گوورچینلرین مختلف آدلارینا وارمادان، خویلارین آزاجیق یازدیقدان سونرا، گوورچینین چئشیدلی آدلارینا قاییداجاغیق. گوورچینه ده باشقا قوشلار کیمین قوش بازلار قوش دئیرلر. یانی بیری سوراندا دئمزلر نئچه گوورچینین وار.دئیرلر نئچه قوشون وار ؟
اینانج باخیمیندان دئیرلر گوورچینین دوشر دوشمزی اولار. گوورچینین ائرکه یینه نر و دیشیسینه مایا دئیرلر. گوورچینلری بولوم باخیمیندان ائو و چول گوورچینی دئیرلر.
عینی شیکل باخیمیندان گوورچین یاهی، ککیللی و تووقی آدینا بولونور. یاهی قوشو تیز و یئیین اوچدوغو اساسدا اونا مرج قوشودا دئیرلر. بو قوش بیر شرط اساسیندا اوزاق مسافه دن آتیلار. ایندیسه کیمی اودار و کیمی اودوزار. بو قوشلارا آتیلما قوشدا دئیرلر. یاهی قوشلاری هوش باخیمیندان چوخ هوشلودولار. هم یئیین اوچورلار و هم هوشلودولار.
تووقی قوشو چوخ اوچار. هاوالانیب گوزدن ایتر. بلکه ده بیر گون اوچادا بیلر. آنجاق تنبل قوشودور. ککیللی دئییلن قوشلار آز اوچار آنجاق هوشدان تنبل دیلر. هر بیر گوورچین ایکی دنه یومورتلار. گوورچینین توک گتیرمه ین بالاسینا اتجه دئیرلر و بیر آز بویودور. اوندا دئیرلر بالا نر و بالا مایا. گوورچین تئز تئز یومورتلار. گوورچینین یومورتاماق واختی گلنده ائرکه یی دیشیسین دیمدیک له یه رک اویان بویانا قووالار و بونا دئیرلر داواتدادادیر.
یومورتانین اوستونده هم ائرکک و هم دیشی نوبتی یاتار. بالالارینین آغزینا قوسارلار. بالالاری خیردا اولسا و چوخ زیییلده سه اوندا دئیرلر زیی زیی دیر. جوتلشنده ائرکک گئده رک بیر یئرده اووولدایار و دیشیده گله رک باشینی تومارلار. عینی حالدا گوورچینین ائرکه ییده قورولدار. اگرسه قورولداماسا دئیرلر لالدیر. مرج قوشونا آتما قوشدا دئیرلر و یئله طرف اوچان قوشا دئیرلر آغزی یئله اوچور.
عینی حالدا قوشلار اوچا بیلمه سین دییه قانادین یا یولارلار و یادا قیچی ایله کسرلر. اگر سه بو حالدا اوچسا دئیرلر یئللندی و یا شیریلداییب گئتدی. بو حالدا اگرسه بیر گوورچینین قانادینین توکون توم گوتورسه لر یانی هئچ بیر له له یی قالماسا دئیرلر کیفته اولوب. باخ کیفته له مک. و اگر سه قویروغونون توکو یولونسا لومه قوش دئیرلر.
