گوره سن تاریخ بو گونو اونوداجاق می؟
«بو گون آذربایجانین و میللی فعاللارین دورومو»
بوگون آذربایجان چوخ چتین گونلرین حتی آجی بیر اسارت گونلرین کئچیردیر. دریاسی قورودولاراق دوزلاغ دئپوسونا چئوریلیبدیر. تورپاغی- سولاری زهرلنیب، دیلی باغلانیب، میللتی ایشسیزلیگه یوخسوللوغا معروض قالیب‌دیر. تاریخی تحریف اولونوب، کند، شهر، چای آدلاری … (توپونیم‌لری) باشقا آدا چئوریلیر. جاماعاتی تام جهالته اوغرادیب، ذهن‌لرین چاشدیراراق آسمیله ائدیرلر و مدام بیر سیرالاری مانقورد ائدیب اؤز میللی فعاللارینی ایشکنجه، حبس و اؤلدورمه یه حاضیرلاییرلار! کیملیینی قوروماغا چالیشانلارینا اوتانمادان پان لقبی وئریرلر. ساوادسیز، هر دویغونو میزینه قوربان ائدن‌لری مدیریت پستونا قویورلار! بیر حالدا کی مسئول اولدوغو منطقه نین- میللتین نئجه تهلوکه‌یه دوشدویونو گؤره-گؤره لاقید و سس‌سیز قالیر هئچ اونون یئرینه فاشیستی حرکاته معترض اولانلارا دا هده قورخو گلیب، تهدید ائدیرلر! بونو بیله‌رک وطن هرکسین شرفی- دیل ناموسو و ائل غئیرتی‌دیر. گؤروروک کی شرفی ده ناموسو دا غئیرتی ده میزه و مقاما ساتیرلار!…
جسارتله دئمک اولار تورکلری حربی اسیردن داها پیس فیزیکی و مدنی سوی قیریم ائدیرلر. گون تئکنولوژئیاسیندان و هر بیر وسیله دن فایدالانیرلار! حتی بیولوژیکی هجوملارلا یئمک‌لری زهرله‌ییر؛ هاوانی مختلف ویروسلارلا چیرکلندیریر. اوسته‌لیک باشقا یولارلا دوغوب تؤره‌مه (زاد و ولد) توخوملارین آرادان آپارماقاقلا و یا خود هورمونلاری ضعیفلندیرمکله تورکلری نطفه ده بوغورلار. درین باخاندا یوز ایله یاخیندیر آذربایجان بو هجوملارلا ال به یاخادیر. آنجاقکی تکنولوژئییا گوجلندیکجه نژاد پرست فاشیستلرین هجومو یئنیله‌نیر، قددارلاشیر و گئنیشله‌نیر! بو آرادا هجوما معروض قالانلار نه ائدیرلر؟ چوخلاری فاشیستلره آلدانیر؛ هویتین ایتیره رک باشقا هویته سیغانیرلار. بیر سیرالار بیر قارین دویورماغا؛ میز صاحیبی اولماغا تام گوجلریله دوغما میللی چالیشانلارینا قارشی مانقورت رولونو اویناییرلار! بلکه ده ائله دوغرودان_دوغرو مانقورت اولوبلار! بیر سیرالاری میللی وارلیغین دوشونمه دن هویت‌سیز اولاراق اؤلو و خنثی بیر آدام اولورلار! بو آرادا هامیسیندا آجی‌سی، بیر سیرالارین لیدرلیک اوسته بیر بیرلریله دوشمان اولوب؛ بعضیلری رقیبینی آرادان آپارماقدان اؤترو بیلر-بیلمز نژاد پرست آنتی تورکلره دستک اولورلار! نئجه کی تخریبات چته لری یارادیب؛ مرید اولمایانلارا ساتقین اتهامی ووروب؛ مبارزه مئیدانیندان چیخارتماقا چالیشیرلار! بو قونودا آنتی آذربایجان گوجلری واسطه‌سی‌له یالانچی و قوندارما حؤکم‌لره معروض قالماقلاری تبلیغ اولوب؛ عوام آراسیندا اؤزلرینه یئر آچیرلار! یالان و یا خود واختی کئچمیش شخصی توققوشمالارین حرکتین قیزقین چاغیندا اوزه چیخاردیب میللتی گئتدیگی یولدان جایدیریرلار! آنجاقکی دوشونمورلر بو طبیعته گوجلو بیر عدالت حکم ائدیر. چوخ کئچمه دن هر شئی اورتایا چیخاجاقدیر. دوزدور؛ غافیل اولانلار بو گئرچگی دوشونمه‌یه رک، گؤره بیلمیرلر!… دوغرودان دا بئله بیر دورومو گؤرنده آدامین اوره یی پارتلاماق ایسته‌ییر! آخی نه‌دن؟ یعنی قدرت و شهرت‌پرستلیک حتی وطن و میللت ساتماق قدر اؤنملی اولور! آللاهیم بو ویجدانسیزلیق؛ وطن ساتماق، تؤهمت وورماق‌لار دوغروداندا اینانیلمازدیر! بیر حالدا کی بو گون بو مظلوم و بوتون آنتی تورکلرین ظولمونه مغروض قالان آذربایجان؛ بیرلیگه، حزبه، فیکیر اوداسینا و اونون واسطه‌سی‌له لیدرسازلیغا مؤحتاج‌دیر. نه‌دن بئله اولمور؟! آچیق باخاندا بو گون رهبرلیک مدعی‌لری ده رهبر سازلیق ائدن‌لر ده و بو ارتجاعی دوشونجه نی تبلیغ ائدن‌لر ده یقین کی یا جاهیل‌دیلر یا آنتی آذربایجان جبهه سینین قوللوقچولاریدیلار.
یاشاسین: آزادلیق، عدالت، میللی حکومت.
عقیل آذردخت- اردبیل (موللاباشی) / گوره سن تاریخ بو گونو اونوداجاق می؟
