«تۆرکیه سئچگیسی‌نه دۆنیانین هیجانلی باخیشلارینین نه‌دن‌لری»
قوجامان عثمانلی امپراتورلوغو بیرینجی دونیا ساواشیندا بوتون آنتی اسلام قووه لری واسطه سیله باسقین اولموشدور. عثمانلی تورپاقلارین آنتی اسلام گوجلری پارام-پارچا ائدیب؛ آرالاریندا بؤلن حالدا، بیر سیرا تورکلر دسته-دسته قوروپ-قوروپ اؤلوم-دیریم ساواشینا گیریب، غرورلارین قورویوب؛ ایشغالا سون قویماغا قالخمیشدیلار. بئیله بیر زاماندا دونیادا اؤزل بیر اولای باش‌وئرمیشدی. دئمک روسیه ده کومونیسم انقلابی باشا چاتیب؛ تزار امپراتولوغو تاریخه قوشولدو. بو حادیثه تورکیه نین قورتولوش مژده سی و شانسی اولدو. بو اولای‌دان سونرا، تورکلر روسیه طرفیندن آرخاینلاشیر و باتی‌لا اوز به اوز قالیر. حال رهبرلیگین دوزگون سیاستی و میللتین اراده سی أل-أله وئریب ایندیکی تورکییه جغرافیاسینی باسقیندان قورتاریب، تورک جمهوریتینی دوغرولتموشدولار. دئمک قوجا امپراتورلوقدان قالان بیر اؤلکه؛ مدام اؤزلرینی کئچمیش امپراتولوق گوجونده دوشونن بیر میللت و دولت؛ بیرده داغیلمیش بیر اقتصاد، اشغالچی واسطه‌سی‌له خارابا قالمیش بیر مملکت و هر ائودن بیری شهید اولموش عزادار بیر میللت قالمیشدی. حال تورکیه دولتی ایکی یئره بؤلونن یعنی کومونیستلر له امپریالیستلر آراسیندا؛ یعنی دونیانین چوخ استراتژیک بیر نقطه سینده قورولموشدو. آنجاق عثمانلینی داغیتماغا چالیشان و مدام دولت قوروملارینا نفوذ ائدن گیزلی ماسونلار، آنتی تورک و آنتی اسلام باتی ایمپئریالیسملری یعنی خیریستیان(مسیحی) دولتلری؛ بیر طرفینده ده انقلاب صادر ائتمه یه دیره‌نن کومونیست دولتی؛ یعنی بیرلشمیش شوروی! بئیله حالدا داغیلمیش بیر اؤلکه جاماعاتینین یئنی قورولموش بیر دولتی ایاق دوتماغا؛ وارلیغین، غرورون قوروماغا نه ائتمه لی‌دیر؟!
تورکییه دموکراسی چارچوواسیندا بیر جمهورییت قورولوشونا اولسادا؛ ایگیرمی ایل کئچمیشه‌دک ایسته‌دیگی کیمی قاباغا گئده بیلمیردی؛ ارتش ژنرال‌لاری «ناتو»نون فرمانیندا؛ دولت مسئوللاری فراماسونلارین؛ میللت ایسه ضد امپریالیسم تفکرونده! دئمک جمهور باشکانلاری امپئریالارین فرمانیندان چیخان کیمی ارتش و ساتقینلار واسطه سیله کودتا باش وئریب؛ مستقل فیکر ائدن؛ وطنه یانان سوروملولاری(مسئوللاری) گؤتوروردولر. بو قونودا فیکرلی شخصیتلر؛ دوز معناسیندا اولان آزادلیقی سئونلر قدرتدن قیراقدا و بیر سیرالاری دا حبسده قالیردیلار. دئمک تورکییه «ناتو»نون یعنی آمریکانین نفوذوندان چیخا بیلمیردی. آ.ک.پ پارتیسی یعنی اردوغان و فیکیر داشلاری قدرته چاتان کیمی اؤنجه کودتانین کؤکون قوروتدو. جامعه ده اولان عینی و ذهنی دوروملاری دوشونرکن میللتچی پارتی‌لا اسلامچی پارتینی بیرلشدیردی. اونوتمایاق(تورکچولوک‌له مسلمانچیلیق بیر سیککه نین ایکی اوزودور). سؤز آزادلیغینا میدان آچدی. یعنی هر کس اۆرک سؤزلرین دئمکدن اؤترو مخالیفلره میدان وئردی؛ تورکییه فضاسیندا دمکراسینی دوزگون حاکیم اولاندان سونرا؛ تسلیحاتی، تئکنولوژیکی نائیلیت‌لر اینکشاف ائتمه یه باشلادی. یعنی تورکییه‌نی آمریکانین نفوذوندان قورتاردی. (بورادا تاریخه باخاراق میلاددان مین ایل اؤنجه‌یه یعنی آذربایجانا مین ایله یاخین حاکیم اولان ماننالارین سیاستیندن فایدالاندی. آخی آذربایجان تاریخینده ماننالار؛ آشورلارلا اورارتورلارین آراسیندا بیر رول اوینادی. اونلارین ضیددیتلی نقطه‌لرینی چوخالتدی؛ بیر-بیریلری‌له توققوشدوروب اؤزون گوجلندیردی و نهایت مادای طایفاسی رهبرلیگیله تورک اورارتور خالقین ماننالارلا بیر ائدیب آشورلاری تاریخه قوشدو) .
