گلهنک، تبریز و باکی
گلهنک [سنت] باجاسيندان باخاندا بونلاري گؤروروک: باکي، يوٍنگوللوکدن گؤيه ميللَنميش چرپلنگه [بادبادکه] اوخشايير، تبريز ايسه آغيرليقدان پاليچيغا اوتورموش گمييه. قوزئيده آسقيراق گليرکن ساغلامليق دئمک، قاپي کانداريندا [آستاناسيندا] گؤروشمکدن چکينمک، گونون فالينا دريندن اينانماق آلداتماسين بيزي. بونلارين گلهنهيه دخلي يوخدور، سووئت توتاليتاريزمينين تالاديغي ديني آيينلرين يئرينده اوتورموش دئفورمه آيينلردير بونلار. سونوج آيديندير: قوزئيده گلهنک بوشلوغو نه قده ر کي يئني دوشونجهلره يول آچير، بير او قدهر هر نهيي آنلامسيزلاشديرير. مدرنيزم گلهنهيين ايشيغيندا يئنيدير.
بو تايدا ايسه گلهنک، اوجو ايتميش يوماق کيمي تکجه الآياغيميزا ساريلمير، بئينيميزه دولاشير. بيزده هر بير يئني دوشونجه، هر بير يئني ايجتيماعي آخيم، و هر بير يئني فئنومئن، واختيندان اؤنجه اؤلوشگهيير. بونلار، دوٍنيوي [عرفي] و فقهي مانعهلرين ايچيندن کئچهکئچه “يئني” اؤزهلليکلريني ايتيرير. اويونجاقلارين [اسباببازيلرين] اوشاقليقدا لذذتي وار، بؤيويورسهنيز لذذتدن دوشور. يئنيليک، واختليواختيندا يئنيليکدير، واختي اؤتورسه باياغيلاشير. فتوآپارت [عکاسي دوربين] گلير، اونا قارشي چيخيريق، سينما گلير يئنه بئله اولور، ويدئو گلير يئنه بئله اولور، کروزنا چاناغي [ماهواره آنتني] دا بئله. سونرا ايللر بويو موباريزه آپارديقدان سونرا اونلارين دَبدن دوٍشدويو بير واختدا اونلارلا راضيلاشيريق. بوردا هرنهیین کؤهنهسی دوغرودور، هر بیر أسکی فئنومئن اؤزگون[اوریژینال]دیر.
پول ريکورين دئدييينه گؤره، «بيز کوٍتلهنين کئچميش يادداشيني [حافيظهسيني] اونلارا قايتارديقدا گلهجهيي ده اونلارا تاپشيريريق. اونلاري يئنيدن زامانين آخارينا قايتاريريق.» زامان سووئت دؤنمينده دايانميشدي. سووئت حؤکومتي طبقهسيز بير توپلوم ياراتماق ديلهيي ايله، تاريخين ديشيندا حرکت ائديردي. باخين! باکيدا ايندي کوٍتله، «آن»لاردا ياشايير، نه کئچميشله يئترينجه ماراقلانير، نه ده گلهجکله ايشي وار. اونون گلهجهيه ماراغيني تکجه بئله يوزماق اولار: ائرتهسي گون قازاناجاغيني بو گون خرجلهيير. بونون بير آنلامي دا کئچميشين ابدي کئچديييني گومان ائتمکدير، گلهجهيين ده گلمهيهجهييني. حالبوکي کئچميش هئچواخت کئچيب گئتمير، بيزيم کيمليييميز ايسه کئچميشي «تاريخ و تحکيه [داستان]» دونوندا نئجه روايت ائتمهيييميزدن آسيليدير. تاريخ و تحکيه بيزيم کيمليييميزي اولوشدورور، روايت ايسه يالنيز ديلده گئرچکلشير. بوردا البته ديل بيزيم داديمزا چاتا بيلردي، چاتمير. چونکي بوتايدا گلهنک وارسا ديل يوخدور؛ اوتايدا ديل وارسا گلهنک يوخدور.
گلهنک، تبریز و باکی/ ایواز طاها