چوخ مایاللاق ووران قوشا خک باز دئیرلر. باخ خک له مک. چوخ آنتنین و تیرین اوستونه دوشن قوشا تیر باز و آنتن باز دئیرلر. اگرسه بیر قوش اوچاندا دوز مایاللاق آشماسا اونا قاجیماق دئیرلر. گوورچینین بیر نوع بیتی اولار اونا گوورچین بیتی دئیرلر. و گوورچین ساخلانان یئره ده قوش خانا دئیرلر. اگرسه بیر گوورچین بیر نفرده نئچه ایل اوچوب و ائنیب اونا چاغ دئیرلر. و چاغ قوش یانی بو قوش یئیه سینده باشقا کیمسه ده اوچوب ائنمز. بعضا بعضی گوورچینی بالا چکمک اوچون ساخلارلار. و بوندا گوورچینین آغزی شوراب باغلار و بعضی گوورچینیده مرج اوچون ساخلاسالاردا بعضی لرینده باز اوچون ساخلارلار. بیر گوورچین اگرسه اوچاندا قانادین بیر بیرینه ووراراق اوچسا دئیرلر شاپلاییر و یا شاپلایا شاپلایا اوچور. باخ شاپلاماق. اگرسه بیر مایا قوش نرینی چوخ سئوسه دئیرلر نربازدیر. گوورچین تویوق کیمین قورتوم قورتوم سو ایچمز. بلکه بیر دونه دیمدیگین سویا سالار و دویون قارینی سو ایچدیکدن سونرا اوچاراق گئدر و سوندا اوتن چاغدا گوورچین نامه یئتیرمک اوچون قاصد ایشینیده آنلاملادیر
ایندیسه قاییدا گوورچینلرین آدلارینا
قارا قویروق: بدنی آغ و قویروغو قارا رنگده اولان گوورچین
گوو قویروق: بدنی آغ و قویروقو ماوی اولان گوورچین
هاچا قویروق: اوچاندا قویروغو آرالی قالان گوورچین
چتیر قویروق: بدنی آغ و قویروغونون اوجو قارا رنگده اولان و اوچاندا چتیر شکلینده اولار
گوو باش گوو قویروق: بدنی آغ و قانادی و قویروغو گوو رنگده اولان گوورچین
آغ قویروق: بدنی قارا و قویروغو آغ رنگده اولان گوورچین
ساری باش: بدنی آغ و باشی ساری اولان گوورچین. باخ. قیرمیزی باش، گوو باش، قارا باش، آغ باش
گوو آلا: بدنی گوو و قاناد لاری آغ رنگده اولان قوش. باخ. قارا آلا، ساری آلا، قیرمیزی آلا
بالا دیمدیک: دیمدیکی بالاجا اولان قوش
بالتا ککیل: ککیلی بالتا شکلینده اولان بیر قوش
بیز ککیل: ککیلی تیز اولان بیر قوش
شالوارلی: قیچی توکلو اولان قوش
تووقی: بیر نوع چوخ اوچان قوش
پوشدر: بئلی قارا، ساری، قیرمیزی، گوو و … انجاق باشقا یئری آغ اولان گوورچین
شازدا: بدنی مختلف رنگده آنجاق باشی، قویروغو و قانادی آغ رنگده اولان گوورچین
چیتی: بیر نوع باشی ککیللی و آیاغی توکلو قوش
رئیحانی: بیر نوع ککیللی و آیاغی توکلو گوورچین
قیرمیزی نیشان: بیر نوع ککیللی و آیاغی توکلو گوورچین. باخ. ساری نیشان
فیلی: بیر نوع ساری و قیرمیزی توکلو و ککیللی و آیاغی توکلو گوورچین. باخ. ساری فیلی، قیرمیزی فیلی
شهرلر آدینا مختلف رنگده گوورچین آدلاری: شامی، یهودی، کیرمانی، سرابی، تبریزی
دورک: بدنی دوم آغ و گوزلری قان قیرمیزی گوورچین
گوو: ماوی رنگده اولان
شاس توک گوو: بیر نوع ماوی رنگده اولان گوو گوورچین
آغ: آغ رنگده اولان
قارا: قارا رنگده اولان
سورول: بیر نوع قونور رنگده اولان
قوردو: بیر نوع قیرمیزی رنگده اولان
گوو چیل: سپینتی گوو رنگده اولان گوورچین. باخ. قارا چیل، ساری چیل و…
کله فه: بدنی آغ ویالنیز بوینوندا رنگ اولان گوورچین. بو گوورچینه بوینو زنجیرلی ده دئیرلر
یاهی: چول گوورچینی
یاهی قات: چول گوورچینیله ائو گوورچینیندن عمله گلن قوش
دوبئر: بیر نوع گوورچین
موشی: بیر نوع کرمی رنگده اولان
قارا گوو: ماوی رنگله قارا رنگ آراسیندا اولان گوورچین آدی
دمری: دمیر رنگینده اولان گوورچین
دوشو قارا: بدنی آغ و سینه سی قارا رنگده اولان گوورچین. باخ. دوشو ساری، دوشو قیرمیزی و…
باشی چیل: بدنی آغ و باشی دنه دنه مختلف رنگده اولان گوورچین
پیل پیلی: بیر نوع گوورچین