ایراندا پرئزیدئنت سئچکیسی، «اۏدلا سویون بیرلشمهسی» دئمکدیر
ایرانێن اۆزده اسلام رئژیمی، گئرچکده ماسۏن عامیلی ۴۵ ایل ایران خالقێنا دیوان توتوب. بو آرا غیرفارسلارا اؤزللیکله تۆرک، تۆرکمن، عرب، کۆرد، بلوچ، تالێش و گیلکلرین میللی-مدنی وارلێغێنێ سوْیقیریم ائدیب. سۏن ایللرده رئژیمین بو کیمی جینایتلریندن و اجباری حجاب آدێندان عمومی آزادلێغا قارشێ دورماسیندان دوْلایی اعتراضچێلاری حبس، ایشکنجه و اعداملارؽ، حاکمیتین بینؤورهسینی لاخلادێب. گؤرۆنن اوْدورکی، اۆزده «اؤلۆم اوْلسون» شعاریلا سۆپرگۆجلرینین منافعینی گیزلینجه تأمین ائدن بو دیکتاتوْر رژیمین غربلیلره هله مصرف تاریخی بیتمهییب. بونون اۆچۆن ده یاخێن گۆنلرده پرئزیدئنت سئچکیلرینه حاضێرلاشان ایران رئژیمی، لئقاللیق قازانماق اۆچۆن جمع اضداد دان (اوْدلا- سو دان) بیر ویترین سرگیلهییب. بئلهکی، تۆرکلۆیۆایله فخر ائدن و ایران میللتلرینین تام حقوقلارێنێن وئریلمهسینی سؤیلهین مسعود پزشکیانێن پرئزیدئنتلیگه آدایلێغێنێن تصدیقلنمهسی، اوْنون یانێندا ایرانشهریلرین تانێنمێش سیماسێ محمدجواد ظریفین یئر آلماسێ، همین او اوْدلا-سویون بیرگه یوْل گئتمهسی دئمکدیر. اونوتمامالێیێق کی، محمدجواد ظریف، غرب آغالارێنێن فارس حاکمیتینی «حیمایت اَلیمیزی اۆستۆنۆزدن چکهریک سه، ایکی هفته عرضینده تهراندا تۆرکجه دانێشماق زوْروندا قالارسێنێز» مئساژێنێ گیزلتمهین بیر فارس شئونیستیدیر. ایندی اۏنو عادی جاماعاتدان داها یاخشێ پزشکیان بی ده بیلیر. آمما اۏنونلا بیرلشمهسێ نه دئمکدیر؟ اؤتن پارلامئنت سئچکیلرینده آزربایجانلێلار، اؤزللیکله باتێ آزربایجان ایالتینده کۆرد عۆنصۆرۆنۆن سئچیلمهسینه اؤنم وئرمهدن، صاندێق باشێنا گئتمهین تۆرکلرین «آزادلێق، عدالت، میللی حکومت» سؤیلهمی هامێیا آیدێندێر.
بو تهلۆکهنی جیددی دۆیان حاکمیت، بو دفعه گؤزلَنیلمز بیر اوْیون اوْینادی. اؤلکهده درین دؤولتین دۆشۆنجهسینه باخدێقدا، بو ایش گؤزلَنیلمز ایدیر. باشقا سؤزله، یا خامنهای چوْخ درین آغێللێ بیریسیدیر و اؤزۆ ایله رئژیمینی ایران خالقێنێن اؤفکهسیندن قوْروماق اۆچۆن، پیسدن پیس آراسێندا پیسی سئچیب.
البته تاریخ ثبوت ائدیبدیر کی، دیکتاتوْرلار سوْن آنلارێنا قدر، اؤزلرینی عاغێللێ و بو سببدن ده تام حاقلێ بیلیبلر. منجه ایکینجی پهلوی محمدرضانێن «من سیزین انقلابێنێزێن سسینی ائشیتدیم» اعترافیندان، علی خامنهای اؤز نظرینده یاخشێ درس آلێب. آنجاق بو هئچنهیی دَییشمهیهجک.