اردوغان آزربایجان لیدری و دولت باشچیسی اولو اؤندر حیدر علی‌یئوین فیکریله تورک دونیاسینی یاراتماق پروژه سینی پلانلاشدیردی… بوتون بو گئدیشاتلار مستعمره‌چی امپئریالیسملری قورخویا سالیب؛ بیرلیکده آنتی تورک ایده سی کناریندا، آنتی اردوغان تفکرونو میدانا چکدی! آنجاق اونوتمایاق بشریت طبیعتدن یارانیر؛ قیدالانیر، یئنه طبیعتین قوینونا قایدیر. دئمک طبیعت اؤزو ده جانلی؛ بوتون جانلی‌لاردان شعورلودور. بیرده طبیعتده بیر گیزلی عدالت بوتون حیاتا حؤکم ائدیر
(آخی بیر گیزلی عدالت، حؤکم ائدیر دونیایا آنجاق اونو آدم گوره بیلمیر….)
چوخ تأسف، چوخلاری دونیادا باش وئرن اولای‌لاری امپئریالارین سیاستی تأثیریندن دوشونورلر! آنجاق دوشوندویومه گؤره اوجور دگیل. بوتون یارانمیشلارین نفسی تانری یارادان طبیعتین ألینده دیر و بوتون گوجلرین گوجلوسو همان طبیعتدیر. دئمک عدالت سئورلر و عدالت اوغروندا چالیشانلار یالقیز دگیرلر. بلکه طبیعتده اولان بوتون متافیزیک گوجلر اونلارین آرخاسیندادیلار. منجه بوتون تانری ائلچیلری همان عدالت قایناغی اولان گوجلرین سایه سینده ایدئولوژیالارین دونیایا حاکیم ائدیبلر. اونا گوره دئیرلر: کیمسه عدالت و آزادلیق اوغروندا چالیشیرسا؛ یولونا اراده و ایمانی اولسا؛ یالنیز اوز حومه سی یوخ، بلکه بوتون دونیایا تاثیر بوراخا بیلر. اردوغان دا تورک توره‌سین دۆشۆنه‌رک اولو آتالاریمیز کیمی عدالت اوغروندا چالیشیر، بونا شاهید قارا باغین؛ کرکوکون سوریه نین؛ لیبی‌یانین… مظلوم میللتیندن حمایت ائدیب؛ بوتون سوپر گوجلری قارشینا آلماقدی. آیدیندیر کی، یاراندیغیمیزعدالت سئور طبیعت گوجلری، عدالت اوغروندا چالیشانلارین ایستکلرینه چاتینجاق آرخالاریندا اولاجاق. اردوغان دا بیر عدالت سئور و بیر سیاست نبوغو اولاراق تانرینین حمایه سیندن فایدالنیب؛ سوپر گوجلرین گؤزونون اؤنونده و اونلارا قارشی تورک دونیاسینی و تورک مسلمان بیرلیگینی یاراتماغا چالیشیر و چوخ کئچمه دن ایستکلرینه چاتماغی باشاراجاقدیر. بو قونودا اونوتمایاق حاق و عدالت اوغروندا چالیشان آزربایجان فعال‌لاری گله‌جه‌یه تام اومود و ایمان باغلایاراق ایراده لرین گوجلندیریب؛ منیت، شؤهرت‌بازلیق، قدرت طلبلیک… دویغولارا قاپیلمادان، تام صداقتله یالنیز عدالت و آزادلیق اوغروندا چالیشیرلارسا؛ هدفلرینه چاتماغا یقین ائتمه لی‌دیرلر. یاشاسین: آزادلیق؛ عدالت؛ میللی حکومت.
عقیل آذردخت -موللا باشی/اردبیل