«هامیمیز قارداشیق»؟؟؟!!!
ایران جغرافیاسی اسکی زامانلاردان تورک یوردو و تورک حاکم‌لرینین حؤکمونده اولوب. قاجار سلاله‌سی‌نین دئوریلمه‌سی ایله بیر زماندا حاکمیت تورک‌لردن فارسلارا کئچیر. بو حاکمیتین دگیشیلمه‌سینده انگلیس باشدا اولماقلا غرب اؤلکه‌لرینین گؤستریشی ایله فارس ملیتچیلیگی دوغولور فارس شوونیسمی یارانیر.
فارس شوونیسمی یارانان گوندن تورکه قارشی حرکت ائدیر. تورکون تاریخین دانیر. تورکون وارلیغینی اودلاییر. تورکون حقیقتین افسانه‌یه چئویریر و ….
سؤز- سؤزه گلنده «هامیمیز قارداشیق»، برابریک دئیه‌ن‌لر عمل میدانیندا باشقا تور گؤرسنیرلر و بو گؤرونتولر بو سون ایللرده چوخ قابارمیش و قاباریق حالدا اؤزونو گؤسترمگه دوام ائدیر:
«هامیمیز قارداشیق»؟؟؟!!! آما بوتون مدرسه‌‌لر سنین {دیلینده}دیر، منیم بیر کلمه اؤز دیلیمده یازماق دگیل، دانیشماغا بئله حاققیم یوخدور!
«هامیمیز قارداشیق»؟؟؟!!! آما بوتون مطبوعات، درگی‌لر، ژورناللار سنین‌دیر، منیم اولور-اولماز بیر صحیفه‌م وارسا او دا آخساق‌دیر.
«هامیمیز قارداشیق»؟؟؟!!! آما رادیو، تلویزیون و بوتون دولتی مئدیالار سنین‌دیر، منیمکی‌لر سنین گۆوَنلیگینی هده‌‌له‌‌ییر.
«هامیمیز قارداشیق»؟؟؟!!! آما بوتون اداره‌‌لر و اونلاردا اولان بوتون سندلر سنین دیلینده یازیلمالیدیر.
«هامیمیز قارداشیق»؟؟؟!!! آما اوشاق باغچالاریندان توتدو یوکسک بیلیم یوردلارینا قدر سنین دیلین اوخونمالیدیر.
«هامیمیز قارداشیق»؟؟؟!!! آما کتاب ساحه‌سینه گلنده، کتابلار سنین دیلینده یازیلمالیدیر یوخسا مجوز آلماسینا یوز تورلو انگل یارانار.
«هامیمیز قارداشیق» آما اویدورما دا اولسا سنین تاریخین یازیلمالی سنه تاریخ یارادیلمالی منیم تاریخیم گیزله‌دیلمه‌‌لی اوستونه تورپاق تؤکولمه‌لی‌دیر.
مطبوعات، درگی‌لر، آما سنین افسانه‌‌لرین تاریخ آدینا اؤلکه‌‌نین جمعیتینه اوخودولمالی، منیم تاریخیم افسانه کیمی ده اوخونمامالی تانیدیلمامالی‌دیر.
«هامیمیز قارداشیق»؟؟؟!!! آما سنین فرهنگستانین اولمالی، اونا میلیاردلار بودجه آیریلمالی، اورادا عیبه‌جر سؤزلر یارانمالی میللتین آغزینا سوخولمالیدیر، منیم آغزیمدا دانیشدیغیم سؤزلر یابانجی سؤز آدی ایله سیلینمه‌لی سیرادان چیخمالیدیر.
«هامیمیز قارداشیق»؟؟؟!!! آما سنین کؤکسوز دبلرین فولکلور آدینا آکادمی‌لره چیخمالی اونا مقاله‌‌لر یازیلمالی مدنیت آدینا میللتین خوردونا وئریلمه‌‌لی‌دیر، منیم مدنیتیم {ایسه} آیاقلار آلتینا دوشوب مجوز وئریلمه‌‌ییب ایتیب باتمالیدیر.