چۆنکۆ آتالار دئییبلر:« بیر اَلده ایکی قارپێز توتماق اوْلماز». باشقا سؤزله «هم خدانێ، هم خورمانێ ایستهمک» اوْلاسێ دئییل. بیر یاندان دۆنیانێ دوْلاندێران مافیالارێن منافعینی تأمین ائدیب بیر یاندان دا بونون اۆچۆن اؤز خالقێنا عادی یاشایێشێ زهر ائتمک اوْیونو چوْخدا اوزون سۆرمز. دۆنیا و بؤلگهده ژئوسیاسی دَییشیکلردن ائتگیلنمهمک هئچ بیر دؤولت-میللتین ایرادهسیندن آسێلێ دئییل و بو قاچێلمازدێر. یا دا، باکینگهام سارایێندان اوْنا تاپشێرێق بئلهدیر کی، اوْنلارێن منافعینی و اؤزۆنۆن جانێنێ قوْروماق اۆچۆن ایکینجی زهر بارداغێنێ ایچیب و ایگیدجهسینه یوموشالمالێ (نرمش قهرمانانه)یه بوْیون اَیمهلی دیر.
پزشکیانا گلدیکده، اوْنون سوْنۆ چوْخدا یاخشێ گؤرۆنمۆر.
مسعود بی پزشکیان پرئزیدئنت سئچیلرسه، یا رومی-رومی اوْلمالیدێر، یا دا زنگی -زنگی. ایران میللتلرینه وئردییی سؤزۆندن داشینار سا، خالقێن غضبی و نیفرتی هم اوْنون اؤزۆنه، هم ده رئژیمه نئچه قات آرتاجاق. نئجه کی حسن روحانی نی اؤز دیلیمیزده مۏر تۆلکۆ فارسجا همن روباه بنفش تانێیێرێق، پزشکیانی دا اوْنون طالعی گؤزلهییر. بو ایسه نظامێن سوْن شانسێ اوْلا بیلر. عکس حالدا اوْ، باشدا اینگیلیس، آمئریکا، فرانسا، روسیا و چین کیمی وئتو حاقلارێ اوْلان آغالارلا یاناشێ، تبریزلی لر دئمیشکن:«کۆچه دارغا شایێرد»لێغێندان بیر چفیه و بیر آنکارت اوْلونموش ساققال حسابێنا اؤلکهنین مقدراتێنێ اَله آلمێش حزبالشیطانلارلا مبارزه آپارمالێ دێر. اؤرنک اۆچۆن آنا دیلیتدریسندن علاوه، اورمو گؤلۆنۆ یئنیدن دیرچلتمک، اۏندان اَن آز گؤزلنتیلردن بیریسی دیر. آمما اورمو گؤلۆنۆن دوز یاتاقلارێنداکی قیمتلی زنگین ماددهلردن میلیاردلارجا قازانان سپاه مافیاسێ اۏنا سسسیز قالاجاقمێ؟ بئله بیر حالدا، طبیعی دیر کی، آغا بیر دفعه ده «علیل بیر جانێم» وار… دئمکله، اوْنو دا سوْیداشێ میرحسین موسوینین گۆنۆنه سالاجاق.
اؤزل بیر قوروپدا آدێنێ چکمک ایستهمه دییم بیر دۏست یازێر:
ستارخان دا دؤرد ایل دیزلریندن یارالێ یاتاق دۆشدۆ. ایندی عکسینی پانلار دیوارلارێنا وورور کی، بیزه جان وئردین، بیز ده آلدێق جانێزی. تاریخ ترسینه یامان تکرار اۏلورموش… چۏخ یۏخ، آلتێ آی دورمو ایندیکی وطند اشلارێمێز گؤزلهسن. اگر مسعود بی چێخارسا و دؤرد ایل سۏنرا اوزاغی تانێق (شاهیدی) اۏلاجاقسێز. اۏندا گنج حقیقی وطن سئورلر یا خالارێزدان توتماغا حاققێ وار.
