«ایندی گلیب قوش حددینه»
بؤلگه چیلغین توققوشمایا بویلودور.
بو گونلر گونئی قافقازدا گرگینلیک شارپینگی پیک حدده چاتیب؛ روسیانین اوکراینا تلهسینه دوشمهسی، باتینین اوکراینایا دؤزوملو ائلهجه ده سارسیدیجی یاردیملاری ایله سیاستی، بؤلگه ده دنگهلری دَییشیر.
ایکینجی قاراباغ ساواشیندان سونرا، مینیسک قوروپونون سسسیز اؤلومو، دونیا سوپرگوجلرینی دریندن دوشونمک زوروندا قویدو.
آذربایجان جمهوریتینین شانلی غلبهسی له یاناشی انرژی قایناقلاری دونیا چاپیندا بو اؤلکهنی یئنی موستَوییه(سطحه) قالدیردی.
عین زاماندا، توران بیرلیگینین تمللری آرد-آردا گئرچکلشمکده دیر. روسیانین قارانلیق گلهجهیینی احتیمال ائدن ائرمنستان دؤولتی، یاواش-یاواش تاریخی قوروجوسوندان اومودونو اوزوب و یئنی موتتفیق آراماقدا باتییا یؤنلَنمکدن باشقا چیخیش یولو گؤرمور. بونون اساس نهدنی روسیانین گونئی قافقازدا گوجونون ایتیریلمهسی ایله یاناشی، ایرانین دا ایچهری-دیشاری یانلیش آددیملاری، اوستهگل هرطرفلی تورک دونیاسینین اورتاسیندا بیر قورو آدا کیمی یالقیز قالماسی دیر.
2020-جی ایل 44 گونلوک ساواشیندان سونرا ائرمنیستانین حربی-سیاسی رهبرلیگینین پارادوکسیکال آددیملاریندان آیدینجاسینا آچمازدا قالدیقلارینی گؤرمک اولور.
پاشینیانین: «بیز آذربایجانین تورپاق بوتؤلوگونو رسمیته تانییریق» چیخیشیندان سونرا، قیسا زاماندا آذربایجانین قاراباغ بؤلگه سینده یاشایان ائرمنی سویلو وطنداشلارینین مقدراتینی رسمی دانیشیقلاردا اؤن شرطلردن بیریسی کیمی ایرهلی سورمَگی، 9 نوامبر اوچطرفلی آنلاشمانین ضیددینه اولاراق، 10 مین لیک سیلاحلی قووهلرینی قاراباغدا آیریمجیلارا (تجزیهطلبلره) دایاق ساخلاماسی، هابئله اؤلکه سی ائرمنیستانین آنایاساسیندان قاراباغی بؤیوک ائرمنیستان تورپاغی مادهسی نی سیلمهمکلری، اصلینده آذربایجانین تورپاق بوتؤولوگونه قارشی دانیلماز فاکتلاردان دیر.
زنگهزور دهلیزینین لاچین یولو ایله پارالئل آچیلماماسی دا، گرگینلیگین اساس نهدن لریندن بیریسی دیر.
اوسته گَل، کئچمیش مینیسک قوروپونون باشچیلاریندان فرانسا ایله آمریکانین ائرمنستان مئییلی حرکتلری، آوروپا بیرلیگینین خیریستیان(مسیحیت) تعصبکئشلیگی، ایرانین دا اسلام حاکمیتی آدی آلتیندا دیلی بیر-دینی بیر مسلمان آذربایجانی یوخ، ائرمنیستانی دستکلهمهسی، بو خمیرین هله چوخ سو آپاراجاغینین گؤستهریجیسی دیر.
سون گونلرده آذربایجان اوردوسونون زیرئهلی تئخنیکالارینین اوزهرینده یازیلمیش ترسه ∀ حرفی، ائرمنی لری قورخویا سالماقلا یاناشی، ایرانی دا آرخایین ائدیبدیر کی، آذربایجانین اوچونجو ائله جه ده قورتاریجی ساواشی قاچیلمازدیر. اونا گؤره ده ائرمنیستان سینیرلارینین پوزولماسینی قیرمیزی چیزگیسی باغیران ایران، ساواش آب –هاواسی نین قیزیشان گونلرینده، آذربایجانلا دیل تاپماغا چالیشیر.
44 ایل بویوندا:«بؤیوک شیطان آمئریکایا اؤلوم» سلوقانی(شعاری) وئرن، آذربایجانی سندسیز-ثوبوتسوز اولاراق تکفیری ایله اسراییلی سینیرلارینا گتیرمکده اتهام ائدن ایران اسلام حاکمیتی، ائرمنیستانین آمئریکا ایله بیرگه حربی تعلیمی (رزمایش جنگی) کئچیرهجک خبرینی بیلدیکده، خیال قیریقلیغینا اوغراییب، اؤتن ایللرین ترسینه، 180 درجه فیرلانیب، بو گون آذربایجان جمهوریتینین باشکندی باکی دا حربی-سیاسی هئیأتینین واسطه سیله فخری خیاباندا استقلال شهیدلرینین مزارینا أکلیل(تاج گُل) قویماقلا!، دولاییدان «آنلامامیشام» دئدیگینی سرگیلهدی.
گؤرونور روسیادان اومودونو ایتیرن ایران اؤلکهسی، باتینین سانکسییالاری(تحریمی) قارشیسندا آرتیق دیز چؤکوب، یئنیدن اعتراضلارین ایلدؤنومو عرفهسینده، تهلوکهنی جیددی دویوب؛ بونونلا دا آتالار دئمیشکن:«ایندی گلیب قوش حددینه».
یازار:حبیب ساسانیان (یاکاموز)/«ایندی گلیب قوش حددینه»