«هامیمیز قارداشیق»؟؟؟!!! آما سنین دوننکی بینالارین مدنیت میراثی اولوب اؤنه گلمه‌لی، منیم نئچه مین ایللیک بینالاریم ییخیلمالی صاحبسیز بوراخیلیب قوردا-قوشا یووا اولمالیدیر.
«هامیمیز قارداشیق»؟؟؟!!! آما سن منیم وارلیغیمی اؤز آدینا ثبت ائتدیریب اونا اؤیونمه‌‌لی‌سن، من ایسه باخیب سسیمی چیخارتمامالییام.
«هامیمیز قارداشیق»؟؟؟!!! آما سن منیم یاتاقلاریمی تالاییب فارس بؤلگه‌‌لرینه آپاریب اورانی جنته چئویرمه‌‌لی‌سن، من دوروب باخمالی سسیمی چیخارداندا یابانجی مأمورو دئیه دامغالانمالی و فنایا اوغرامالییام.
«هامیمیز قارداشیق»؟؟؟!!! آما سنین الین منیم جیبیمده دولانماغا حاقلی‌دیر، منیم الیم اؤز جیبیمه گئتمه‌‌مه‌لی جیبیمده هئچ نه اولمامالیدیر.
«هامیمیز قارداشیق»؟؟؟!!!» آما سن نئچه مین کیلومتردن سو گتیریب گؤل یاراتماغا اورادا قاییق سالیب دولانماغا حاققین وار، منیم ایچینده گمی دولانان گؤلوم قورودولوب اوندان دوز فیرتینالاری قالخماغا سسیمی چیخاردیرامسا، امنیت مسأله‌سی اولور اونا حاققیم یوخدور.
«هامیمیز قارداشیق»؟؟؟!!!آما اؤلکه‌‌نین بوتون پوللاری سنین طرفینده خرجله‌نیر، اؤلکه‌‌نین آغیر وئرگیلری ده بیزیم پاییمیزا دوشور.
«هامیمیز قارداشیق»؟؟؟!!! آما سن گلیب منیم ائویمده اؤز دیلینده دانیشیرسان سؤز اولمور، من اؤز ائویمده اؤز دیلیمی دانیشماغا حاقسیز تانینیرام.
«هامیمیز قارداشیق»؟؟؟!!! آما پای بؤلنده پایین هامیسی سنین‌دیر. منیم ده بیر پاییم وارسا، سنه باخیب سنه آفرین-احسن دئمکدیر.
«هامیمیز قارداشیق»؟؟؟!!! آما بو قارداشلیغین بوتون قازانجلاری سنین، بوتون زیانلاری منیمدیر.
«هامیمیز قارداشیق»؟؟؟!!! آما بیر جمعده ۹۹ مندن بیری سندن اولاندا او ۹۹ نفر دؤنوب سنین دیلینی دانیشمالیدیر بو سنه حؤرمت اونلارا وظیفه ساییلیر. بیر نفر ده بئله بونا قارشی دورسا او بیر نفر پان آدی ایله محکوم ائدیلمه‌لی و دوبردی داغیدیلمالیدیر.
«هامیمیز قارداشیق»؟؟؟!!! آما بو قارداشلیغین آدی آیی قارداشلیغیدیر. آییدان آداما دایی چیخماز.
یا آدام اول قارداشلیغین یولون بیل یا آداملیقدان-قارداشلیقدان دانیشما.
سن منیم نجابتیمدن لیاقتیمدن انسانلیغیمدان سوء استفاده ائدیب منه شرارتینی، خباثتینی پای وئریرسن. بونلار سنین اولسون منیمکی منه یئتر.
«بهرام اسدی» – ۱۰ فروردین ۱۴۰۴