گونئی قافقازدا چکیشمهلردن دولایی پانایرانچیلارین قارینآغریسی نهیین گؤستهریجیسیدیر؟
2020-جی میلادی ایلین اورتالاریندان باشلاناراق، دونیا و بؤلگهده هیزلی صورتده اینانیلماز اویونلار باشلاییب.
داییجان ناپئلونی دوشونن بیرچوخ عاوام دئییلن قارا جاماعاتلا یاناشی دئمک اولار پان ایرانچی دوشونجهلی پئشهکار ژورنالیستلر ده، گوندهلیک خبرلرله تحلیللری گؤردوکده، بلکهده گؤزلرینه اینانمیرلار. داها دوغروسو اونلار بو اویونلاردان چاش-باش قالیبلار
اوستهگل آذربایجان جمهوریتینین قاراباغداکی آردیجیل اوغورلاری ایسه بونلارین آنتیتورک اولدوقلارینی داها آیدین اوزه چیخاردتدی.
بو آرا پانایرانچیلارین ایستر ایچهری ده دؤولت ایشچیلری، ایستر دیشاریدا حاکیم سیستیمه مخالفلری، گونئی قافقازلا اوکراین مسئلهسینده آچیقجاسینا هذیان و یا زایواقلامالاری دانیلمازدیر.
بونلار شرقشناس، اونیودرسیتئتت موعلمی (استاد دانشگاه) آراشمان اولوسلارآراسی تحلیلچی، تاریخچی و… بیرچوخ آغزا و آغیلا سیغمایان لقبلرله یاناشی، گولونجلو چیخیشلاری ایله اؤزلرینی پیس وضعیته سالیبلار.
اؤرنک اوچون یئری- گؤیه، ایپی ساپا دوزمکله چالیشیرلار، استراتژیک یانلیشلارینی اؤرت-باسدیر ائتسینلر. او جوملهدن: گاه تکفیریلرین آذربایجان اوردوسو سیرالاریندا موزدلو قوللوقچولارینی، گاه ایسراییلین دستهیینی، گاه روسیانین خیانتینی، گاهدان دا ماسونلارین اوزون مدتلی گیزلین پلانلارینی سؤیلهمک له، گونون گئرچکلرینی و دنگهلرین دَییشینی اینانماق ایستهمیرلر.
أن گولمهلی سی ایسه، اینگیلترهنین آذربایجان جمهوریتینین نئفت-گازیندان بی پی(بریتیش پترلیوم) شرکتی واسیطهسی له یوکسک قازانجینا اشاره ائدیب و زنگهزور دهلیزی مسئلهسینده دونیانین بو قوجامان سؤمورگهچیسی نین ده پرده آرخاسی آذربایجانین یانیندا اولدوغونو ایددیعا ائدیرلر!
اونوتمایاق: آرتیق خواجه حافظ شیرازلی دا هم پهلوی هم ده سؤزده ایران اسلام جمهوریتینه ایراندا مین ایللیک تورک حاکمیتینی همین قارا قووهلر واسطهسیله فارسلارا کؤچوردوکلرینی بیلیر.
بو آرا منه ائله جه ده اولا بیلسین بیرچوخلارینا بیر سورغو یارانیر:
پان ایرانچیلارین ایددیعالارینا گؤره گئرچک دن دونیانین سوپر گوجلری دئییلن ابرقدرتلر آذربایجانی و تورک دونیاسینی دستکلهییرلر سه، بس نه دن قیساجا بیبیسی آدیلا تانینان: British Broadcasting Corporation ، یعنی بؤیوک بریتانیا خبر آگئنتی یا بنگاه سخنپراکنی اینگلیس دن توتموش، الجزیره خبر آژانسی، ووا ( وویس آو آمئریکا، یورو نیوز، دویچه وئلهنین فارس بؤلمهلری، اؤز دؤلتلرینین رسمی تریبوناسی اولاراق دایانمادان غرضلی خبرلرله آذربایجانین اوغورونو قارالاماقدادیرلار؟! بیرجه بو قالیب کی الجزیرهخبر آژانسی نین فارسجا بؤلمهسی، آدینی الجزیرهی فارسی دان الارمنیهی فارسی یه چئویرسین.
حتی اونلار آغی قارا گؤسترمکده دونیانین دؤرت بیر بوجاغیندان قاراباغدا اشغالچیلیقلا 30 ایل بویوندا یئرلشمیش یئرسیز- یوردسوز ائرمنیلرین بو گونلر قاچدیقلارینی آذربایجان واسیطه سی له ائتنیک تمیزله آدلاندیریرلار و بو یؤنده آذربایجان اوردوسونون قاچقینلارلا تام هومانیست داورانیشینی بئله تحریف ائدیر لر.
بیر حالدا کی، بیرینجی قاراباغ ساواشیندا بیر میلیون آذربایجان وطنداشی نین دوغما یوردلاریندان زورلا قاچقین و سورگونلوکلرینی ایندی ده گؤرمزدن گلیرلر. اوسته گل، قاراباغی او چاغلار زورلا همین دونیا سوپرگوجلرینین دستهیی له ایشغال ائدرکن، خوجالی کیمی سوی قیریمینا گؤز یومدولار. اؤزلرینین سؤزده بیرلشمیش میللتلر قورومو آدلاندیردیغی (سازمان ملل متحدین) 1994 ده کی ائرمنیستان علیهینه دؤرت قطعنامهسی 30 ایله یاخین کاغیذ اوزهرینده قالدی و آغالارین قیمی قیمبیلدامادی.
یازار: حبیب ساسانیان (یاکاموز) / گونئی قافقازدا چکیشمهلردن دولایی