ستارخانین تهرانا گلیشی، انجمن غیبی تبریز، ماسۏن محفللری، داشناکلارێن حیمایتی، سۏنراسێ ایچیندن رضا پهلوی چێخماسێ
و سۏنرا، سۏنرا، سۏنرا اَلى بۏش-آیاغێ یالێن میسکین تبریز یادێما دۆشور.
۵۰ ایل سۏنرا اۏ نسیلین ایندیکی نسلی داورانێشێنا گؤره قێناماسێ تنقیدی…
گؤرهسن آزربایجان هاچان سیاسی اینتیباه(رۏنئسانس) دؤورۆنه چاتاجاق؟
آزربایجان سانکی الست گۆنۆندن یارانێب ایگیدلیک (حماسه) هزینهسی و اؤزۆندن باشقا هر کسه منفعت وئرمه یه.
گؤزل مسعود خان؛ بو چاغێن ستارخانێ مسعود اطرافێنێ، میرزا آغاخان کرمانی لر، ظریف کسروی لر / آخوندی تقی زاده لر، بطحائی لر توتموش ستارخان.
تئهران سنین قربانگاهێن؛ قێزێلباش مسعود، بابک مسعود بو دؤنه عجملره، خلیفه لره منفعت وئرن اۏلورسان!
سنده سوچ یۏخ؛ بونلارێ بیله-بیله ائدن خالق. یازێق گله جک نسیل… قێناسان اَلینه نه گله جک، ایچدن آغلاسان اَلینه نه گله جک؟
خۏرافه پرستلیک، کئلچمیشلریمیزین سوچلارێنا اَلیمیزه نه گلیر؟ آلدانێش دؤنگۆسۆ هئی دۏنۆر؛ هنچ نه ده دَییشمیر. هئی دؤنۆر آلدانێشێمێز. جان فشانلێغێمێز تکرار اۏلور.
مسعودخان ۱۴۰۳-جۆ ایلین ستارێ؛ سن و سنین آرخاندا دوران خالقێن اومودلارێنێن داشا دؤیولمهسی یئتردیر. ایللر بۏیو یوخویا گئتمهیینه سبب اۏلان حادثه دیر…
یازدێق قالسێن تاریخده؛ قالانێ قضا- قدر اۏلسون …
تاریخیندن درس آلمایانا، تاریخینی عیبرت ائتمه یه نه، اونوتقان خالقا قضا-قدر نئیله سین؟
يا خيرالعمل دئمگینله دئییل. اۏیاق خالق دۏغالدێر قازاناجاق باشقالارێنێ استیلاسێنا دا آلاجاق.
نایین، آشتیان، نور، اصفهان… قاجارێ ایداره ائدن کیمی؛ شاهێ تبریزدن اۏلسا دا، قانونو عجم اۆچۆن ایدی.
گؤسترگهیه باخاق. گؤی تۆرک، اۏغوز، بایات، قاجار، ایرانشهری بیر وطنداش!
تۆرکلر، داها دۏغروسون دئسک غلامان تۆرک ساسانی دؤولت قوروز ۲۱ نجی عصیرده !
هم ده فخری ایله ، کۏمۏنیزمی، پان فارسیزمی گۆجلندیرن تۆرک.
اقلیتی، اکثریتی، مجاهدی، سلطنتچینی، اصلاحچێنێ، اوصولگرانێ گۆجلندیرن تۆرک، هامێسێ.
سن ده اۏلمایان تکجه شئی اؤزۆن سن اؤزۆن!
هامێ وار سنده؛ سنده هامێ دان تاپێلێر. سن دۏلوسان اؤزگه ایله، بۏشسان اؤزۆنله».
نتیجه اعتباریله، خالق بو دفعه سوسارسا، شۆبحهسیز بو دیکتاتۏرلوق یئنه ده اوزون سۆرهجک.
یازار: حبیب ساسانیان (یاکاموز)