلانمیردیلار؟ قیدیقلانمیردیلار؟ اوْلمایا اوْندا دا بونلارین اللری واریمیش؟ قاراباغ باسیلسین!. بلکه بونلارین یازیلمیش سناریولاری گئرچکلشسین!
یادیرقامایاق (اونوتمایاق) قاراباغ باسیلاندان سوْنرا اردبیل دوْغو آذربایجاندان آیریلیب، واختیندا اعتراضلارا باخمایاراق شرقی آذربایجان یوْخ، اردبیل اوستانی آد وئریلدی!
حال بو کی اوْندا بۆتۆن فیکیر یئیه لری دئییردیلر:«خوْراسان کیمین آد وئریلسین؛ اردبیل اوستانی دوْغو آذربایجان، تبریز اوْرتا، یا مرکزی آذربایجان، اورومو ایسه ائله باتی یا غربی آذربایجان آدلانسینلار.
آما ایندی پان فارسلار حاکمییتین ایچینده یاخشی یئر آلیبلار.
یازیلمیش سناریولارین قاباغا آپاریردیلار. غربی آذربایجانلا تۆرکییه سینیرلری کۆردله شسین. ایندیکی شرقی آذربایجانین سینیرلری ایسه ائرمنی اوْلسون. بس ایران آدلی اؤلکه ده یاشایان تۆرکلر قوْنشو دیلداشلاریندان ایلگیلری بئله سی قیریلسین. بو ایسه دؤرت دیوار آراسیندا آسیمالاسیونلاشمالاری ال وئریشلی و تئز باش توتسون.
آما قیرخ دؤرت گۆن ساواش بونلارین سناریولارین آلت-اۆست ائتدی.
قارا باغ آزاد اوْلدو. دوْغو آذربایجان داها دوْغروسو مرکزی(اوْرتا) آذربایجان یۆزلر کیلومئتیر اوْتای آذربایجانلا یئنیدن سینیرله شدی. اؤزۆده بیر حالداکی آرازین اوْ تای کندلری، شهرلری، یوْل-یولاقلاری آوروپا ایستانداردلاریلا آبادلاشماغا باشلاماسی داها بو تایا ائتگی ائده جکدیر. ایندی بو ایشلر زنگه زور دالانی آچیلماقلا داها سۆرعتله نهجکدیر.
پان فارسلار ائله یوخودان دیسگیندیلر کی بیزده بیر آتا-بابا سؤزۆ واردیر« آیی نین مین اوْیونو آغاجداکی بیر آرمیددان اؤترۆ اوْلار».
بونلار، – آرازدا مانوور وئردیلر. – خدافرینده قنناسه ایش یۆرۆتدۆلر. – قاپاندا یئنیلدیلر. – غربی زنگه زوردا(سیونیک) کوْنسوللوق آچدیلار. – بیر میللت ایکی دؤولت آد وئردیلر. – قاراباغا تئرورچو گؤندردیلر. – سفرلیگه یۆرۆش ائتدیلر. – ایندیده جولفادا اۆچ عسگر مقبره سینده سالام کوْماندان اوْخویوب دۆننه دک اصلا یادلاریندا اوْلمایان بو شهیدلری یادا سالیب اوْنلاری سانکی قوزئیدن گلن دۆشمان قارشیندا دایانمالارین وورغولایبلار.
بئله بیلدیرسینلر کی بو اۆچ عسگر آذربایجاندان یۆرۆشلر قارشیندا شهید اوْلوبلار. بو تای آذربایجانین داها یئنی یئتمه لری ده بیلیرلر اوْنلاری کیملر و هانکی اوْردو شهید ائدیبدیر؟
منجه حاکمییت نئجه چین الی له عربیستانلا باریشماقدادیر؛ گرک بۆتۆن قوْنشولاریلا یاخینلاشسین. دوْستلوق کسینلیکله دۆشمانلیقدان ائتگی سی چوْخراقدیر.
هئچ بیر حاکمییت عاییبسیز دئییل. لاپ سوپر گۆجلۆ حاکمییتلرینده عیب-ایرادلاری واردیر.
بو یئترسیزلیکلر دوْستلوقدا بللَنمزلر. آما دۆشمانلیقدا ال یئری اوْلارلار.
بس نه یاخشی هر ایکی حاکمییت دوْستلوغا دوْغرو گئده لر.
مین ایللیک سینیر، مین ایللیک یوْل هامیسی احساسدان چیخان سؤزلردی.
آخی دئیهن یوْخدور بو مین ایللیک یوْلدان هارا گئده جکسینیز. بیر حالدا کی گۆرجۆستان یوْل وئرمه سه؟!
دئیهن یوْخدور کی آی قارداش سنین روسییه یه بیر خزر دنیزیله، بیرده آذربایجاندان گئده بیلرسن. تۆرکییه ایله ده قارا دنیزه و آوروپایا. نییه آغریماز باشینا دوز باغلاییرسان!؟
یۆز ایلده سیزین پیلانلاریز بیزی فارس ائده بیلمه دی. کسینلیکله بیلین یئنه ده ائده بیلمییه جکدیر. گلین تۆرک له عربله دوْستلاشسین. بو قدر آوروپالیلارین یازدیقلاری یالانلارا اویمایین.
ایران آدلانان اؤلکه ده بئش یۆز ایله یاخین عربلر، مین یۆز ایلده تۆرکلر حاکم اوْلوبلار. ایندیکی ایرانین بۆتۆن هر یئرینده تۆرکلر یاشاییرلار. بونلارا درین باخان اوْلسا دئییر کی ایران بیر تۆرک اؤلکه سیدیر. نییه بو یؤندن دۆنیادا یئنی قورولان گۆجلردن یارارلانمیسینیز؟
رحیم عباسی اوجاق