یئددی یاشلاریمدا، قونشوموزون قیچینا شهر خسته‌خاناسیندا عمل ائتمیشدیلر. آتام اونا دَیمه‌یه شهره گئدنده، ننه‌م منی ده اونا یاماییب «بونو دا اؤزونله آپار بیر کاپشن آل، بیر ایکی گون سونرا مدرسه‌یه گئده‌جک» دئدی. اؤنجه، آتام منه تورپاق رنگینده بیر کاپشن آلدی؛ سونرا قونشوموزون زیارتینه گئتدیک.مدرسه‌نین ایلک گونو
مدرسه‌نین ایلک گونو، شهردن گلمیش آغا معلم، بیزلره کیلاسدا نئجه دانیشماغی اؤیره‌دیردی. بیزه سوخوشدورماق ایسته‌دیگی سؤزلر، ائو و اوشاقلیق دیلیمیزده دئییلدی. ائله همن ساعات مدرسه‌دن یورولوب اؤز اؤزومه «داها مدرسه‌یه گلمه‌یه‌جم» دئدیم. آما بو آرادا باشقا بیر سؤز وار ایدی.
آتام تحصیلی سئون بیریسی ایدی و کندیمیزین مدرسه‌لرینین یئرینی ده او وئرمیشدی و ائله همن گون، اوردا، او یئرین قالان یاریسینی شوخوملاییب اکیردی. آتام داشلارین اوستونده اوتوروب، تزه‌جه شوخوملانمیش تورپاغا باخیردی. بیرینجی زنگ بیتن همن، تنفس‌ده گئدیب اونون یانیندا دوردوم.
پاییز گونشی‌نین، ساری تئللری تزه‌جه شوخوملانمیش تورپاغا یاییلیردی و تزه پالتار گئیمیش من، اؤزومو همه‌شه‌دن گؤیچک حیس ائدیب یاواش یاواش اؤزوموزون ساندیغیم مدرسه‌نین حیه‌طینده آرخایینلاشیردیم. تیراختورون تیرتیر سسینه گؤره، تیراختورچو ایله دانیشان آدام چوخ اوجا سسله دانیشمالیدی. قیشقیراراق تیراختورچو ایله دانیشان آتامین سسی کیلاسیمیزا گلیردی و کیلاسین پنجره‌سیندن باخاندا آتامی گؤروردوم. ائله بیل اؤز ائویمیزده ایدیم اؤز حیه‌طیمیزده.
بونا گؤره، دویغولاریم تزه‌جه شوخوملانمیش تورپاغیمیزا قاریشیب؛ تورپاق رنگینده اولان کاپشن‌دن گوج آلیب پنجره‌دن گؤرونن آتاما آرخالاناراق، شهردن گلن معلم‌ین اؤزگه دیللی سؤزلریندن قورخمادیم و مدرسه‌دن قاچمادیم. ندنسه تورپاغی اؤزوموزدن اولان مدرسه‌لرده، ائو و اوشاقلیق دیلیمیزه یئر یوخدور؟
آلیوشا «کارامازوف قارداشلاری»نین سون ورقلرینده، بیر داش قیراغینداکی اوشاقلارا «یاشامدا، یاخشی خاطیره‌دن داها گؤزل، داها ساغلام، داها گوجلو و اوستون بیر شئی یوخدور؛ اؤزو ده ائو و اوشاقلیق خاطیره‌سیندن» دئیه‌رک کئچمیش گونلرینی خاطیرلاییب، بئله سونوج آلیر: «هر انسان اؤز اوشاقلیغیندان، یالنیز بیرجه گؤزل و مقدس خاطیره یاددا ساخلاسا؛ او خاطیره اونا نجات وئره‌جک».
انسانلارین ائو و اوشاقلیق خاطیره‌لری، دوغما دیللرینده یووا سالیب یاشاییر. آلیوشانین سؤزلری دوغرودورسا، بو قالابالیق اؤلکه‌ده، بلکه بیزی نجات وئره بیلن تکجه شئی، دوغما دیلیمزده یووا سالان ائو و اوشاقلیق خاطیره‌لری اولاجاقدیر.
ابراهیم رشیدی
