ایرانین دردی نه دیر؟
بو ایلکل گؤرَوی یئرینه یئتیرمک اۆچۆن، بیرا سیرا اساس پرینسیبلره بوْیون أیمک قاچیلمازدیر. اؤرنک اوْلاراق، دۆنیا سَوییهسینده قبول اوْلونموش ایچهری- دیشاری سیاستلرین، میللی منافعلر اۆزره قورولماسیدیر.
اؤتن ۲۰۰ ایلده، تۆرک فوْبیاسیندان (تۆرک قوْرخوسو) ماسوْنلارین ایران آدلانان اؤلکهده اساس سیاستلرینی نئجه یۆرۆدهجکلرینین تمیلینی قوْیدو. آغامحمدخان قاجارین درایتلی باجاریغیندان درین قوْرخویا دۆشن روس-اینگیلیس سیاستچیلری، قارشیلاریندا دورا بیلهجک تکجه تۆرک دۆنیاسینین اؤزهگی آزربایجاندان جیددی تهلۆکه گؤرۆردۆلر. بونا گؤره ده، قاجارلار دؤولتینه سسسیزجهسینه اؤز ألآلتیلارینی سیزدیرماقلا، آنتی تۆرک کودتاسینی تۆرک کؤکنلی رضا قلدر آدینا حیاتا کئچیردیلر.
تۏپومسال تۏر یا خود سانال اۏرتام دئییلن مجازی شبکهلرین گلیشمهسی، کئچمیشده سیرر سایلان بیرچۏخ گیزلی مسئله ری اۆزه چیخاردی.
ایندی ایرانین اۏلسون پهلوی، اۏلسون سؤزده اسلام حاکمیتینین تۆرک سانجیسی آیدینجاسینا بللی دیر. زنگهزورو قیرمیزی جیزیقلاری بیلدیرن آنتی اسلام حاکمیتی ایله سانکی اساس مخالفتی اۏلان سلطنتچیلرله خالق مجاهددلرینین آزربایجانا قارشی اۏرتاق باخیشلاری ایله داورانیشلاری، بو سؤزۆمۆن آچیق- آیدین ایندئکسی (شاخس-گؤسترگه)سی دیر.
أل ایچی کیمی تهران-تبریز- ناخجیوان لا تهران-اورمو تۆرکیه حاضیر آوروپا یۏلونا، دَوَه بۏینو تاتئو-گۏروس یۏلونو اۆستۆن گؤرن لرین قارنی زیغلی اۏلماقلارینا شۆبهه ائتمک اۆلماز.
خدافرین – خانکندی یۏلونو ایتیرمیش ایران، آوروپا بازارینین نارکو بیزنس(تجارت مخدر) امتیازینی ایتیردیکده، اۆسته لیک بیرسیرا سانکسیا(تحریم) لری نئتراللاشدیرماق(خنثی ائتمک) قابلیتینی ده ایتیریب. یالنیز بونلارا گؤره هر اۏیوندان چیخیر. یۆخسا گئرچدن قاراباغدا دۆنیانین دؤرتبیر بوجاغیندان بارماق سایدا ییغما ائرمنیلرین هومانیتار قایغیسینی چکن بیر دؤولت، نئجه اۏلور اؤز میللتینه قۏیون-قوزو قدر ده آزاد یاشاماغا حاق وئرمیر!
باخمایاراق خانکندی ائرمنی لرینین دردلری ایران دا یاشایان میللت لرله بام-باشقادیر.
ایران دۏغرو گامیش (جامیش) آختاریرسا، اؤز ایچینده میلیۏنلارلا فارس اۏلمایان میللتلرین ایلکل حاقلارینی اۏ جۆملهدن: بۆتۆن ساحه ده مختاریت (دیل، کۆلتۆر، مدنیت، گئییم…) لرینی اؤده سین؛ یعنی اؤز گؤزوندن تیری چیخارتسین، سۏنرا اؤزگهلرین گؤزۆنده گؤردۆگۆ تۆکه ایراد توتسون.
البته اؤزلرینی عراقلی، هابئله عربلرین امام اؤولادلاری سایان سید- مۏللادان، ائله جه ده ایران آدلانان اؤلکه نی غنیمت کیمی أللرینه کئچیریب، یاغمالایان بیر حاکمیت دن منطق اومماق؛ اۆزدن ایراق ائششگین بئینینه «ویندوز 11» یۆکلهمک کیمی یئرسیز بیر ایشدیر.
حبیب ساسانیان (یاکاموز)